រាជធានីភ្នំពេញ ៖ គ្មានអ្វីគួរឱ្យងឿងឆ្ងល់នោះទេ ដែលជំងឺទឹកនោមផ្អែម និងជំងឺតម្រងនោមស្ថិតក្នុងចំណោមជំងឺរ៉ាំរ៉ៃធ្ងន់ធ្ងរជាងគេនៅក្នុងប្រទេសកម្ពុជា និងមានមនុស្សជាច្រើនដែលកំពុងទទួលរងផលប៉ះពាល់ដោយសារជំងឺទាំងពីរនេះ និងមានចំនួនកើនឡើងជារៀងរាល់ឆ្នាំ ហើយមានតែមួយចំនួនតូចប៉ុណ្ណោះដែលស្វែងរកការព្យាបាលបានត្រឹមត្រូវ ។ នេះបើយោងតាមការធ្វើបទបង្ហាញពីសំណាក់លោក ស្រីវេជ្ជបណ្ឌិត Petring Prajuabpransri វេជ្ជបណ្ឌិតឯកទេសផ្នែកជំងឺក្រពេញអ័រមូន និងលោកវេជ្ជបណ្ឌិត Tatpong Chit-ua-aree វេជ្ជបណ្ឌិតឯកទេសផ្នែកជំងឺតម្រងនោម មកពីមន្ទីរពេទ្យបំរុងរ៉ាត់អន្តរជាតិ Bumrunggrad International ។ ការធ្វើបទបង្ហាញនេះប្រព្រឹត្តទៅកាលពីព្រឹកថ្ងៃទី៤ ខែតុលា ឆ្នាំ២០១៥ នៅសណ្ឋាគារ Intercontinental Phnom Penh រាជធានីភ្នំពេញ ។
លោកស្រីវេជ្ជបណ្ឌិត Petpring Prajuabpransjri វេជ្ជបណ្ឌិតឯកទេសផ្នែកជំងឺក្រពេញអ័រមូនបានថ្លែងថា សព្វថ្ងៃមានប្រជាពលរដ្ឋកម្ពុជារហូតដល់ទៅជាង២ម៉ឺននាក់ និងអ្នកជំងឺមកពីប្រទេសផ្សេងៗទៀតមានចំនួនជាង៥០ម៉ឺននាក់ដែលមានជំងឺទឹកនោមផ្អែម ជំងឺលើសឈាម និងជំងឺតម្រងនោមកំពុងទៅរកការព្យាបាលនៅមន្ទីរពេទ្យបំរុងរ៉ាត់អន្តរជាតិ ។ អ្នកជំងឺទឹកនោមផ្អែម និងជំងឺលើសឈាមកំពុងតែវាយលុកទៅលើមនុស្សគ្រប់គ្នា និងកំពុងតែមានការកើនឡើងជាលំដាប់នាពេលបច្ចុប្បន្ន ហើយវាក៏ជាប្រភេទជំងឺដែលរ៉ាំរ៉ៃធ្ងន់ធ្ងរ និងត្រូវព្យាបាលក្នុងរយៈពេលយូរផងដែរ ។
លោកស្រីវេជ្ជបណ្ឌិតក៏បានបន្តទៀតថា រាល់អ្នកដែលកើតជំងឺនេះ គួរតែរកការព្យាបាលឱ្យបានត្រឹមត្រូវ ដោយប្រើប្រាស់ថ្នាំបង្ការ និងធ្វើការព្យាបាលឱ្យបានទៀងទាត់បំផុត ។ ជាពិសេសត្រូវធ្វើការផ្លាស់ប្តូលើការរស់នៅ ដោយទទួលទានរបបអាហារទៅតាមការណែនាំរបស់គ្រូពេទ្យឱ្យបានត្រឹមត្រូវចៀសវាងកុំឱ្យលើសជាតិស្ករក្នុងខ្លួនជាបន្តទៀត ។ គួរតែហាត់ប្រាណឱ្យបាន៣០នាទីក្នុងមួយថ្ងៃយ៉ាងតិច និងត្រូវតែមានសកម្មភាពជាប្រចាំ ដើម្បីបញ្ចុះទម្ងន់ និងត្រូវតែបន្តព្យាបាលដោយការលេបថ្នាំ និងចាក់ថ្នាំឱ្យបានខ្ជាប់ខ្ជួនទៅតាមការណែនាំរបស់គ្រូពេទ្យ ។
លោកវេជ្ជបណ្ឌិត Tatpong Chit-ua-aree វេជ្ជបណ្ឌិតឯកទេសផ្នែកជំងឺតម្រងនោមបានថ្លែងទៀតថា ជំងឺតម្រងនោមគឺជាប្រភេទជំងឺដែលមិនបង្ហាញពីរោគសញ្ញាជាមុនឡើយ ហើយក៏ជាប្រភេទជំងឺដែលរ៉ាំរ៉ៃ និងធ្ងន់ធ្ងរផងដែរដែលតែងកើតឡើងទៅលើអ្នកដែលមានជំងឺទឹកនោមផ្អែម និងលើសឈាម ។ រាល់អ្នកដែលមានប្រភេទជំងឺទាំងនេះ គួរតែទៅរកការពិគ្រោះឬព្យាបាលឱ្យបានមុនពេលដែលក្រលៀនរបស់យើងខូច ឬក៏លែងដំណើរការ ។ លោកវេជ្ជបណ្ឌិតបានលើកឡើងទៀតថា កោសិកាក្រលៀន មានតួនាទីដ៏សំខាន់ប្រៀបដូចជាតម្រងកាហ្វេយ៉ាងដូច្នោះដែរ ដោយដើរតួនាទីជាអ្នកចម្រាញ់ជាតិពុលឱ្យចេញពីខ្លួនប្រាណរបស់យើង និងវារក្សាទុកតែសារជាតិណាដែលល្អប៉ុណ្ណោះដើម្បីយកទៅចិញ្ចឹមរាងកាយរបស់យើង។ ប្រសិនបើកោសិកាក្រលៀនយើងខូចហើយគឺវានឹងហូរចេញក្រៅមកវិញដែរ ដូចជាជាតិប្រូតេអីុន និងឈាមក៏ហូរចូលមកក្នុងប្លោកនោមដែរ បង្កឱ្យមានជាតិពុលច្រើននៅក្នុងខ្លួនរបស់យើង ។ ដូច្នេះអ្នកជំងឺត្រូវតែលេបវីតាមីនD កាល់ស្យូម ឬក៏លេបអ័រមូនដើម្បីធ្វើឱ្យដំណើរសម្ពាធឈាមនៅក្នុងសភាពធម្មតា ការពារជាសំខាន់គឺការពារលើសឈាម និងកុំឱ្យឡើងជាតិស្ករនោះខ្លាំងពេក ។ រាល់អ្នកជំងឺដែលមកព្យាបាលក្រលៀនរបស់គាត់ម្នាក់ៗគឺតែងតែបានធ្វើឡើងនៅពេលដែលជំងឺរបស់គាត់ហួសពេលទៅហើយ ដោយនៅសល់តែត្រឹមពី១០ទៅ២០%ប៉ុណ្ណោះ ទើបពួកគាត់ដឹងខ្លួនថាមានជំងឺនេះក្នុងខ្លួន ព្រោះជាជំងឺមួយដែលកើតឡើងដោយស្ងាត់ស្ងៀមបំផុត ។
មន្ទីរពេទ្យបំរុងរ៉ាត់អន្តរជាតិ ត្រូវបានបង្កើតឡើងនាឆ្នាំ១៩៩០ ជាមន្ទីរពេទ្យពហុព្យាបាលឯកទេសលំដាប់ពិភពលោក ក្នុងរាជធានីបាងកកនៃព្រះរាជាណាចក្រថៃឡង់ដិ៍ ដែលបច្ចុប្បន្នទទួលបានចំណាត់ថ្នាក់អន្តរជាតិជាមន្ទីរពេទ្យឯកជនធំជាងគេនៅអាស៊ីអាគ្នេយ៍ ដែលមានវេជ្ជបណ្ឌិតឯកទេសសុទ្ធតែបានឆ្លងកាត់កម្មសិក្សាជាលក្ខណៈសកលចំនួន៩០០នាក់ និងមានបន្ទប់អ្នកជំងឺចំនួន៥៥៤គ្រែ មជ្ឈមណ្ឌលឯកទេសជាង៣០ប្រភេទ ។ ជារៀងរាល់ឆ្នាំមន្ទីរពេទ្យបំរុងរ៉ាត់អន្តរជាតិ តែងតែទទួលពិនិត្យ និងព្យាបាលអ្នកជំងឺបានជាង១លាននាក់ ដោយជាង៤០ម៉ឺននាក់ជាជនជាតិបរទេសមកពី១៩០ប្រទេសនៅទូទាំងពិភពលោក ៕
ចែករំលែកព័តមាននេះ