អែកតាមការសិក្សាបានបង្ហាញថា បុរសវ័យកណ្តាលដែលទទួលទានរបបអាហារសម្បូរដោយសាច់ និងភេសជ្ជៈផ្អែមដោយស្ករប្រឈមខ្ពស់នឹងជំងឺធ្លាក់ទឹកចិត្ត ។ ទោះជាយ៉ាងណា ក្រុមអ្នកស្រាវជ្រាវបានអះអាងថា គេអាចទប់ស្កាត់ជំងឺនេះបាន ដោយគ្រាន់តែទទួលទានបន្លែ និងផ្លែឈើឱ្យបានច្រើន ។
ការសិក្សាលើបុរសអង់គ្លេសជាង២ពាន់នាក់បានបង្ហាញថា អ្នកដែលទទួលទានរបបអាហារសម្បូរដោយបន្លែ-ផ្លែឈើ គួបផ្សំនឹងការហាត់ប្រាណបញ្ចុះទម្ងន់ខ្លួនបន្តិចផងនោះ គឺអាចធ្វើឱ្យល្អប្រសើរច្រើនដល់សុខភាពផ្លូវចិត្ត ។ អំឡុងការពិសោធរយៈពេល១៣ឆ្នាំ គេបានរកឃើញថា អ្នកដែលបានទទួលទានបន្លែច្រើនបំផុត បូករួមផ្លែឈើ គ្រាប់ធញ្ញជាតិ សាច់មាន់ សាច់ត្រី និងបណ្តាអាហារមានជាតិខ្លាញ់តិចនឹងទទួលរងគ្រោះពីរោគសញ្ញាខាងលើតិចតួច ខណៈហានិភ័យក៏មានការថយចុះ ។
អ្នកឯកទេសខាងអាហារូបត្ថម្ភសាកល វិទ្យាល័យហ្វាំងឡង់ភាគខាងកើត ( University of Eastern Finland) លោក Anu Ruusunen បានថ្លែងថា ការសិក្សានេះបានពង្រឹងសម្មតិកម្មរបបអាហារដែលផ្តល់នូវសុខភាពថាវាមានសក្តានុពលមិនត្រឹមតែក្នុងការការពារជំងឺធ្លាក់ទឹកចិត្តប៉ុណ្ណោះទេ ប៉ុន្តែក៏មានសក្តានុពលនៅក្នុងការទប់ស្កាត់ជំងឺផ្សេងទៀតផងដែរ ។
បណ្តាអ្នកជំងឺធ្លាក់ទឹកចិត្តជាញឹកញាប់បរិភោគអាហារដែលមានសារធាតុចិញ្ចឹមរាងកាយតិចតួច ប៉ុន្តែវាមិនច្បាស់ទេថា តើរបបអាហារ បែបនេះត្រូវបានផ្សារភ្ជាប់ទៅនឹងអត្រាប្រឈមនឹងគ្រោះថ្នាក់សម្រាប់មនុស្សដែលមានសុខភាពល្អ ឬយ៉ាងណា ?
ជំងឺធ្លាក់ទឹកចិត្តគឺជាផ្នែកមួយនៃបញ្ហាប្រឈមនឹងសុខភាពឈានមុខគេនៅក្នុងពិភពលោក ហើយផលប៉ះពាល់របស់វាធ្លាក់ទៅលើសុខភាពសាធារណៈ សេដ្ឋកិច្ច និងគុណភាពនៃជីវិត គឺពិតជាមានធំធេងខ្លាំងណាស់ ។
អ្នកមានវិបត្តិជំងឺធ្លាក់ទឹកចិត្តចាំបាច់តម្រូវឲ្យការព្យាបាលដោយវិធីសាស្ត្រថ្មីផងដែរ។ លើសពីនេះ របបអាហារ និងបែបបទរស់នៅប្រកបដោយផាសុកភាព គឺជាចំណុចដែលត្រូវអនុវត្តចាំបាច់បន្ថែមទៀត ៕
ចែករំលែកព័តមាននេះ