មានមនុស្សជាច្រើនបរាជ័យក្នុងការសន្សំប្រាក់ បើទោះបីខ្លួនខំប្រឹងសន្សំយ៉ាងណាក្តី ។ មានការលើកឡើងថា អ្នកដែលមិនបានទទួលផលពីប្រាក់សន្សំ ក៏ព្រោះថា ពួកគេមិនមានផែនការចាយលុយច្បាស់លាស់ និងមិនមានការប្តេជ្ញាចិត្តឱ្យបានខ្លាំងក្លាផងដែរ ។ ដូចនេះមកស្តាប់វិធីសាស្ត្រខ្លះៗ ក្នុងការសន្សំប្រាក់ឱ្យមានប្រសិទ្ធភាព តើអ្នកមានឆ្ងល់ទេថា ហេតុអ្វីព្យាយាមសន្សំប្រាប់ហើយ នៅតែមិនសល់ទៀត ? តាមការដកស្រង់បទពិសោធន៍ពីអ្នកជំនាញ បានឱ្យដឹងថា ក៏ព្រោះតែមិនផែនការច្បាស់លាស់ ហើយចិត្តរបស់អ្នកមិនមានការប្តេជ្ញាណាមួយឱ្យបានជាក់លាក់ផងដែរ ។ តោះខាងក្រោមនេះ ជាវិធីសាស្ត្រសន្សំលុយ ដែលបានផ្សាយនៅលើវេបសាយ Discover ៖
ដំបូងមុនចូលដល់ការបកស្រាយចំណុចនីមួយៗ យើងសុំសួរប្រិយមិត្តក៏ដូចជា អ្នកចូលចិត្តអានអត្ថបទដែលទាក់ទងនឹងការសន្សំលុយថា តើអ្នកធ្លាប់បានដឹងអំពីរបៀបចំណាយតិច ហើយសន្សំបានច្រើនដែរ ឬទេ? ហើយតើអ្នកធ្លាប់បានឮទេថា ពាក្យសេរីភាពហិរញ្ញវត្ថុ ? វាមានន័យថា ការមានលុយគ្រប់គ្រាន់ ដើម្បីធ្វើអ្វីមួយដែលអ្នកចង់ធ្វើនាពេលអនាគត ឬគម្រោងដែលអ្នកបានគ្រោងទុក ? អ្វីក៏ដោយអ្នកសុទ្ធតែអាចធ្វើបាន វាគ្រាន់តែថាទាមទារឱ្យមានការតាំងចិត្តខ្ពស់ ។ ប៉ុន្តែសំនួរសួរថា តើអ្នកទៅដល់គោលដៅរបស់អ្នកដោយរបៀបណា ? វិធីមួយគឺត្រូវសិក្សាពីអាថ៌កំបាំងនៃការសន្សំសំចៃរបស់សហគ្រិនជោគជ័យ ហើយអ្នកអាចអនុវត្តតាមយុទ្ធសាស្ត្ររបស់ពួកគេ ។
ទី ១) រស់នៅតាមលទ្ធភាពរបស់អ្នក ឬរស់នៅដោយសាមញ្ញបំផុត ៖
លោក Warren Buffet អាចមានប្រាក់ប្រមាណជាជាង ៨៨ ពាន់លានដុល្លារ ប៉ុន្តែគាត់ការរស់របស់គាត់ ហាក់សាមញ្ញបំផុត គឺគាត់រស់នៅបែបសន្សំសំចៃណាស់ ។ ផ្ទះរបស់គាត់មានតម្លៃ ត្រឹមតែ ៣១.៥០០ ដុល្លារនោះទេ ដោយគាត់ទិញតាំងពីឆ្នាំ ១៩៥៨ មកម្ល៉េះ បើទោះបីជាគាត់មានលទ្ធភាពគ្រប់គ្រាន់ក្នុងការទិញផ្ទះថ្លៃជាងនេះក៏ដោយ ។ គាត់មានប្រាក់គោល ១០ ម៉ឺនដុល្លារ ដែលគាត់រកបានក្នុងរយៈពេល ១៥ ឆ្នាំ ។ ដំបូន្មាន ដែលលោក Warren Buffet បានចែករំលែក គឺធ្វើយ៉ាងណា ចៀសឱ្យផុតពីការប្រើប្រាស់ប័ណ្ឌឥទាន (credit cards) ។ មនុស្សជាច្រើនបានប្រើឥណទាន ដើម្បីទិញរបស់របរ ដែលពួកគេចង់បាន ប៉ុន្តែការធ្វើដូច្នេះវាអាចបង្កើត បានជាប្រាក់បំណុលប្រចាំខែឱ្យ (ត្រង់ចំណុចនេះ មានមនុស្សភាគច្រើនបានប្រើសេវាកម្ម ចាយលុយមុនក្នុងគណនេយ្យរបស់គេក្នុងការទូទាត់ទិញទំនិញនានា ហើយគេគ្រាន់ដល់ថ្ងៃកំណត់ គេដាក់ប្រាក់ចូលទៅក្នុងគណនេយ្យនោះជាការស្រេច) ។
លោក Warren Buffet បន្តថា អ្នកត្រូវរស់នៅទៅតាមសមត្ថភាពប្រាក់ខែ ឬប្រាក់ចំណូលប្រចាំខែរបស់អ្នក ។ អ្នកក៏ត្រូវតែរស់នៅ និងគិតពិចារណានៅពេលអ្នកចង់ទិញរបស់របរអ្វីមួយ ថាតើរបស់នោះជាតម្រូវការចាំបាច់ ឬក៏ត្រឹមតែអ្នកស្រឡាញ់ហើយចង់បាននោះ ។ ការរស់នៅសាមញ្ញ ការចំណា យទៅលើរបស់ចាំបាច់ និងមិនចាយលុយខ្ជះខ្ជាយ មិនទាន់គ្រប់គ្រាន់នោះទេ អ្វីដែលអ្នកត្រូវធ្វើនោះ គឺការសន្សំប្រាក់នៅក្នុងគណនេយ្យសន្សំដាច់ដោយឡែកមួយ ការសន្សំប្រាក់នេះទៀតសោតគឺជាការសន្សំដែលអ្នកមិនអាចដកចេញបាននោះទេ ហើយអ្នកអាចទុកប្រាក់ទាំងនេះដោយចាំតែទទួលបានការប្រាក់ខ្ពស់ ។
ទី ២) បង្កើតផែនការហិរញ្ញវត្ ថុ៖
អ្នកនាង Shark Tank ជាសហគ្រិន Barbara Corcoran ដែលបានប្រែក្លាយប្រាក់កម្ចី ១០០០ ដុល្លារឱ្យទៅជាទ្រព្យសម្បត្តិរាប់លានដុល្លារ ។ អ្នកនាងបានណែនាំវិធីខ្លះៗ ដែលអាចមានប្រសិទ្ធភាពក្នុងការកសាងទ្រព្យសម្បត្តិទាំងនេះ ដោយលោកស្រីជឿជាក់យ៉ាងមុតមាំថា ការបង្កើតផែនការហិរញ្ញវត្ថុ គឺផ្តល់នូវរចនាសម្ព័ន្ធផ្សេងៗ ដែលអាចជួយមនុស្សក្នុងបង្កើត និងសម្រេចគោលដៅសន្សំ ។ រឿងដំបូងដែលអ្នកនាងណែនាំ គឺមានគណនីសន្សំ ក្នុងគោលបំណង មូលនិធិបន្ទាន់ (Emergency Fund សូមបញ្ជាក់ផងដែរថា កាលពីថ្មីនេះយើងបានលើកយកមូលនិធិបន្ទាន់យកមកបកស្រាយរួចមកហើយ) ។ អ្នកអាចធ្វើការសន្សំ ៣ ខែ ឬ ៦ ខែម្តង វិធីនេះគឺជួយអ្នកនៅពេលអ្នកមានអាសន្ន ឬហេតុការអ្វីមួយដែលអ្នកមិនបានដឹងមុន ដូចនេះមូលនិធិបន្ទាន់គឺអាចជួយអ្នកបាន ។ អ្នកនាងក៏បានណែនាំផងដែរថា យើងម្នាក់ៗគួរចំណាយពេលវេលាខ្លះ ដើម្បីប្រមូលចំណេះដឹង អំពីហិរញ្ញវត្ថុផ្ទាល់ខ្លួនផង ហើយមានឱកាសអាចចូលរួមសិក្ខាសាលាហិរញ្ញវត្ថុ ឬអ្នកអាចបើកមើលអ៊ីនធឺណិតពីការបង្រៀនហិរញ្ញវត្ថុ ដែលវេបសាយខ្លះមិនតម្រូវឱ្យយើងបង់ប្រាក់នោះទេ (youtube ក៏មានដែរ) ។
ទី ៣) រៀនទប់ទល់នឹងការចង់បាន ដែលមិនសមហេតុផង ឬមិនមែនជាតម្រូវការចាំបាច់ ៖
លោក Suze Orman ជាអ្នកនិពន្ធល្បីឈ្មោះមួយរូប និងជាទីប្រឹក្សាហិរញ្ញវត្ថុម្នាក់ផងដែរ បានណែនាំថា ការសន្សំប្រាក់អាចសម្រេចបាន ដោយកាត់ចោលការចំណាយដែលអ្នកចង់បាន (ត្រង់នេះសូមបងប្អូនកុំយល់ច្រឡំថា តម្រូវការចាំបាច់ និងការស្រឡាញ់ចង់បាន វាទាំងនេះខុសគ្នា) ។ អ្នកត្រូវតែដឹងថា អ្វីដែលអ្នកមិនត្រូវការដើម្បីចិញ្ចឹមជីវិត ហើយផ្តោតតែលើអ្វី ដែលអ្នកត្រូវការចាំបាច់សម្រាប់ការរស់នៅប្រចាំថ្ងៃ (ត្រង់ចំណុចផងដែរ សារព័ត៌ មានក៏ធ្លាប់បានលើកយករបស់របរដែលចាំបាច់និងមិនចាំបាច់យកមកបកស្រាយរួចហើយ) ។ លោក Suze Orman បានណែនាំបន្តថា ៖ «នៅពេលអ្នករៀបនឹងទិញរបស់អ្វីមួយ សូមសួរខ្លួនឯងថា តើវាជាតម្រូវការចាំបាច់ត្រូវតែទិញ ឬទេ? ប្រសិនបើវាជាតម្រូវការសូមទិញវាចុះ ប៉ុន្តែប្រសិនបើវាគ្រាន់តែជាការចង់បានរបស់អ្នកទេ សូមដើរឱ្យហួសតែម្តងទៅ (ដើរចេញទៅ) ។ បន្ទាប់មកយកលុយ ដែលអ្នកគិតថានឹងទិញរបស់នោះ ទៅដាក់សន្សំក្នុងគណនីសន្សំវិញល្អជាង ។ ការក្លាយជាមនុស្សចេះសន្សំ និងទទួលបានជោគជ័យ តម្រូវឱ្យមានវិន័យ និងផ្លាស់ប្តូរទំលាប់ខ្លះៗចោល ប៉ុន្តែលទ្ធផលវានឹងធ្វើឱ្យប្រាក់សន្សំកាន់តែមានតម្លៃ ។ ការមានទំលាប់ត្រឹមត្រូវក្នុងការចាយវាយ ក្នុងការសន្សំប្រាក់ និងមានផែនការសន្សំប្រាក់ច្បាស់លាស់ វានឹងអាចជួយសម្រេចផែនការជីវិតរបស់អ្នកក្នុងពេលអនាគត ៕
ចែករំលែកព័តមាននេះ