សូមកុំប្រៀបធៀបជីវិតខ្លួនឯងទៅនឹងជីវិតអ្នកដទៃ គេរស់នៅតាមជីវិតគេ យើងរស់នៅតាមជីវិតយើង គេដើរតាមផ្លូវរបស់គេ យើងដើរតាមគន្លងផ្លូវរបស់យើងធ្វើយ៉ាងណាដើម្បីសេចក្តីសុខសុភមង្គលនៃជីវិតរៀងៗខ្លួន ដូច្នេះសេចក្ដីសុខរបស់យើងមិនចាំបាច់មានអ្វីៗដូចអ្នកដទៃឡើយ គឺយើងសុខក្នុងផ្លូវនៃជីវិតរបស់យើងមានជាអាទិ៍ដូចជា៖
សុខព្រោះមានសន្ដោស, សុខព្រោះមានមិត្តល្អ, សុខព្រោះមានបុណ្យបានធ្វើហើយ, សុខព្រោះបានលះបង់នូវសេចក្ដីទុក្ខ, សុខព្រោះបានប្រណិប័តន៍មាតាបិតា, សុខព្រោះបានទំនុកបម្រុងព្រះសង្ឃ, សុខព្រោះមានសទ្ធាតាំងមាំហើយ, សុខព្រោះមានសីលល្អ, សុខព្រោះបានចម្រើនបញ្ញា និងសុខព្រោះការមិនធ្វើបាប ។
ហេតុនេះចូរកុំយកជីវិតខ្លួនទៅប្រៀបធៀបនឹងអ្នកដទៃឱ្យកើតទុក្ខនោះឡើយ អ្នកណារស់បានយ៉ាងដូចម្ដេច ឱ្យគេរស់តាមហេតុ តាមបច្ច័យរបស់គេទៅ ដូចដើមដូង រស់តាមដើមដូង, ឯដើមត្នោត ក៏រស់នៅតាមត្នោតទៅ យ៉ាងណាមិញជីវិតយើងក៏ត្រូវរស់នៅតាមជីវិតធម្មជាតិរបស់ខ្លួនដែរចុះ ។
សំខាន់គឺចិត្តស្ងប់សុខ មានជីវិតរស់នៅដោយបញ្ញា សិក្សាធម្មតាធម៌តាមមានតាមបាន មិនលោភលន់លើសលប់ហួសប្រមាណនោះឡើយ ៕ សាន សារិន
ចែករំលែកព័តមាននេះ