កាត់បន្ថយហានិភ័យជំងឺហើមសន្លាក់៖
យោងតាមរបាយការណ៍នៃការសិក្សាថ្មីចុងក្រោយបំផុតដែលធ្វើឡើងដោយក្រុមអ្នកវិទ្យាសាស្ត្រមកពីវិទ្យាស្ថានឱសថសាស្ត្របរិស្ថាននៃសាកលវិទ្យាល័យ Karolinska Institue ទីក្រុងស្តុកខុល ប្រទេសស៊ុយអែតបានបង្ហាញថា ទទួលទានបណ្តាត្រីសម្បូរខ្លាញ់មានដូចជា ត្រីសូម៉ុង ត្រីព្រួល ត្រីស្បៃកា ត្រីរ៉ស់…យ៉ាងហោចណាស់ម្តងក្នុងមួយសប្តាហ៍អាចកាត់បន្ថយហានិភ័យពីជំងឺហើមបាន៥២ភាគរយ ។ ប្រសិទ្ធភាពបែបនេះក៏ព្រោះអាស៊ីដខ្លាញ់អូមេហ្គា-៣បានរាំងខ្ទប់ការឆ្លើយតបរបស់រាងកាយទៅនឹងការរលាក ។
ត្រីសម្បូរខ្លាញ់ត្រូវគេរកឃើញថា ផ្ទុកទៅដោយអាស៊ីដខ្លាញ់អូមេហ្គា-៣ក្នុងកម្រិតមួយយ៉ាងខ្ពស់បំផុត ។ វាត្រូវគេចាត់ទុកថាមានសារសំខាន់ ពីព្រោះរាងកាយរបស់មនុស្សមិនអាចស្រូបយកសារធាតុនេះពីប្រភពដទៃក្រៅពីការទទួលទានតាមរយៈរបបអាហារនោះបានទេ ។
ជួយឱ្យខួរក្បាលកាន់តែមានភាពល្អប្រសើរ៖
អ្នកវិទ្យាសាស្ត្របាននិយាយថា ការទទួលទានត្រីដែលមានខ្លាញ់ច្រើនដូចជា ត្រីសូម៉ុង ត្រីព្រួល ត្រីរ៉ស់… អាចធ្វើឱ្យល្អប្រសើរដល់ការចង់ចាំ ។
ការសិក្សាថ្មីមួយបានរកឃើញថា អាស៊ីដខ្លាញ់មួយប្រភេទដែលគេរកឃើញក្នុងសាច់ត្រីខាងលើ និងក្នុងអាហារសមុទ្រផ្សេងទៀតអាចជួយជំរុញមុខងារអង្គចងចាំបានដល់១៥ភាគរយ ។ នៅក្នុងការពិសោធដែលមានរយៈពេល៦ខែ មនុស្សពេញវ័យមានសុខភាពល្អ១៧៦នាក់ត្រូវបានគេផ្តល់ឱ្យនូវឱសថផ្ទុក DHA-អាស៊ីដខ្លាញ់អូមេហ្គា-៣ដែលមាននៅក្នុងត្រីសូម៉ុង ត្រីស្បៃកា ត្រីសាឌីន ត្រីព្រួល បង្គារនិងគ្រុំ ។ ជាលទ្ធផលក្រោយការពិសោធ គេពិនិត្យឃើញថា ការចងចាំ និងល្បឿនធ្វើការនៃអង្គចងចាំរបស់អ្នកដែលប្រើប្រាស់ឱសថផ្ទុក DHA មានការវិវឌ្ឍល្អប្រសើរជាងមុនគួរឱ្យកត់សម្គាល់ ។ ដូច្នេះវាត្រូវបានគេជឿថា DHA អាចជាគន្លឹះយ៉ាងសំខាន់ក្នុងការជួយទប់ស្កាត់ជំងឺបាត់ការចងចាំ ។
ជួយបង្កើនអាយុរយៈពេល២ឆ្នាំ ៖
ការរកឃើញដោយក្រុមអ្នកវិទ្យាសាស្ត្រសហរដ្ឋអាមេរិកបានបង្ហាញថា ទទួលទានត្រីសម្បូរខ្លាញ់អាចជួយបង្កើនអាយុរបស់អ្នកយ៉ាងហោចណាស់បាន២ឆ្នាំ ។ បណ្តាជនវ័យចាស់ដែលមានអាស៊ីដខ្លាញ់អូមេហ្គា-៣ក្នុងឈាមកម្រិតខ្ពស់ត្រូវគេដឹងថា អាចកាត់បន្ថយអត្រាស្លាប់មុនអាយុបាន១ភាគ៤ ។ ចំពោះជំងឺបេះដូងវិញអាចកាត់បន្ថយបានមួយផ្នែកបើធៀបទៅនឹងបណ្តាជនដែលមានអាស៊ីដខ្លាញ់អូមេហ្គា-៣ក្នុងឈាមកម្រិតទាប ។ វាជាការសិក្សាលើកទី១ហើយ ដែលអ្នកវិទ្យាសាស្ត្រសាកលវិទ្យាល័យ
HSPH និងសាកលវិទ្យាល័យវ៉ាស៊ីនតោនពិនិត្យមើលលើកម្រិតនៃការទទួលទានត្រី ហើយបានភ្ជាប់វាទៅនឹងអត្រាស្លាប់ ។
ត្រីគឺជាប្រភពតែមួយគត់ដែលផ្តល់នូវអាស៊ីដខ្លាញ់អូមេហ្គា-៣ ។ វាមិនត្រឹមតែមានសារសំខាន់ដល់សុខភាពបេះដូងប៉ុណ្ណោះទេ ប៉ុន្តែវាក៏ផ្តល់អត្ថប្រយោជន៍សម្រាប់ការអភិវឌ្ឍខួរក្បាល កាត់បន្ថយការរលាកខួរក្បាល និងការរលាកបណ្តាកោសិកាដទៃទៀតផងដែរ ៕
ចែករំលែកព័តមាននេះ