ដោយមានការចង្អុលបង្ហាញពីលោកសុខ សំណាង ស្នងការនគរបាលខេត្តតាកែវ និងមានការសម្របសម្រួលពីលោក ជីវ ចាន់តារា ព្រះរាជអាជ្ញាអមសាលាដំបូងខេត្ត ជនសង្ស័យម្នាក់ ក្នុងចំណោមបក្ខពួកជាច្រើននាក់ត្រូវបានឃាត់ខ្លួនហើយ ក្រោយពីកា.ប់ និងវាយជនរងគ្រោះម្នាក់យ៉ាងសាហា.វ កាលពីថ្ងៃទី
ខេត្តតាកែវ ៖ បើតាមសេចក្តីរាយការណ៍បានឱ្យដឹងថា ដោយមានការចង្អុលបង្ហាញពីលោកសុខ សំណាង ស្នងការនគរបាលខេត្តតាកែវ និងមានការសម្របសម្រួលពីលោក ជីវ ចាន់តារា ព្រះរាជអាជ្ញាអមសាលាដំបូងខេត្ត ជនសង្ស័យម្នាក់ ក្នុងចំណោមបក្ខពួកជាច្រើននាក់ត្រូវបានឃាត់ខ្លួនហើយ ក្រោយពីកាប់ និងវាយជនរងគ្រោះម្នាក់យ៉ាងសាហាវ កាលពីថ្ងៃទី២៦ ខែឧសភា ឆ្នាំ២០២១ នៅក្នុងឃុំកំពែង ស្រុកព្រៃកប្បាស ខេត្តតាកែវ។
សេចក្តីរាយការណ៍បន្តថា ហេតុការណ៍ឃាត់ខ្លួនខាងលើបានធ្វើឡើងកាលពីថ្ងៃទី២៩ ខែឧសភា ឆ្នាំ២០២១ នៅចំណុចភូមិកំពុងព្រីង សង្កាត់សិត្បូ ក្រុងតាខ្មៅ ខេត្តកណ្តាល ហើយជនសង្ស័យខាងលើត្រូវបាននាំខ្លួនមកសាកសួរបន្តនៅអធិការដ្ឋាននគរបាលស្រុកព្រៃកប្បាស ដើម្បីស្វែងរកបក្ខពួកបន្តទៀត។
សេចក្តីរាយការណ៍បន្តទៀតថា ជនសង្ស័យដែលសមត្ថកិច្ចឃាត់ខ្លួនខាងលើនេះឈ្មោះ អ៊ាង សុខេង ភេទប្រុស អាយុ២៤ឆ្នាំ រស់នៅភូមិក្តាញ់ ឃុំក្តាញ់ ស្រុកព្រៃកប្បាស ខេត្តតាកែវ។
បើយោងតាមសម្តីលោកឡេង ប៊ុនឡុង អធិការស្រុកព្រៃកប្បាស បានអោយដឹងថា ជនសង្ស័យខាងលើ និងបក្ខពួកបានធ្វើសកម្មភាពហិ.ង្សាដោយមានស្ថានទម្ងន់ទោស កាលពីថ្ងៃទី១៦ ខែឧសភា វេលាម៉ោង១៧និង១០នាទី ចំណុចហាងកាហ្វេ១កន្លែង ស្ថិតនៅភូមិកំពែងត្បូង ឃុំកំពែង ស្រុកព្រៃកប្បាស ដោយបានធ្វើសកម្មភាពកាប់ និងវាយទៅលើជនរងគ្រោះឈ្មោះ សុខ ដារា ភេទប្រុស អាយុ១៩ឆ្នាំ ក្រោយធ្វើសកម្មភាពរួច ជនសង្ស័យនឹងគ្នីគ្នាក៏បាននាំគ្នារត់គេចខ្លួនបាត់។
លោកអធិការបន្តទៀតថា ដោយមានការយកចិត្តទុកដាក់ ខិតខំប្រឹងប្រែង និងមានកិច្ចសហការល្អរវាងសមត្ថកិច្ចខេត្តកណ្តាល ក៏ឈានដល់ការឃាត់ខ្លូនជនសង្ស័យបានម្នាក់ដែលជាជនដៃដល់យកមកផ្តន្ទាទោសតាមផ្លូវច្បាប់ ចំណែកបក្ខពួកដែលនៅសេសសល់ កម្លាំងរបស់លោកកំពុងសហកាបន្តតាមចាប់មកផ្តន្ទាទោសដូចគ្នា។
លោកឡេង ប៊ុនឡុងបានបញ្ជាក់ថា មូលហេតុដែលជនដសង្ស័យវាយទៅលើជនរងគ្រោះឈ្មោះ សុខ ដារា គឺកើតចេញពីការប្រច័ណ្ឌទៅលើនារីម្នាក់មានឈ្មោះថារី ដែលពីមុននាងគឺជាសង្សាររបស់ជនដៃដល់ ហើយក៏ស្រាប់តែបែកចិត្តមកលួចស្រលាញ់ជនរងគ្រោះ ទើបធ្វើអោយជនសង្ស័យខឹង ក៏នាំបក្ខពួកមកធ្វើសកម្មភាពកាប់ និងវាយជនរងគ្រោះតែម្ដងទៅ។ បច្ចុប្បន្នជនសង្ស័យរូបនេះកំពុងនាំខ្លួនទៅស្នងការដ្ឋាននគរបាលខេត្តតាកែវ ដើម្បីបន្តនីតិវិធីហើយ។
ចែករំលែកព័តមាននេះ