ខេត្តត្បូងឃ្មុំ៖ អភិបាលក្រុងសួង លោក ជា ណារ៉ុន បានប្រកាសនៅយប់ថ្ងៃទី១ ខែមិថុនា ឆ្នាំ២០២១ ពីករណីវិជ្ជមានវីរុសកូវីដ១៩ ដែលបាន​ផ្ទុះឡើង នៅ​ក្រុងសួង លើបុគ្គលិកក្រុមហ៊ុន យូនី ស៊ីធី Unicity ដោយធ្វើតេស្ត ១៣៩នាក់ រកឃើញវិជ្ជមាន ១៩នាក់​។​ យុវជន​ប្រុសស្រី ដែលឆ្លងកូវីដទាំងនោះ អាយុចន្លោះពី ១៧ឆ្នាំ ដល់ ២៩ឆ្នាំ។

លោកអភិបាលក្រុងសួង លើកឡើងក្នុង​សេចក្តីជូនដំណឹងបន្ទាន់ លើករណីវិជ្ជមានកូវីដ ថា នៅ​ថ្ងៃទី០១ ខែមិថុនា ឆ្នាំ២០២១ ក្រុមគ្រូពេទ្យយើង បានធ្វើតេស្តសំណាក (Rapid test) លើបុគ្គលិកក្រុមហ៊ុនយូនីស៊ីធី (Unicity) ចំនួន ១៣៩នាក់ នៅ ៦ទីតាំងផ្ទះជួលស្នាក់ នៅតាមភូមិក្នុងសង្កាត់សួង ក្រុងសួង។​ ជាលទ្ធផល “មានវិជ្ជមានកូវីដ-១៩ ចំនួន១៩នាក់”។

លោកអភិបាលក្រុងសួង ជា ណារ៉ុន បានប្រកាសអំពាវនាវ សូមបងប្អូនប្រជាពលរដ្ឋក្រុងសួង និងអ្នកពាក់ព័ន្ធផ្សេងទៀត ទាំងប៉ះពាល់ដោយផ្ទាល់ និងប្រយោល មេត្តារួសរាន់ មកជួបក្រុមគ្រូពេទ្យ ដើម្បីពិនិត្យសំណាក និងធ្វើចក្តាឡីស័ក ជៀសវាងការបន្តដើរប្រាស្រ័យទាក់ទងជាមួយបុគ្គលដទៃទៀត នាំឲ្យកើតមានហានិភ័យខ្ពស់ក្នុងភូមិ សង្កាត់៕