ខេត្តមណ្ឌលគិរី៖ អាជ្ញាធរខេត្តមណ្ឌលគិរី នៅតែបន្តការអនុវត្តវិធានសុខាភិបាល ដើម្បីធានាសុវត្ថិភាពពីការចម្លងជំងឺក្នុងសហគមន៍ លើអ្នកដំណើរចេញចូលឆ្លងខេត្ត ហើយក្នុងករណីចាំបាច់អ្នកដំណើរ ត្រូវស្ម័គ្រចិត្តធ្វើចត្តាឡីស័ក ចំនួន ១៤ថ្ងៃ បើមិនដូច្នោះទេ សមត្ថកិច្ចមិនអនុញ្ញាតឲ្យចូលខេត្តឡើយ ដ្បិតនៅក្រុងសែនមនោរម្យ ក៏កំពុងមានករណីអ្នកជំងឺកូវីដ១៩ សម្រាកព្យាបាលដែរ។
យោងតាមសេចក្តីសម្រេច ដែលរាជរដ្ឋាភិបាលកម្ពុជា ជូនដំណឹងកាលពីថ្ងៃទី ២៥ ខែមេសា ឆ្នាំ ២០២១ សម្រេចបញ្ចប់ការហាមឃាត់ការធ្វើដំណើរ និងការបិទរមណីយដ្ឋានទេសចរណ៍នៅទូទាំងប្រទេស ដែលត្រូវបានសម្រេចដោយសេចក្តីសម្រេចលេខ ៤៤ សសរ ចុះថ្ងៃទី ០៦ ខែមេសា ឆ្នាំ២០២១ និងសេចក្តីសម្រេចលេខ ៥១ សសរ ចុះថ្ងៃទី ១៧ ខែមេសា ឆ្នាំ ២០២១ របស់រាជរដ្ឋាភិបាល សម្រាប់ការធ្វើដំណើរចេញ-ចូល និងឆ្លងកាត់ភូមិសាស្ត្រនានា ដែលត្រូវបានបិទខ្ទប់ ត្រូវអនុវត្តតាមសេចក្តីសម្រេចរបស់រាជរដ្ឋាភិបាល ស្ដីពី ការបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ ខេត្តកណ្ដាល និងសេចក្តីសម្រេចពាក់ព័ន្ធនានារបស់រដ្ឋបាលរាជធានីខេត្ត ដែលមានជាធរមាន។
យោងខ្លឹមសារសម្រេចខាងលើនេះ រដ្ឋបាលខេត្ត បានអនុញ្ញាតឲ្យមានការធ្វើដំណើរចេញ-ចូល ខេត្តមណ្ឌលគិរី ប៉ុន្តែសម្រាប់អ្នកដំណើរ ដែលមានគោលដៅចូលទៅខេត្តមណ្ឌលគិរី តម្រូវឲ្យមានវិធានការសុខាភិបាល ដោយនៅចត្តាឡីស័ក ១៤ថ្ងៃ តាមការរៀបចំរបស់អាជ្ញាធរ ជៀសវាងការចម្លងជំងឺកូវីដ១៩ចូលសហគមន៍។ ដូច្នេះចំពោះបងប្អូន ដែលមិនទាន់មានការចាំបាច់ខ្លាំង ត្រូវធ្វើដំណើរចូល ទៅខេត្តមណ្ឌលគិរី សូមស្នាក់នៅទីតាំង ដែលខ្លួន កំពុងរស់នៅបច្ចុប្បន្នជាប៉ុណ្ណោះអាសន្ន ដោយរង់ចាំសេចក្តីជូនដំណឹងជាថ្មីរបស់រដ្ឋបាលខេត្តមណ្ឌលគិរី។ ក្នុងន័យនេះមិនមែនហាមឃាត់បងប្អូន មិនឲ្យធ្វើដំណើរចូលខេត្តមណ្ឌលគិរីនោះទេ ប៉ុន្តែបើស្ថិតក្នុងភាពចាំបាច់ខ្លាំង ពេលធ្វើដំណើរទៅដល់ខេត្តមណ្ឌលគិរី បងប្អូនត្រូវស្ម័គ្រចិត្តធ្វើចត្តាឡីស័ក។ ដោយឡែក សម្រាប់រថយន្តដឹកទំនិញនានា អាចចេញចូលជាធម្មតាបាន តែមិនអនុញ្ញាតឲ្យមានគ្នីគ្នាច្រើនរួមដំណើរទេ ហើយត្រូវប្រកាន់ខ្ជាប់នូវវិធានសុខាភិបាលឲ្យបាន ១០០% ហើយការល្មើសបទបញ្ជា ឬបម្រាមរបស់សុខាភិបាល បុគ្គលនោះ និងត្រូវទទួលខុសត្រូវចំពោះមុខច្បាប់ជាធរមាន៕ សាយ ករុណា
ចែករំលែកព័តមាននេះ