រាជធានីភ្នំពេញ៖ អ្នកជំនាញនិងជាប្រធានសមាគមអ្នកចិញ្ចឹមសត្វកម្ពុជាមានការវាយតម្លៃថាក្នុងកាលៈទេសៈបច្ចុប្បន្ននេះ បើមានករណីផ្ទុះឬមានការឆ្លងជំងឺប៉េស្តជ្រូកអាហ្វ្រិកនៅកម្ពុជា នោះនឹងធ្វើឱ្យអ្នកចិញ្ចឹមជ្រូកលក្ខណៈខ្នាតតូចអាចដួលរំលំទាំងអស់ ស្របពេលដែលក្រសួងកសិកម្មបានស្នើរដ្ឋបាលខេត្តជាប់ព្រំដែនប្រទេសវៀតណាមជួយទប់ស្កាត់ការនាំចូលសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ពីប្រទេសវៀតណាម ដែលអាចបណ្តាលឱ្យឆ្លងរាលដាលជំងឺប៉េស្តជ្រូកអាហ្វ្រិកនៅក្នុងប្រទេសកម្ពុជា។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជាមានប្រសាសន៍ថា« បើតាមការប្រមើមើលរបស់ខ្ញុំ មួយសារនេះប្រជាកសិករ(អ្នកចិញ្ចឹមជ្រូកខ្នាតតូច)ត្រូវអស់ ក្នុងករណីបើមានការឆ្លងជំងឺប៉េស្តជ្រូកអាហ្វ្រិកមាននៅកម្ពុជា តែក្រុមហ៊ុនធំៗគេមានបទពិសោធន៍ មានដើមទុនគេធ្វើបែបអ៊ិនវែប បានសេចក្តីថា ជ្រូកដេកនៅកន្លែងម៉ាស៊ីនត្រជាក់ ហើយអ្នកមើលថែរនៅក្នុងទ្រុងជ្រូកក៏ត្រូវ ដេកនិងហូបនៅកន្លែងចិញ្ចឹមជ្រូក មិនអាចចេញពីទ្រុងជ្រូកនេះបានទេ។ដូច្នេះគេអាចរក្សានិងការពារសុវត្ថិភាពពីការឆ្លងជំងឺ ព្រោះវាធ្លាប់មានបទពិសោធន៍រួច អីចឹងលើកទី២នេះវាមិនធ្ងន់ធ្ងរដូចលើកទី១នោះទេ សម្រាប់កសិដ្ឋាននិងក្រុមហ៊ុន ។តែដោឡែកសិករយើងត្រូវដួលរលំ១០០%»។
លោកលើកឡើងថា នៅកន្លែងណាផ្សេងទៀត អាចរឹតបណ្តឹងបាន តែតាមខាងរៀតណាម រឹតបណ្តឹងអត់បានទេ។ហេតុអ្វីបានជាខ្ញុំថាអត់បាន? ព្រោះខ្ញុំធ្វើការលើដីវៀតណាម- កម្ពុជាអស់រយៈពេលជាង១០ឆ្នាំហើយ នេះគេហៅថារុនស្រមោច។ដូច្នេះបើយើងបន្ទោសទៅលើសមត្ថកិច្ចតាមព្រំដែនវាអត់បាន ព្រោះគាត់(ឈ្មួញ)ដឹកតាមម៉ូតូ ឬកង់មួយពីរក្បាល ហើយជ្រូកទាំងនោះជាជ្រូកដែលគេបោះចោល(មានជំងឺ)។
លោកសង្កត់ធ្ងន់ថា«ជំងឺប៉េស្តជ្រូកអាហ្វ្រិកនេះ បើកើតនៅកន្លែងគឺត្រូវសម្លាប់ជ្រូកទាំងនោះចោលទាំងអស់ មិនមែនឱ្យអ្នកឯងដឹកមកលក់អីចឹងទេ ហើយនៅត្រង់នេះមិនមែនសមត្ថកិច្ចយើងស៊ីលុយកាក់របស់គាត់ទេ នេះមកពីប្រជាជនខ្មែរយើងទៅទិញ ទៅដូរពីខាងគេមក ធ្វើឱ្យឆ្លងមេរោគពេញប្រទេស ទើបតែរើបពីជំងឺប៉េស្តជ្រូកអាហ្វ្រិកបានប៉ុន្មានឆ្នាំពីឆ្នាំ២០១៩ដល់ឆ្នាំ២០២១ តែឥលូវចង់ត្រលប់ទៅដំណាក់កាលឆ្នាំ២០១៩វិញទៀត»។
យោងតាមក្រសួងកសិកម្ម រុក្ខាប្រមាញ់និងនេសាទ ថា បច្ចុប្បន្នជំងឺប៉េស្តជ្រូកអាហ្វ្រិក កំពុងបន្តឆ្លងរាលដាលនៅក្នុងពិភពលោក និងបានឆ្លងរាលដាលចូលក្នុងប្រទេសអាស៊ី ក្នុងនោះមានប្រទេសចិន និងអាស៊ីអាគ្នេយ៍រួមាន ប្រទេសវៀតណាម មីយ៉ាន់ម៉ា និងប្រទេសកម្ពុជាផងដែរ។
ជំងឺប៉េស្តជ្រូកអាហ្វ្រិក បានផ្ទុះនៅក្នុងប្រទេសវៀតណាមលើកដំបូងស្ទើតែពាសពេញផ្ទៃប្រទេសនៅថ្ងៃទី១៩ កុម្ភៈឆ្នាំ២០១៩ និងបន្តផ្ទុះជារៀងរាល់ឆ្នាំ ហើយនៅថ្ងៃទី៤ ឧសភា ២០២១បានផ្ទុះនៅក្នុងប្រទេសវៀតណាមម្តងទៀតដែលអាចនឹងបន្តឆ្លងរាលដាលយ៉ាងឆាប់រហ័សដល់បណ្តាខេត្តដែលមានព្រំប្រទល់ជាប់ជាមួយប្រទេសកម្ពុជា រួមមានខេត្ត ដាក់ណុង ជាប់ខេត្តមណ្ឌលគិរី ,ខេត្តយ៉ាឡាយ ជាប់ខេត្តរតនគិរី, ខេត្តដុងថាប់ជាប់ខេត្តព្រៃវែង, ខេត្តកៀនយ៉ាង ជាប់ខេត្តកំពត, ខេត្តតៃនិញ ជាប់ខេត្តត្បូងឃ្មុំ និងខេត្តស្វាយរៀង , ខេត្តឡុងអានជាប់ខេត្តស្វាយរៀង, ខេត្តប៊ិញភូជាប់ខេត្តក្រចេះ និងខេត្តអានយ៉ាង ជាប់ខេត្តតាកែវ និងខេត្តកណ្តាល ដែលជាសញ្ញា ហានិភ័យខ្ពស់នៃការឆ្លងរាលដាលក្នុងលក្ខណៈទ្រង់ទ្រាយធំ និងធ្ងន់ធ្ងរដល់ព្រះរាជាណាចក្រកម្ពុជា ។
ក្រសួងកសិកម្មសង្កត់ធ្ងន់ថា«ដូច្នេះដើម្បីចូលរួមចំណែកក្នុងការទប់ស្តាត់ការឆ្លងរាលដាលនៃជំងឺនេះពីប្រទេសជិតខាងចូលមកព្រះរាជាណាចក្រកម្ពុជានិងបង្កាការខាតបង់យ៉ាងធ្ងន់ធ្ងរដល់សុខភាពអ្នកចិញ្ចឹមជ្រូក ព្រមទាំងធានាបាននូវគុណភាព សុវត្ថិភាពសត្វជ្រូក សាច់ជ្រូក ផលិតផលសាច់និងការពារដល់សុខភាពសាធារណៈនោះ ក្រសួងកសិកម្ម រុក្ខាប្រមាញ់និងនេសាទ ស្នើរដ្ឋបាលខេត្តជាប់ព្រំដែនប្រទេសវៀតណាមជួយទប់ស្កាត់ការនាំចូលសត្វជ្រូក សាច់ជ្រូក និងផលិតផលសាច់ជ្រូកខុសច្បាប់ពីប្រទេសវៀតណាម ដែលអាចបណ្តាលឱ្យឆ្លងរាលដាលជំងឺប៉េស្តជ្រូកអាហ្វ្រិកនៅក្នុងប្រទេសកម្ពុជា»៕
ចែករំលែកព័តមាននេះ