ប្រជាពលរដ្ឋរស់នៅភូមិចម្ការបី ភ្នំវល្លិរ ខេត្តកែប ក្នុងខែមេសា និងខែឧសភា ឆ្នាំ២០២១នេះ បានដឹកផ្លែស្វាយរាប់តោនយកមកចាក់ចោលក្នុងដីចម្ការស្វាយមួយកន្លែងនៅជិតផ្ទះស្នាក់នៅរបស់ឈ្មួញ
ខេត្តកំពត ៖ បើតាមសេចក្តីរាយការណ៍បានឱ្យដឹងថា ប្រជាពលរដ្ឋរស់នៅភូមិចម្ការបី ភ្នំវល្លិរ ខេត្តកែប ក្នុងខែមេសា និងខែឧសភា ឆ្នាំ២០២១នេះ បានដឹកផ្លែស្វាយរាប់តោនយកមកចាក់ចោលក្នុងដីចម្ការស្វាយមួយកន្លែងនៅជិតផ្ទះស្នាក់នៅរបស់ឈ្មួញទិញស្វាយតែម្តង ដែលស្ថិតនៅក្នុងភូមិចំការបី ឃុំពងទឹក ស្រុកដំណាក់ចង្អើរ ខេត្តកែប។
បើតាមការអោយដឹងពីពលរដ្ឋនៅភូមិចំការបី បាននិយាយថា ស្វាយប្រជាពលរដ្ឋនៅក្នុងភូមិចំការបី ម្នាក់ៗកំពុងតែទុកចោលដោយគ្មានទីផ្សារ ហើយពលរដ្ឋខ្លះទៀតក៏បានដឹកយកទៅលក់អោយឈ្មួញទិញ ដឹកទៅកាន់ខេត្តព្រះសីហនុ តែមិនត្រូវប៉ាន់ ទើបពួកគាត់មិនដឹកយកទៅផ្ទះវិញទេ ក៏ដឹកតាមគោយន្តមកចាក់ចោលក្នុងចំការស្វាយនេះតែម្ដង។
ពលរដ្ឋរូបនោះបាននិយាយប្រាប់បន្តថា នៅចំការបី ភ្នំវល្លិរ មានឈ្មួញម្នាក់ចាំទទួលទិញដែរ តែផ្លែស្វាយក្នុង១គីឡូតម្លៃតែ២០០រៀលតែប៉ុណ្ណោះ ជួនពេលខ្លះគេមិនទិញក៏មានដែរ។
ចំណែកឯថៅកែដែលចាំទិញស្វាយពីប្រជាពលរដ្ឋនៅចំការបី បាននិយាយប្រាប់អោយដឹងថា កាលពីមុនផ្លែស្វាយមានតម្លៃគួរសមដែរ ប៉ុន្តែក្រោយមកដឹកយកទៅលក់នៅខេត្តព្រះសីហនុ គេឈប់ទិញដូច្នេះបើគាត់ទិញពីពលរដ្ឋក៏មិនដឹងថាយកទៅលក់នៅទីណាដែរ ទើបមានការចោលផ្លែស្វាយច្រើនបែបនេះ។
ចំណែកលោកប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តកែប ក៏បាននិយាយប្រាប់តាមទូរស័ព្ទអោយដឹងនៅព្រឹកថ្ងៃទី២០ ខែឧសភា ឆ្នាំ២០២១នេះដែរថា មន្ទីរកសិកម្មខេត្ត កំពុងតែប្រជុំមន្ត្រីជនាញមកពីស្ថាប័នផ្សេងៗ ដើម្បីស្វែងរកដៃគូជួយទិញផ្លែស្វាយពីប្រជាពលរដ្ឋនៅភូមិចំការបីហើយ។
លោកប្រធានមន្ទីរកសិកម្មបាននិយាយថា កន្លងមក រកអ្នកទិញស្វាយអោយប្រាកដប្រជាវាអត់ ទើបមានការពិបាក។ ទោះបីជាបែបណា ផ្លែស្វាយដែលពលរដ្ឋប្រមូលផលបានហើយ គឺលំបាករកទីផ្សារតែម្ដង ក្នុងនោះក៏មានម្រេចផងដែរ ដែលមិនមានទីផ្សារធ្វើចរាចរណ៍ឡើយ។
ចែករំលែកព័តមាននេះ