អ្នកវិទ្យាសាស្ត្រសហរដ្ឋអាមេរិកបានព្រមានថា បុរស-ស្ត្រីវ័យក្រោម៥៥ឆ្នាំដែលពិសាកាហ្វេច្រើនជាង៤ពែងក្នុងមួយថ្ងៃអាចប្រឈមនឹងការស្លាប់មុនអាយុដល់ទៅ៥០ភាគរយ ។
ក្រុមអ្នកវិទ្យាសាស្ត្រដែលបានពិសោធលើមនុស្សវ័យពី២៨ឆ្នាំទៅ៨៧ឆ្នាំប្រមាណ៣ម៉ឺន៣ពាន់និង៧២៤នាក់បានដាក់ការសង្ស័យថា អ្នកដែលពិសាកាហ្វេច្រើនលើសលប់រហូតដល់ទៅ២៨ពែងក្នុងមួយសប្តាហ៍ ទំនងជាធ្វើឱ្យប៉ះពាល់ដល់ការរំលាយអាហាររបស់រាងកាយ ហើយការប៉ះពាល់នេះបានលុបលើអត្ថប្រយោជន៍សុខភាពមួយចំនួនរបស់កាហ្វេ ។ បន្ថែមពីលើនេះទៀត អ្នកដែលញៀនកាហ្វេខ្លាំងទាំងនេះក៏ទំនងជាអ្នកដែលរងផលប៉ះពាល់ដល់សុខភាពខ្លាំងណាស់ដែរ ។
Steven Blair ដែលជាអ្នកស្រាវជ្រាវមកពីសាកលវិទ្យាល័យ University of South Carolina បានថ្លែងថា៖ «ច្បាស់ណាស់ លទ្ធផលនៃការរកឃើញលើកនេះ មិនបានបង្ហាញនូវការជាប់ពាក់ព័ន្ធគ្នារវាងការពិសាកាហ្វេ និងសេចក្តីស្លាប់ចំពោះបុរស-ស្ត្រីវ័យចាស់នោះទេ» ។ ទោះជាយ៉ាងនេះក្តី ក្រុមស្រាវជ្រាវរបស់លោកមិនបានពន្យល់ពីមូលហេតុដែលកាហ្វេមិនផ្តល់ផលប៉ះពាល់ដូចគ្នានេះលើមនុស្សវ័យចាស់នោះទេ ។
កាហ្វេត្រូវគេដឹងថា ផ្ទុកទៅដោយសារធាតុគីមីផ្សេងៗគ្នារាប់រយមុខ ហើយដូច្នេះ វាផ្តល់ទាំងផលអាក្រក់ និងផលល្អដល់សុខភាពអាស្រ័យលើអ្នកទទួលទាន ។ យោងតាមការសិក្សាពីមុនមកបានបង្ហាញថា កាហ្វេពិតជាផ្តល់ផលល្អដល់សុខភាព ប្រសិនជាអ្នកប្រើប្រាស់វាក្នុងកម្រិតមធ្យម៕
ចែករំលែកព័តមាននេះ