កំពត៖ ក្រុមគ្រួសារអ្នកស្លាប់ពុលស្រា នៅខេត្តកំពត ចំនួន ១០នាក់ បានទទួលអំណោយពីអភិបាលខេត្តកំពត កាលពីថ្ងៃទី២៥ ខែឧសភា ឆ្នាំ២០២១។
លោក ជាវ តាយ និងក្រុមការងារខេត្ត-ស្រុក បានទៅភូមិធ្នង់ ឃុំឬស្សីស្រុកខាងកើត ស្រុកកំពង់ត្រាច ដែលជាកន្លែងអ្នកស្រុក ពុលស្រា។ ក្រៅពីចូលរួមរំលែកទុក្ខក្រុមគ្រួសារសព លោកអភិបាលខេត្ត បានជំរុញអោយមន្ត្រីពាក់ពន្ធ័ ក៏ដូចជាអាជ្ញាធរមូលដ្ឋាន ជួយតាមដានប្រជាពលរដ្ឋ នៅក្នុងមូលដ្ឋាន អោយបានហ្មត់ចត់ ពិសេសអ្នក ដែលមិនទាន់ជាសះស្បើយពីករណីពុលស្រានេះ ដោយត្រូវរាយការ ឬក៏បញ្ជូនពួកគាត់ ប្រញាប់ទៅកាន់មន្ទីរពេទ្យ។
លោកអភិបាលខេត្ត លើកឡើងថា ការឧបត្ថម្ភដល់គ្រួសារសព ទាំង ១០នាក់ ដោយក្នុង ១គ្រួសារ ទទួលបានជំនួយពីសាខាកាកបាទក្រហមកម្ពុជា មានអង្ករចំនួន ៥០គីឡូក្រាម ទឹកបរិសុទ្ធ ២កេះ ទឹកក្រូច ២កេះ និងថវិការរបស់ឯកឧត្តមបណ្ឌិត ប៉ែន ស៊ីម៉ន តំណាងរាស្ត្រខេត្តកំពត ៥០ម៉ឺនរៀល និង ២០ម៉ឺនរៀលទៀត ជាថវិការបស់គណបក្សប្រជាជនកម្ពុជា ខេត្តកំពត។
បន្ទាប់ពីមានករណីពុលស្រា ដែលបានសម្លាប់មនុស្ស ១០នាក់ នៅក្នុងភូមិធ្នង់រួចមក នគរបាល បានឃាត់ខ្លួនមនុស្ស ២នាក់ កាលពីថ្ងៃទី២៤ ខែឧសភា។ ម្នាក់ឈ្មោះ គុយ សុខ ភេទស្រី និងម្នាក់ទៀត ឈ្មោះ ជ័យ សុផល ភេទប្រុស។ ពីរនាក់នេះ ត្រូវជាបងថ្លៃ និងប្អូនថ្លៃអ្នកបិតស្រា នៅភូមិរបងក្រាស ឃុំកំពង់ត្រាចខាងកើត ស្រុកកំពង់ត្រាច៕ កែវ ឆាត
ចែករំលែកព័តមាននេះ