អ្នកស្រាវជ្រាវរបស់អាមេរិកបានអះអាងថា ទឹកសណ្តែក(ពណ៌ស)មិនត្រឹមតែផ្តល់ផលល្អសម្រាប់អ្នកខ្វះជាតិស្ករប៉ុណ្ណោះទេ ប៉ុន្តែវាក៏ផ្តល់ផលល្អដល់សុខភាពថ្លើមផងដែរ។
ក្រុមអ្នកស្រាវជ្រាវមកពីសាកលវិទ្យាល័យអីុលីណយ សហរដ្ឋអាមេរិកបានរកឃើញថា ប្រូតេអីុនសណ្តែកជាពិសេសនៅក្នុងតៅហ៊ូ អាចកាត់បន្ថយការកកើតខ្លាញ់អាក្រក់ក្នុងថ្លើម។ ទោះជាយ៉ាងណា លទ្ធផលនៃការរកឃើញនេះ គឺគ្រាន់តែជាដំណាក់កាលដំបូងប៉ុណ្ណោះ។ អំឡុងការពិសោធ ពួកអ្នកវិទ្យាសាស្ត្របានធ្វើការពិនិត្យមើលជាចម្បងលើថ្លើមកណ្តុរស្គមនិងកណ្តុរធាត់ក្រោយពីឱ្យចំណីស៊ីដែលមានផ្ទុកប្រូតេអីុនសណ្តែកដូចគ្នា ។ ជាលទ្ធផលបង្ហាញថា កណ្តុរស្គមគ្មានការខុសប្លែកឡើយ ប៉ុន្តែកណ្តុរធាត់វិញ កម្រិតខ្លាញ់នៅក្នុងថ្លើមរបស់វាត្រូវបានកាត់បន្ថយអស់២០% ។ ចំណែកខ្លាញ់អាក្រក់ធ្វើឱ្យគ្រោះថ្នាក់ដល់បេះដូងក៏ត្រូវបានកាត់បន្ថយក្នុងកម្រិតដូចគ្នាផងដែរ ។ នេះមានន័យថា ទឹកសណ្តែកអាចទប់ទល់ប្រឆាំងនឹង «ជំងឺខ្លាញ់ក្នុងថ្លើម» បានយ៉ាងល្អប្រសើរ ។
អ្នកដឹកនាំការសិក្សាស្រាវជ្រាវ វេជ្ជបណ្ឌិត Hong Chen មកពីសាកលវិទ្យាល័យអីុលីណយបានបញ្ជាក់ថា ស្ទើរ១/៣នៃមនុស្សពេញវ័យជាពិសេសនៅអាមេរិក កើតមានជំងឺខ្លាញ់ក្នុងថ្លើម ហើយភាគច្រើននៃពួកគេគឺគ្មានរោគសញ្ញាលេចចេញទេ ។ ការធាត់ដុះពោះលើសទម្ងន់ គឺជាកត្តាប្រឈមដ៏ផុយស្រួយមួយនៃជំងឺខ្លាញ់ក្នុងថ្លើម ។ នៅពេលខ្លាញ់ប្រមូលផ្តុំក្នុងសរីរាង្គមួយដែលមិនមានតួនាទីជាកន្លែងស្តុកខ្លាញ់តួយ៉ាងដូចជាថ្លើម ដូច្នេះមុខងារសំខាន់របស់សរីរាង្គនោះស្ថិតក្នុងភាពដ៏គ្រោះថ្នាក់ ។
លោកវេជ្ជបណ្ឌិតបានបន្ថែមថា បុគ្គលដែលធាត់តែងមានបញ្ហានៃការធ្វើដំណើរ ហើយខ្លាញ់ច្រើនលើសលប់អាចហៀរចេញពីថ្លើម ៕
ចែករំលែកព័តមាននេះ