រាជធានីភ្នំពេញ ៖ លោកវេជ្ជបណ្ឌិត ហុក គឹមចេង អគ្គនាយកបច្ចេកទេស នៃក្រសួងសុខាភិបាល បានបញ្ជាក់ថា មូលហេតុដែលធ្វើឲ្យតួលេខ នៃចំនួនឆ្លងមានការកើនឡើង…
រាជធានីភ្នំពេញ ៖ លោកវេជ្ជបណ្ឌិត ហុក គឹមចេង អគ្គនាយកបច្ចេកទេស នៃក្រសួងសុខាភិបាល បានបញ្ជាក់ថា មូលហេតុដែលធ្វើឲ្យតួលេខ នៃចំនួនឆ្លងមានការកើនឡើង គឺដោយសារប្រើ តេស្តេរហ័ស SARS-CoV-2 Rapid Antigen Test ដើម្បីពិនិត្យរកអង់ទីហ្សែនមេរោគកូវីដ-១៩ ទៅលើអ្នកសង្ស័យ នេះបើតាមប្រភពពីទូរទស្សន៍ជាតិកម្ពុជា (ទទក) ចេញផ្សាយនៅថ្ងៃទី០៤ ឧសភា ២០២១នេះ ។
លោក ហុក គឹមចេង អោយដឹងថា តេស្តេរហ័ស វាមានសមត្ថភាពអាចរកឃើញអ្នកមានវិជ្ជមាន ឫអវិជ្ជមាន លទ្ធផលនឹងឃើញភ្លាមៗ ដោយប្រើរយៈពេល ១៥នាទី បន្ទាប់ពីយកសំណាករួច និងបានបញ្ជូនវត្ថុសំណាក ទៅមន្ទីរពិសោធន៍ ។
អគ្គនាយកបច្ចេកទេស នៃក្រសួងសុខាភិបាល ក៏បានបញ្ជាក់ថា ប្រជាពលរដ្ឋដែលរស់នៅតំបន់ក្រហម គឺជាតំបន់ មានហានិភ័យខ្ពស់ អាត្រានៃការតេស្ត រកអ្នកឆ្លងវីរុសកូវីដ-១៩ ពី១០ភាគរយ ឬលើស១០ភាគរយ ទៅទៀត ។ ម្យ៉ាងទៀត ដោយសាររាជរដ្ឋាភិបាល ពិសេសអាជ្ញាធរចេញវិធានការបិទខ្ទប់ តំបន់មានហានិភ័យខ្ពស់ បានទាន់ពេលវេលា ទើបយើងអាចមានលទ្ធភាពតេស្ត រកអ្នកវិជ្ជមានជំងឺកូវីដ-១៩ ដើម្បីកាត់ផ្ដាច់ខ្សែចម្លងវីរុសកូវីដ-១៩ ពីមនុស្សម្នាក់ ទៅមនុស្សម្នាក់ទៀត ។
ក្រសួងសុខាភិបាលកម្ពុជា បានបញ្ជាទិញ តេស្តរហ័ស SARS-CoV-2 Rapid Antigen Test បន្ទាប់ពីមានការវាយតម្លៃច្បាស់លាស់ ទៅលើតេស្តនេះ ពិតជាមានប្រសិទ្ធភាព ក្នុងការស្វែងវីរុសកូវីដ-១៩ ។
នៅតាមបណ្តាខេត្ត-ក្រុងទូទាំងប្រទេសកម្ពុជា ដែលមានអ្នកឆ្លងជំងឺកូវីដ-១៩ សុទ្ធតែទទួលបាន តេស្តេរហ័សខាងលើ រួចហើយ សម្រាប់ជាតម្រូវការចាំបាច់ប្រើប្រាស់ ដើម្បីគ្រប់គ្រងស្ថានការណ៍ឲ្យបានល្អប្រសើរ ។
តេស្តរហ័សរកវីរុសកូវីដ-១៩ មិនមែនជាម៉ាស៊ីនតេស្តរកវីរុសកូវីដទេ វាគឺជាប្រភេទបន្ទះជ័រម្យ៉ាង ដែលយើងយកសំឡីត្បាល់ ក្នុងច្រមុះអ្នកសង្ស័យដើម្បីយកវត្ថុសំណាក ហើយដាក់ទៅបន្ទះនោះ នឹងតេស្តឃើញលទ្ធផលភ្លាមៗ ក្នុងរយៈពេល ១៥នាទី បន្ទាប់ពីយកសំណាករួច ។
គិតត្រឹមថ្ងៃទី៤ ឧសភា ២០២១ ប្រទេសកម្ពុជាបានធ្វើតេស្តចំនួន ៩៣៦,១៥៥ ស្មើនឹង ៥៥,៧២៣ ក្នុង១លាននាក់ ។
នៅថ្ងៃទី៤ ឧសភានេះដែរ រកឃើញអ្នកឆ្លងជំងឺកូវីដ-១៩ ចំនួន ៩៣៨នាក់ (ករណីឆ្លងសហគមន៌ទាំងអស់) និងមានជាសះស្បើយ ចំនួន ៣៦១នាក់ និងស្លាប់ ១នាក់ ផងដែរ ។
ជំងឺកូវីដ-១៩ នៅតែបន្តគម្រាមកំហែងជាប់ជានិច្ច សូមបងប្អូនបន្តប្រយ័ត្នជាប់ជានិច្ច ដោយអនុវត្តអនាម័យ នៅឃ្លាតឆ្ងាយពីគ្នា មិនចេញក្រៅផ្ទះ ។ ត្រូវបន្ត គម្លាតបុគ្គលបន្តទៀត ដូចជាអង្គុយគម្លាតពីគ្នា ឈររងចាំគម្លាតពីគ្នា ឈរជជែកគ្នាគម្លាតពីគ្នា។ ល។ ត្រូវបន្តពាក់ម៉ាស់ជាប់ជានិច្ច និងឧស្សាហ៍លាងដៃជាមួយសាប៊ូ អាល់កុល ឬជែល ៕
ចែករំលែកព័តមាននេះ