ក្រុមអ្នកស្រាវជ្រាវបានអះអាងថា ផឹកតែយ៉ាងហោច៣ពែងក្នុងមួយថ្ងៃអាចជួយរក្សាធ្មេញឱ្យមានសុខភាពល្អ កាត់បន្ថយអត្រាកើតជំងឺពុកធ្មេញ និងជំងឺអញ្ចាញធ្មេញ ។
តាមលទ្ធផលនៃការសិក្សាមួយចំនួនកន្លងមកបានបង្ហាញថា តែមានសមត្ថភាពប្រឆាំងនឹងបាក់តេរីពីរប្រភេទគឺ Streptoccus mutans និង Lactobacillus ។ បាក់តេរីទាំងពីរប្រភេទនេះហើយដែលបង្កឱ្យមានជំងឺអញ្ចាញធ្មេញ និងធ្មេញពុកនាំឲ្យឈឺចុកចាប់ខ្ទោកក្បាល ។
បើតាមលោកស្ត្រីវេជ្ជបណ្ឌិត Carrie Ruxton អ្នកដឹកនាំការស្រាវជ្រាវបានឱ្យដឹងថា កម្រិត «តែ» ដែលមានកម្លាំងប្រឆាំងបាក់តេរីទាំង២ខាងលើគឺចន្លោះពី៣ទៅ៤ពែងក្នុងមួយថ្ងៃ ។ លោកស្រីបាននិយាយថា ភស្តុតាងបញ្ជាក់យ៉ាងជាក់ច្បាស់ពីប្រសិទ្ធភាពរបស់«តែ» គឺថាផឹកចន្លោះពី៣ទៅ៤ពែងក្នុងមួយថ្ងៃធ្វើឱ្យបាក់តេរីនៅក្នុងមាត់ថយចុះ ។ លោកស្រីបានបញ្ជាក់ថា «លទ្ធផលនេះខ្ញុំជឿថា នឹងទទួលបានការស្វាគមន៍ពីបណ្តាទន្តពេទ្យក៏ដូចជាក្រុមអនាម័យមាត់ធ្មេញខណៈដែលពួកគេទាំងនេះកំពុងបន្តអប់រំប្រជាជនឱ្យយល់ដឹងពីការថែទាំមាត់ធ្មេញ» ។ លោកស្រីវេជ្ជបណ្ឌិតបានបន្តថា នៅពេលដែលបាក់តេរីក្នុងមាត់មានប្រតិកម្មនឹងសារធាតុ Carbohydrates (ប្រភពផ្តល់ថាមពលមានក្នុងអាហារ ដូចជា បាយ នំប៉័ង….) វាក៏ផលិតសារធាតុអាស៊ីដ បំផ្លាញដល់អញ្ចាញធ្មេញ ហើយចុងក្រោយនាំទៅរកការដាក់ធ្មេញ ឬដកធ្មេញ ។
«តែ» ត្រូវគេរកឃើញថា មានផ្ទុកសមាសធាតុប្រឆាំងអុកស៊ីដកម្ម២ប្រភេទគឺ flavonoids និង Catechins ។ អុកស៊ីដកម្មទាំងពីរប្រភេទនេះ ជាសមាសធាតុប្រភេទ tannin (សមាសធាតុគីមីនៅក្នុងស្លឹកឈើ ឬសម្បកឈើ និងផ្លែឈើដែលមិនទាន់ទុំ) មានប្រសិទ្ធភាពប្រឆាំងនឹងអតិសុខុមប្រាណដ៏ក្រៃលែង ៕
ចែករំលែកព័តមាននេះ