រាជធានីភ្នំពេញ ៖ កាលពីពេលថ្មីៗកន្លងទៅនេះធនាគារជាតិនៃកម្ពុជាបានជំរុញឱ្យពលរដ្ឋនិងគ្រឹះស្ថានហិរញ្ញវត្ថុប្រើប្រាស់ការទូទាត់តាមប្រព័ន្ធបច្ចេកវិទ្យាអេឡិចត្រូនិក ហើយនៅថ្ងៃទី២៣ មេសា ២០២១នេះដែរ សមាគមហិរញ្ញវត្ថុពីរគឺសមាគមមីក្រូហិរញ្ញវត្ថុកម្ពុជា និងសមាគមធនាគារនៅកម្ពុជាក៏បានចេញសេចក្តី ប្រកាសជមរុញនិងលើកទឹកចិត្តដល់អតិថិជនរបស់ខ្លួនកាត់បន្ថយការប្រើប្រាស់ក្រដាសប្រាក់ដោយជំនួសមកវិញ នូវការទូទាត់តាមបច្ចេកវិទ្យាអេឡិចត្រូនិក ។
យោងតាមសេចក្តីជូនដំនឹងរួមរវាងសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា បានឱ្យដឹងថាគ្រឹះស្ថានធនាគារនិងហិរញ្ញវត្ថុ សូមលើកទឹកចិត្តដល់អតិថិជននិងសាធារណជន ធ្វើការទូទាត់តាមប្រព័ន្ធ អេឡិចត្រូនិក ដើម្បីជៀសផុតពីការកាន់ក្រដាសប្រាក់ដោយផ្ទាល់ ដែលអាចបង្កឱ្យមានហានិភ័យតាមក្រដាសប្រាក់ ដែលមិនបានសម្លាប់មេរោគ ។
នៅក្នុងពេលអាជ្ញាធរបិទខ្ទប់រាជធានីភ្នំពេញ និងការរឹតបន្តឹងការធ្វើដំណើររបស់ពលរដ្ឋដើម្បីទប់ស្កាត់ការឆ្លងនិងចម្លងមេរោគកូវីដ១៩នេះដែរ គ្រឹះស្ថានហិរញ្ញវត្ថុក៏បានជម្រាបជូនដល់អតិថិជនរបស់ខ្លួនថា គ្រឹះស្ថានធនាគារនិងមីក្រូហិរញ្ញវត្ថុទទួលបានប្រាក់បញ្ញើ រួមទាំងភ្នាក់ងារនិងសេវាធនាគារហិរញ្ញវត្ថុផ្សេងទៀតរួមមាន ម៉ាស៊ីនដកនិងដាក់ប្រាក់ស្វ័យប្រវត្តិនៅតែដំណើរការជាធម្មតាក្នុងព្រះរាជណាចក្រកម្ពុជា ។
ដោយឡែកក្នុងពេលបិទខ្ទប់រាជធានីភ្នំពេញ ក្រុងតាខ្មៅ និងផ្នែកខ្លះនៃខេត្តព្រះសីហនុ ការិយាល័យមួយចំនួននៅក្នុងតំបន់បិទខ្ទប់នោះ ក៏នៅតែបើកបម្រើសេវាហិរញ្ញវត្ថុជូនអតិថិជនរបស់ខ្លួនដដែល ដោយមានការអនុញ្ញាតពីគណៈកម្មការជាតិគ្រប់គ្រង និងដឹកនាំវិធានការអនុវត្តបិទខ្ទប់ផងដែរ ។
សូមរំលឹកថា កាលពីពេលកន្លងទៅនេះដែរ ធនាគារនិងមីក្រូហិរញ្ញវត្ថុក៏បានចេញសេចក្ដីជូនដំនឹងពីការអនុគ្រោះ ជូនដល់អតិថិជនដែលរងផលប៉ះពាល់ដោយសារតែកូវីដ១៩ផងដែរ ដូចជាអតិថិជនដែលឆ្លងកូវីដ១៩ អតិថិជនដែលត្រូវធ្វើចត្តាឡីស័ក និងអតិថិជនដែលទទួលផលប៉ះពាល់ផ្សេងទៀត ដោយពន្យារការបង់ប្រាក់ ការរៀបចំឥណទានឡើងវិញជាដើម ។
គិតត្រឹមថ្ងៃទី២៣ មេសា ២០២១នេះ ក្រសួងសុខាភិបាលបានប្រកាសពីការរកឃើញអ្នកឆ្លងថ្មីនៃកូវីដ១៩ចំនួន៦៥៥នាក់ ដែលធ្វើឱ្យអ្នកឆ្លងសរុបក្នុងប្រទេសកម្ពុជាហក់ឡើងដល់៨.៨៤៨នាក់ក្នុងនោះជាសះស្បើយសុរប៣១៤៨នាក់ និងអ្នកស្លាប់មានចំនួន៦១នាក់៕
ចែករំលែកព័តមាននេះ