លទ្ធផលនៃការយកសំណាកលើកម្មករធ្វើការនៅរោងចក្រ ហឹរ៉ាយហ្សិន អៅដរ និងរោងចក្រ តិកហ្វុក នៅស្រុកកំពង់ត្រឡាច ចេញហើយ លទ្ធផលគឺវិជ្ជមានកូវីដ១៩ ចំនួន៨៦នាក់ ក្នុងនោះ
ខេត្តកំពង់ឆ្នាំង ៖ លទ្ធផលនៃការយកសំណាកលើកម្មករធ្វើការនៅរោងចក្រ ហឹរ៉ាយហ្សិន អៅដរ និងរោងចក្រ តិកហ្វុក នៅស្រុកកំពង់ត្រឡាច ចេញហើយ លទ្ធផលគឺវិជ្ជមានកូវីដ១៩ ចំនួន៨៦នាក់ ក្នុងនោះ (រោងចក្រ តិកហ្វុក មានចំនួន១នាក់ និងរោងចក្រ ហឹរ៉ាយហ្សិន អៅដរ មានចំនួន៨៥នាក់) ពិតជាគួរព្រួយបារម្ភក្រៃលែង ។ នេះបើយោងតាមសេចក្តីប្រកាសព័ត៌មានរបស់រដ្ឋបាលសាលាខេត្តកំពង់ឆ្នាំង ដែលទទួលបាននៅថ្ងៃទី២៣ ខែឧសភា ឆ្នាំ២០២១ នេះ ។
យោងតាមសេចក្តីប្រកាសព័ត៌មានរបស់រដ្ឋបាលសាលាខេត្តកំពង់ឆ្នាំង ដដែលបានបញ្ជាក់ថា រដ្ឋបាលសាលាខេត្តកំពង់ឆ្នាំង សូមជម្រាបជូនសាធារណជន និងប្រជាពលរដ្ឋនៅខេត្តកំពង់ឆ្នាំងឲ្យបានជ្រាបថា ករណីរាលដាលនៃជំងឺកូវីដ១៩ ព្រឹត្តិការណ៍សហគមន៍ 20កុម្ភៈ នៅថ្ងៃទី ២៣ ខែឧសភានេះ ខេត្តកំពង់ឆ្នាំង បានរកឃើញអ្នកវិជ្ជមានកូវីដ១៩ ចំនួន៨៦នាក់បន្ថែមទៀត ដែលជាកម្មករ បុគ្គលិកខ្មែរ និងបរទេសបម្រើការងារនៅរោងចក្រ ហឹរ៉ាយហ្សិន អៅដរ និងរោងចក្រ តឹកហ្វុក ដែលមានទីតាំងនៅភូមិផ្សារត្រាច និងភូមិលង្វែក ឃុំលង្វែក ស្រុកកំពង់ត្រឡាច ។
ក្នុងសេចក្តីប្រកាសរបស់រដ្ឋបាលសាលាខេត្តដដែល ក៏បានរាយនាមឈ្មោះ កម្មករ បុគ្គលិកទាំង៨៦នាក់ ដែលរកឃើញនៅថ្ងៃទី២៣ ខែឧសភា គឺច្រើនលើសលប់ ដែលធ្វើការនៅរោងចក្រ ហឹរ៉ាយហ្សិន អៅដរ និងមានចំនួនប្រមាណតែ២នាក់ប៉ុណ្ណោះដែលធ្វើការនៅរោងចក្រ តឹកហ្វុក។ ហើយអ្នកមានវិជ្ជមានទាំងនោះ ពួកគាត់មានទីលំនៅស្រុកកំពង់ត្រឡាច ស្រុកសាមគ្គីមានជ័យ ស្រុករលាប្អៀរ និងស្រុកទឹកផុស ខេត្តកំពង់ឆ្នាំង និងមានមកពីខេត្តកំពង់ស្ពឺ ខេត្តកណ្ដាល និងខេត្តកំពង់ចាមផងដែរ។
ក្នុងសេចក្តីប្រកាសព័ត៌មាន របស់រដ្ឋបាលសាលាខេត្តកំពង់ឆ្នាំង ក៏បានបញ្ជាក់ដែរថា អ្នកវិជ្ជមានកូវីដទាំង៨៦នាក់ បានយកទៅដាក់ឲ្យព្យាបាលនៅមណ្ឌលព្យាបាលវិទ្យាល័យ ហ៊ុនសែន កំពង់ត្រឡាច និងសម្រាកព្យាបាលនៅអគាររោងចក្រ ហឹរ៉ាយហ្សិនអៅដរ។
ជាមួយគ្នានេះដែរ រដ្ឋបាលសាលាខេត្តក៏បានអំពាវនាវដល់ប្រជាពលរដ្ឋដែលប្រាស្រ័យទាក់ទងដោយផ្ទាល់ និងប្រយោល ជាមួយអ្នកមានវិជ្ជមានកូវីដ១៩ ដូចបានរាយនាមឈ្មោះនេះ ក្នុងអំឡុងពេល១៤ថ្ងៃត្រូវប្រញាប់ទៅយកសំណាកជាបន្ទាន់នៅមន្ទីរពេទ្យបង្អែកស្រុកកំពង់ត្រឡាច និងមណ្ឌលសុខភាព ដែលនៅជិតផ្ទះបំផុត ដើម្បីទប់ស្កាត់ការរីករាលដាល នៃជំងឺកូវីដ១៩ ។
គួររំលឹកដែរថា រោងចក្រ ហឹរ៉ាយហ្សិន អៅដរ ដែលមានកម្មករ បុគ្គលិកចំនួន៨៥០០ (៨ពាន់៥រយ) នាក់ ត្រូវបានបិទទ្វារកាលពីថ្ងៃទី២២ ខែឧសភា បន្ទាប់ពីរកឃើញវិជ្ជមានកូវីដ១៩យ៉ាងច្រើនសន្ធឹកសន្ធាប់កាល់ថ្ងៃទី២១ ខែឧសភា កន្លងទៅនេះ៕
ចែករំលែកព័តមាននេះ