ខេត្តកំពង់ចាម ៖ ស្ត្រីជាកម្មការិនីរោងចក្រមានស្រុកកំណើតនៅឃុំរាយប៉ាយ ស្រុកកង់មាស ដែលមានផ្ទៃពោះជិតគ្រប់ខែ នឹងបានសម្រាលកូននៅក្នុងមន្ទីរពេទ្យមេគង្គកំពង់ចាម នាយយប់ថ្ងៃទី១០ ខែឧសភា ២០២១ ដោយក្រោមការយកចិត្តទុកដាក់ពីសំណាក់ក្រុមឆ្មប…
ខេត្តកំពង់ចាម ៖ ស្ត្រីជាកម្មការិនីរោងចក្រមានស្រុកកំណើតនៅឃុំរាយប៉ាយ ស្រុកកង់មាស ដែលមានផ្ទៃពោះជិតគ្រប់ខែ នឹងបានសម្រាលកូននៅក្នុងមន្ទីរពេទ្យមេគង្គកំពង់ចាម នាយយប់ថ្ងៃទី១០ ខែឧសភា ២០២១ ដោយក្រោមការយកចិត្តទុកដាក់ពីសំណាក់ក្រុមឆ្មប ធ្វើឱ្យម្ដាយ និងកូនមានសុខភាពល្អផងដែរ។ សូមបញ្ជាក់ថា នេះគឺជាស្ត្រីទីមួយ ដែលបានរកឃើញវិជ្ជមានកូវីដ-១៩ សម្រាលកូននៅក្នុងមន្ទីរពេទ្យ។
តាមប្រភពព័ត៌មាននៅមូលដ្ឋានឱ្យដឹងថា ស្ត្រីកម្មការិនីរូបនោះ បម្រើការងារនៅរោងចក្រមួយកន្លែងនៅម្ដុំទួលសង្កែ ក្នុងខណ្ឌឬស្សីកែវ រាជធានីភ្នំពេញ ដោយមានផ្ទៃពោះជិតគ្រប់ខែក៏បានធ្វើដំណើរមកកាន់ស្រុកកំណើតនៅឃុំរាយប៉ាយ ស្រុកកងមាស ដោយស្នាក់នៅបានរយៈពេលចំនួន១០ថ្ងៃមកហើយ។
ប្រភពដដែលបានបន្តឱ្យដឹងទៀតថា លុះមកដល់យប់ថ្ងៃទី១០ ខែឧសភា ២០២១ ស្ត្រីរូបនោះបានឈឺពោះ ហើយត្រូវក្រុមសាច់ញាតិបញ្ជូនមកកាន់មន្ទីរពេទ្យខេត្តកំពង់ចាម នៅវេលាម៉ោងជាង៩យប់ ។
ក្រោយពីបានសួរនាំ ត្រូវបានស្ត្រីនោះឆ្លើយថា មកពីម្ដុំទួលសង្កែ ដោយមានការសង្ស័យក្រុមគ្រូពេទ្យបានធ្វើតេស្តដោយឧបករណ៍រហ័ស ក៏ស្រាប់តែឃើញវិជ្ជមានកូវីដ-១៩។ ហើយក្រុមគ្រូពេទ្យក៏បានបញ្ជូនមកឲ្យសម្រាកនៅមន្ទីរពេទ្យមេគង្គកំពង់ចាម ដែលទើបនឹងជួសជុលរួចរាល់ មានទីតាំងស្ថិតនៅមាត់ទន្លេ ក្នុងសង្កាត់កំពង់ចាម ក្រុងកំពង់ចាម។
ក្រោមការដឹកនាំ និងចង្អុលបង្ហាញពីសំណាក់ ឯកឧត្តម អ៊ុន ចាន់ដា គណៈអភិបាលនៃអភិបាលខេត្តកំពង់ចាម និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ១៩ ឯកឧត្តម គឹមសួរ ភិរុណ ប្រធានមន្ទីរសុខាភិបាលខេត្ត ក្រុមគ្រូពេទ្យ និងឆ្មបជំនាញ នៃមន្ទីរពេទ្យខេត្តកំពង់ចាម បានថែទាំ និងជួយសម្រាលកូនជូនស្ត្រីវិជ្ជមាន COVID-19 យ៉ាងយកចិត្តទុកដាក់បំផុត និងមានសុវត្ថិភាពទាំងម្តាយ ទាំងកូននៅមន្ទីរពេទ្យមេគង្គកំពង់ចាម នាយប់ថ្ងៃដដែល១០ ឧសភា នោះ។ ជាមួយនោះ ក្រុមគ្រូពេទ្យបានលើកឡើងថា សូមបន្តអនុវត្តវិធានការសុខាភិបាល ៣ការពារ និង ៣កុំ បន្តទៀត ដើម្បីសុខមាលភាព ប្រជាពលរដ្ឋយើង និងសង្គមជាតិយើង។
ដោយឡែកលោកភោគ សាវុធ អភិបាលស្រុកកងមាសវិញ ប្រាប់ឱ្យដឹងដែលថា ក្រោយពីទទួលបាននូវព័ត៌មាននេះ អាជ្ញាធរមូលដ្ឋាន ដោយទទួលបានការណែនាំពីសំណាក់ឯកឧត្តមអភិបាលខេត្ត បានចុះទៅកាន់ឃុំរាយប៉ាយ ស្រុកកងមាស ដើម្បីបន្តចុះស្រាវជ្រាវរកអ្នកប៉ះពាល់ដោយផ្ទាល់ និងប្រយោលជាមួយនឹងស្ត្រីមានផ្ទៃពោះដែលត្រូវរកឃើញវិជ្ជមានកូវីដ១៩ ដើម្បីធ្វើចត្តាឡីស័ករយៈពេល១៤ថ្ងៃ ធ្វើយ៉ាងណាកុំឲ្យជំងឺនេះ ឆ្លងចូលក្នុងសហគមន៍៕
ចែករំលែកព័តមាននេះ