ខេត្តកំពត ៖ បើតាមសេចក្តីរាយការណ៍បានឱ្យដឹងថា រដ្ឋបាលសាលាឃុំកំពង់ត្រាចខាងលិច ស្រុកកំពង់ត្រាច បានប្រជុំបង្កើតអនុគណៈកម្មាធិការបន្ទាន់មួយ កាលពីព្រឹកថ្ងៃទី៩ ខែឧសភា ឆ្នាំ២០២១ ។ ដោយមានលោក ជួន សុភា អភិបាលរងស្រុកកំពង់ត្រាច បានចុះមកជួយពង្រឹង និងធ្វើការអប់រំតាមគោលការណ៍របស់ក្រសួងសុខាភិបាល និងតាមការណែនាំរបស់ប្រមុខរាជរដ្ឋាភិបាល ដោយមើលឃើញថា ឃុំកំពង់ត្រាចមួយនេះ កំពុងធ្លាក់យ៉ាងធ្ងន់ធ្ងរបំផុត ដែលមានពលរដ្ឋចំនួន១០នាក់ត្រូវបានគ្រូពេទ្យយកសំណាកធ្វើតេស្ត រកឃើញថា អ្នកឆ្លងជំងឺកូវីដ១៩ ដែលអ្នកចូលរួមបុណ្យស.ពមានចំនួន១០នាក់ហើយ ចាប់តាំងពីថ្ងៃទី១ ដល់ថ្ងៃទី៦ ខែឧសភា ឆ្នាំ២០២១ នេះ។
ប៉ុន្តែរដ្ឋបាលខេត្តកំពត ក៏បានចេញសេចក្ដីជូនដំណឹងជាផ្លូវការ កាលពីថ្ងៃទី៨ ខែឧសភា ឆ្នាំ២០២១ ជាផ្លូវការថា ប្រជាពលរដ្ឋនៅក្នុងស្រុកកំពង់ត្រាច ត្រូវមានការប្រុងប្រយ័ត្នខ្ពស់ ព្រោះថា ករណីរកឃើញអ្នកឆ្លងដែលបានចូលរួមបុណ្យស.ពរបស់បុរសជាប្ដីរបស់ស្ត្រី ឯម បុប្ជា រស់នៅភូមិដើមចារ ឃុំកំពង់ត្រាចខាងលិច ស្រុកកំពង់ត្រាចនេះ មានចំនួន៦នាក់បន្ថែមទៀត ក្រោយពីរកឃើញដោយក្រុមគ្រូពេទ្យខេត្តកំពត សហការជាមួយគ្រូពេទ្យស្រុកកំពង់ត្រាច និងអាជ្ញាធរស្រុក និងឃុំផងដែរ។
លោក ចេង តាន់ មេឃុំកំពង់ត្រាច បានប្រាប់អ្នកយកព័ត៌មានអោយដឹងកាលពីព្រឹកថ្ងៃទី៩ ខែឧសភានេះថា ករណីអ្នកចូលរួមបុណ្យស.ពបុរសជាប្ដីរបស់ស្ត្រី ឯម បុប្ផា រស់នៅក្នុងភូមិដើមចារ កាលពីថ្ងៃទី២៥ ខែមេសា ឆ្នាំ២០២១ដែលរកឃើញកូវីដនោះ គឺដំបូងបុរសជាប្ដីមានជំងឺដោយគោជល់ទេ ហើយប៉ះពាល់ដល់ថ្លើម ដោយមានរបួសគ្រាំគ្រាបែបនេះ ហើយស្ត្រីឈ្មោះ ឯម បុប្ផា ត្រូវជាប្រពន្ធ បានាំប្ដីទៅព្យាបាលនៅឯមន្ទីរពេទ្យលោកសង្ឃ នៅរាជធានីភ្នំពេញ។ តែរបួសបុរសជាប្ដីមិនធូរស្រាល ក៏ដឹកប្ដីមកកាន់ភូមិដើមចារវិញហើយដឹកបុរសជាប្ដីនៅកាន់មន្ទីរបង្អែកខេត្តកំពត កាលពីថ្ងៃទី២០ ខែមេសា តែជាអកុសលនៅថ្ងៃទី២៥ ខែមេសា បុរសជាប្ដីក៏បានស្លា.ប់តែម្តង។
លោកមេឃុំកំពង់ត្រាច បន្តថា លុះចប់ពិធីបុណ្យស.ពប្ដី ស្ត្រីឈ្មោះ ឯម បុប្ផា ដែលត្រូវជាប្រពន្ធក៏មានអាការៈឈឺ ក្អក ក្ដៅខ្លួន គួរឱ្យសង្យ័យ ទើបក្រុមគ្រូពេទ្យយកសំណាកទៅពិនិត្យ ក៏ស្រាប់តែឃើញវិជ្ជមានកូវីដ១៩តែម្តង ។ ក្រោយមកអ្នកចូលរួមបុណ្យស.ពក៏ត្រូវគ្រូពេទ្យចុះមកធ្វើតេស្តដល់មូលដ្ឋានចាប់តាំងពីថ្ងៃទី១ ខែឧសភា រហូតដល់ថ្ងៃទី៨ ខែឧសភា ឆ្នាំ២០២១នេះ ក៏រកឃើញវិជ្ជមានកូវីដ១៩ទៅលើអ្នកចូលរួមបុណ្យស.ពមានចំនួន១០នាក់ហើយ ប៉ុន្តែការរកឃើញអ្នកឆ្លងកូវីដ១៩ បន្ថែម៤នាក់ផ្សេងទៀតមិនទាន់ប្រកាសជាផ្លូវការទេ។
លោក ជួន សុភា អភិបាលរងស្រុកកំពង់ត្រាច បាននិយាយប្រាប់អោយដឹងកាលពីព្រឹកថ្ងៃអាទិត្យថាចំនួនអ្នកឆ្លងកូវីដ១៩ ទៅលើអ្នកចូលរួមក្នុងពីធីបុណ្យស.ព អាចមានចំនួនកើនច្រើនគួរឱ្យព្រួយបារម្ភ។
លោក ជួន សុភា អភិបាលរងស្រុកក៏បានថ្លែងប្រាប់អាជ្ញាធរមូលដ្ឋានក្នុងកិច្ចប្រជុំបន្ទាន់កាលពីព្រឹកថ្ងៃអាទិត្យនេះថា អាជ្ញាធរស្រុក និងឃុំ ឱ្យមានការផ្សព្វផ្សាយឱ្យទូលាយដល់ពលរដ្ឋរស់នៅក្នុងមូលដ្ឋានរបស់ខ្លួន ជាពិសេសអ្នកពាក់ព័ន្ធចូលរួមបុណ្យស.ពបុរសជាប្ដីរបស់ស្ត្រី ឯម បុប្ផា ដែលគ្រូពេទ្យបានរកឃើញថា មានវិជ្ជមានកូវីដ១៩ ហើយពេលនេះកំពុងសម្រាកព្យាបាលនៅមន្ទីរពេទ្យបង្អែកស្រុកកំពង់ត្រាច។
លោក ជួន សុភា អភិបាលរងស្រុកកំពង់ត្រាច ក៏បានប្រាប់អោយដឹងថា អាជ្ញាធរមូលដ្ឋានកំពុងបន្តស្រាវជ្រាវអ្នកចូលរួមបុណ្យស.ពនៅភូមិចារ មកធ្វើតេស្តបន្ដ ដើម្បីការពារមិនអោយរីករាលដាលទៅមនុស្សផ្សេងទៀត។
ចែករំលែកព័តមាននេះ