ខេត្តឧត្តរមានជ័យ ៖ បើតាមសេចក្តីរាយការណ៍បានឱ្យដឹងថា មនុស្សប្រុសស្រី ចាស់ក្មេងមួយគ្រួសារចំនួន៥នាក់ បានហូបនំប៉័ង បណ្តាលឱ្យពុលនំប៉័ង ហើយក៏ត្រូវបាននាំយកមកធ្វើការសង្គ្រោះនៅក្នុងមន្ទីរពេទ្យបង្អែកស្រុកអន្លង់វែង ហេតុការណ៍នេះកើតឡើងកាលពីវេលាម៉ោង១២និង២០នាទីរសៀល នាថ្ងៃទី៤ ខែឧសភា ឆ្នាំ២០២១ ស្ថិតក្នុងភូមិអូរតាមេង ឃុំអន្លង់វែង ស្រុកអន្លង់វែង។
សេចក្តីរាយការណ៍បានឱ្យដឹងថា ប្រជាពលរដ្ឋប្រុសស្រី ចាស់ក្មេងចំនួន៥នាក់ដែលហូបនំប៉័ងពុលនោះមាន ១-ឈ្មោះ មេត មៀន ភេទប្រុស អាយុ៤៦ឆ្នាំ (ត្រូវជាប្តី) ២-ឈ្មោះ មៀន ផាលីដា ភេទស្រី អាយុ១១ឆ្នាំ (កូន) ៣-ឈ្មោះ មៀន ផាវីន អាយុ១៧ឆ្នាំ (កូន) ៤-ឈ្មោះ អ៊ាង សុខឡា ភេទប្រុស អាយុ៧ឆ្នាំ (កូន) និងម្នាក់ទៀត ៥-ឈ្មោះ ផាន ភា ភេទស្រី អាយុ៤០ឆ្នាំ (កូន) ជនរងគ្រោះទាំង៥នាក់រស់នៅក្នុងភូមិ-ឃុំកើតហេតុខាងលើ។
ទាក់ទិននឹងហេតុការណ៍ហូបនំប៉័ងពុលខាងលើនេះ បើតាមស្ត្រីម្នាក់ឈ្មោះ នីន ដានី អាយុ៤០ឆ្នាំ ត្រូវជាប្រពន្ធជនរងគ្រោះ បានរៀបរាប់ឱ្យដឹងថា មុនពេលកើតហេតុ រូបខ្លួនបានធ្វើដំណើរមកផ្សារ ក្នុងទីប្រជុំជនស្រុកអន្លង់វែង ហើយក៏បានប្រទះឃើញគេដឹកនំប៉័ងលក់តាមម៉ូតូ ។ ពេលនោះខ្លួនបានទិញនំប៉័ងចំនួន៥ដើម ដើម្បីយកផ្ញើមកកូនៗ កាលពីវេលាម៉ោង១២និង២០នាទីរសៀល ថ្ងៃទី៤ ខែឧសភា ឆ្នាំ២០២១។
ស្ត្រីរូបនេះបន្តថា ខណៈពេលទៅដល់ផ្ទះ រូបគាត់ក៏ចែកកូនៗម្នាក់១ហូប លុះដល់វេលាម៉ោង៤ល្ងាចក្នុងថ្ងៃដដែល ក៏ស្រាប់តែមានអាការៈមិនស្រួល ធ្វើទុក្ខឈឺក្បាល ក្អួតចង្អោ រាករូស ហើយក៏ត្រូវបានកងកម្លាំងអាវុធហត្ថស្រុកបញ្ជូនយកមកធ្វើការសង្គ្រោះនៅក្នុងមន្ទីរពេទ្យបង្អែកស្រុកអន្លង់វែងតែម្តង។
បើតាមលោក នៅ សំអន ប្រធានមន្ទីរពេទ្យបង្អែកស្រុកអន្លង់វែង បានឱ្យដឹងថា ប្រជាពលរដ្ឋប្រុសស្រីចាស់ និងក្មេង ដែលហូបនំប៉័ងពុលនេះ ក្រុមគ្រូពេទ្យបានធ្វើការសង្គ្រោះ ហើយរហូតមកពេលនេះគឺជនរងគ្រោះបានធូរស្រាលអស់ហើយ ដោយមិនមានគ្រោះថ្នាក់ដល់អាយុជីវិតនោះទេ៕
ចែករំលែកព័តមាននេះ