រាជធានីភ្នំពេញ ៖ សមាគមកីឡាបាល់ទាត់កងយោធពលខេមរភូមិន្ទ(ទ័ព) បានធ្វើការប្រកាសអតីតគ្រូជម្រើសជាតិកម្ពុជា លោក Lee Tae Hoon ជាអ្នកចាត់ការថ្មីនៅក្នុងក្រុមរបស់ខ្លួនជាផ្លូវការ ហើយកាលពីព្រឹកថ្ងៃទី១…
រាជធានីភ្នំពេញ ៖ សមាគមកីឡាបាល់ទាត់កងយោធពលខេមរភូមិន្ទ(ទ័ព) បានធ្វើការប្រកាសអតីតគ្រូជម្រើសជាតិកម្ពុជា លោក Lee Tae Hoon ជាអ្នកចាត់ការថ្មីនៅក្នុងក្រុមរបស់ខ្លួនជាផ្លូវការ ហើយកាលពីព្រឹកថ្ងៃទី១ ខែមិថុនា។
ពិធីប្រកាសដំណឹងដ៏គួឱ្យរស៊ើបមួយនេះ ត្រូវបានរៀបចំធ្វើឡើងនៅក្នុងសន្និសីទកាសែត ស្ដីពីការប្រកួតជាផ្លូវការ អ្នកចាត់ការក្រុមថ្មីរបស់សមាគមកីឡាបាល់កងយោធពលខេមរភូមិន្ទ នៅសណ្ឋាគារសូហ្វីតែភ្នំពេញ វេលាម៉ោង១១ព្រឹក។ នេះជាដំណឹងថ្មីមួយ ដែលអាចចាត់ទុកថា ជាការត្រឡប់មកប្រកបអាជីពថ្មីនៅកម្ពុជា របស់លោកគ្រូ Lee Tae Hoon បន្ទាប់ពីលោកគ្រូបង្វឹកសញ្ជាតិកូរ៉េរូបនេះបានចាកចេញទៅរួមរស់ជាមួយក្លិប Hong Anh Gia Lai –HAGL នៃក្របខណ្ខកំពូលរបស់វៀតណាមអស់រយៈពេល២ឆ្នាំ គឺនៅក្នុងឆ្នាំ២០១៩-២០២០។ លោក Lee Tae Hoon ធ្លាប់បានធ្វើជាគ្រូបង្វឹករបស់ក្រុមបាល់ទាត់ជម្រើសជាតិកម្ពុជា អស់រយៈពេល៧ឆ្នាំ៣ខែ គឺតាំងពីឆ្នាំ២០១០ ហើយបានផុតអាណត្តិនៅក្នុងឆ្នាំ២០១៨។
លោក ខូវ ឆាយ អគ្គលេខាធិការសមាគមកីឡាបាល់ទាត់កងយោធពលខេមរភូមិន្ទបានឱ្យដឹងផងដែរថា ពីដំបូងឡើយ លោកមិនសូវមានសង្ឃឹមក្នុងការនាំយកលោក Lee Tae Hoon មកដឹកនាំក្រុមនោះទេ តែដោយសារកត្តាសំខាន់មួយចំនួន គឺការមានទិសដៅស្របគ្នា ក្នុងការអភិវឌ្ឍន៍បាល់ទាត់ ទើបឈានទៅដល់មានកិច្ចព្រមព្រៀង និងប្រកាសតែងតាំងអតីតគ្រូបង្វឹកជម្រើសជាតិរូបនេះជាអ្នកចាត់ការក្រុមថ្មីតែម្ដងទៅ។
លោកបានបន្តឱ្យដឹងទៀតថា គ្រូបង្វឹកជនជាតិកូរ៉េខាងត្បូងរូបនេះនឹងត្រូវកាន់តួនាទី ទូទៅដូចអ្នកចាត់ការក្នុងក្រុមជម្រើសជាតិកម្ពុជា លោក Keisuke Hoda គឺលោកគ្រប់គ្រងលើបច្ចេកទេសរួមរបស់ក្លិបរួមទាំងគ្រូបង្វឹកផងដែរ ។ ហើយមានសុពលភាពរយៈពេល២ឆ្នាំ។ ក្លិបក៏រំពឹងថា វត្តមានរបស់លោក Lee Tae Hoon នឹងធ្វើឱ្យសមាគមកីឡាបាល់ទាត់កងយោធពលខេមរភូមិន្ទកាន់តែរីកចម្រើនទាំងការលីគកំពូល ក៏ដូចជាការប្រកួតពានរង្វាន់សម្ដេចហ៊ុន សែន។
ទន្ទឹមជាមួយគ្នានេះដែរ លោក Lee Tae Hoon ក៏បានសម្ដែងនូវការរីករាយ ចំពោះការបានទទួលឱកាស ដើម្បីបានដឹកនាំក្រុមបាល់ទាត់នៅកម្ពុជាម្ដងទៀត។ លោកក៏បានប្ដេជ្ញាចិត្តថា នឹងប្រើប្រាស់នូវបទពិសោធន៍ និងនិងសមត្ថភាពដែលលោកមានចូលរួមអភិវឌ្ឍន៍សមាគមកីឡាបាល់ទាត់កងយោធពលខេមរភូមិន្ទឱ្យមានការរីកចម្រើន និងក្លាយជាក្លិបបាល់ទាត់មានឈ្មោះបោះសម្លេងនៅក្នុងតំបន់នាថ្ងៃអនាគត៕
ចែករំលែកព័តមាននេះ