ខេត្តកណ្ដាល ៖ លទ្ធផលនៃការយកសំណាកធ្វើតេស្ត នៅថ្ងៃទី២៥ និងទី២៦ ខែមេសា ឆ្នាំ២០២១ ក្រុមគ្រូពេទ្យបានរកឃើញកម្មកករកម្មការិនីរោងចក្រស្តាម៉ាស្ទ័រ & ហ្វ្រែង (ខេមបូឌា) ដែលមានទីតាំងស្ថិតនៅក្នុងភូមិព្រៃពពេល ឃុំពើក ស្រុកអង្គស្នួល ខេត្តកណ្តាលមានវិជ្ជមានជម្ងឺ COVID-19 សរុប២៤៦នាក់បន្ថែមទៀតហើយ ។
ដែលការឆ្លងយ៉ាងឆាប់រហ័ស និងមានចំនួនច្រើនបែបនេះ ត្រូវបានមើលឃើញមួយជ្រុងថា អាចផ្ដើមចេញកម្មករដែលមានវិជ្ជមាន និងអវិជ្ជមានកូវីដជិះរថយន្តទៅមកធ្វើការឡូកឡំគ្នា ដោយពុំបានដឹងខ្លួន ហើយលទ្ធផលបែបនេះពិតជាធ្វើឲ្យអាជ្ញាធរមានការព្រួយបារម្ភយ៉ាងខ្លាំង ។
តាមប្រភពព័ត៌មានបានឲ្យដឹងថា ដោយសារតែកន្លងមកកម្មករ កម្មការិនី ទាំងនោះបានប៉ះពាល់គ្នាទៅវិញទៅមក ហើយមើលពុំដឹងថា នរណាម្នាក់មានផ្ទុកជម្ងឺ COVID-19នោះទើបពួកគាត់ទាំងនោះបានស្ម័គ្រចិត្តចូលយកសំណាកដោយខ្លួននៅមន្ទីរពេទ្យបង្អែកស្រុកអង្គស្នួល ហើយយោងតាមលទ្ធផលនៃការយកសំណាកធ្វើតេស្តនាវេលាល្ងាចថ្ងៃទី២៥ ខែមេសា ឆ្នាំ២០២១ ក្រុមគ្រូពេទ្យបានរកឃើញអ្នកវិជ្ជមានចំនួន១៤នាក់ ។
ដោយឡែក នៅថ្ងៃទី២៦ ខែមេសា ឆ្នាំ២០២១ ក្រុមការងារបានបន្តយកសំណាកធ្វើតេស្តជូនកម្មករ កម្មការិនីរោងចក្រនេះទៀត ហើយលទ្ធផលបានរកឃើញអ្នកមានវិជ្ជមានចំនួន២៣២នាក់បន្ថែមទៀត ដូច្នេះសរុបទាំង២ថ្ងៃ រកឃើញអ្នកវិជ្ជមានជម្ងឺCOVID-19នេះចំនួន២៤៦នាក់ ។
ប្រភពដដែលបានឲ្យដឹងទៀតថា ក្រោយពីការរកឃើញឆ្លងយ៉ាងឆាប់រហ័ស និងមានចំនួនច្រើនបែបនេះ បានធ្វើឲ្យអាជ្ញាធរមានការព្រួយបារម្ភខ្លាំងណាស់ ហើយលោកគង់ សោភ័ណ អភិបាលខេត្តកណ្ដាលបានដឹកនាំមន្ត្រីពាក់ព័ន្ធទាំងអស់ បើកការប្រជុំបន្ទាន់មួយទាំងយប់ នៅសាលាស្រុកអង្គស្នួល ។
ដើម្បីរកវិធីទប់ទល់ និងស្រាវជ្រាវតាមរកអ្នកពាក់ព័ន្ធដោយផ្ទាល់និងប្រយោលជាមួយអ្នកជម្ងឺទាំងនោះ ដើម្បីយកសំណាកធ្វើតេស្ត និងងាយនាំយកទៅព្យាបាល ព្រមទាំងទប់ស្កាត់ការឆ្លងរីករាលដាលជម្ងឺCOVID-19បន្តទៀត ។
សូមរម្លឹកផងដែរថា កាលពីថ្ងៃទី២៣ ខែមេសា ឆ្នាំ២០២១ ក្រុមគ្រូពេទ្យជំនាញបានចាប់ផ្ដើមយកសំណាកកម្មករកម្មការិនីរោងចក្រ ស្តាម៉ាស្ទ័រ និង ហ្វ្រែង (ខេមបូឌា) ធ្វើតេស្តលើកម្មករកម្មការិនីទាំងនោះ ហើយជាលទ្ធផលបានរកឃើញអ្នកមានវិជ្ជមាន២១នាក់ ។ លុះដល់ថ្ងៃទី២៤ ខែមេសា ក្រុមការងារគ្រូពេទ្យបានបន្តធ្វើតេស្តទៀត ហើយបានរកឃើញអ្នកវិជ្ជមានរហូតដល់ចំនួន១៩៧នាក់បន្ថែមទៀត ដែលសរុបទាំង២ថ្ងៃ២១៨នាក់រួចមកហើយ ។
ប៉ុន្តែទោះបីជាបែបណានេះ គ្រាន់តែជាលទ្ធផលបឋមប៉ុណ្ណោះ ដោយពុំបានឆ្លងកាត់ការធ្វើតេស្ត នៅវិទ្យាស្ថានសុខភាពសាធារណៈមួយជំហ៊ានទៀតឲ្យកាន់តែសុក្រិតនៅឡើយទេ ។
ប្រភពខាងលើបានបន្តថា ក្រៅពីរោងចក្រស្តាម៉ាស្ទ័រ & ហ្វ្រែង (ខេមបូឌា) ក៏មានកម្មករ កម្មការិនី រោងចក្រចំនួន៥ផ្សេងទៀត ត្រូវយកសំណាកបន្តបន្ទាប់ដែរព្រោះសង្ស័យថា ពួកគាត់ជាប់ពាក់ព័ន្ធជាមួយកម្មកររោងចក្រខាងលើដែរ ដោយការជិះរថយន្តចេញពីផ្ទះទៅធ្វើការជាមួយគ្នា និងពេលចេញពីធ្វើការទៅផ្ទះក៏ជាមួយគ្នា ដោយពុំដឹងថា នរណាម្នាក់ឆ្លង ឬមិនឆ្លងរោគនេះឡើយ៕
ចែករំលែកព័តមាននេះ