ខេត្តកំពង់ចាម ៖ ដោយមិនបន្ធូរដៃនោះទេ ឯកឧត្តមអ៊ុន ចាន់ដាអភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ រួមនឹងសហការី គឺបន្តបេសកកម្មចុះពិនិត្យគោលដៅសំខាន់ៗនាព្រឹកថ្ងៃទី១៦ ខែមេសា ឆ្នាំ២០២១…
ខេត្តកំពង់ចាម ៖ ដោយមិនបន្ធូរដៃនោះទេ ឯកឧត្តមអ៊ុន ចាន់ដាអភិបាលខេត្ត និងជាប្រធានគណៈកម្មការប្រយុទ្ធប្រឆាំងនឹងជំងឺកូវីដ-១៩ រួមនឹងសហការី គឺបន្តបេសកកម្មចុះពិនិត្យគោលដៅសំខាន់ៗនាព្រឹកថ្ងៃទី១៦ ខែមេសា ឆ្នាំ២០២១ ដោយមានកម្មការិនីរោងចក្រកាត់ដេរសម្លៀកបំពាក់នៅរាជធានីភ្នំពេញលួចធ្វើដំណើរមកកំពង់ចាម ត្រូវបានរកឃើញវិជ្ជមានកូវីដ-១៩ ។
ក្នុងនោះរួមមាន១.ស្រុកបាធាយ-ស្រុកពញាឮ ខេត្តកណ្តាល ២.ស្រុកជើងព្រៃ-ស្រុកតាំងគោកខេត្តកំពង់ធំ ៣.ព្រំប្រទល់ស្រុកចំការលើ-ស្រុកបារាយណ៍ ខេត្តកំពង់ធំ ។ ដើម្បីពង្រឹងដល់កងកម្លាំងសមត្ថកិច្ចចម្រុះក្នុងវិធាននៃការទប់ស្កាត់មិនឱ្យប្រជាពលរដ្ឋចេញចូលឆ្លងកាត់រវាងខេត្ត និងខេត្ត ។
ទោះជាបែបនេះក្តី មានកម្មការិនីរោងចក្រម្នាក់បានលួចធ្វើដំណើរពីរាជធានីភ្នំពេញមកលេងស្រុកកំណើតនៅស្រុកចំការលើ ខេត្តកំពង់ចាម មានវិជ្ជមានកូវីដ-១៩ ។
លោកផេន សុផល អភិបាលស្រុកបាធាយ ប្រាប់ឲ្យដឹងថា ចាប់តាំងពីមានការណែនាំរបស់អាជ្ញាធរខេត្តកម្លាំងរដ្ឋបាលស្រុកបានរៀបចំកម្លាំងដាក់ប៉ុស្តិ៍យាមប្រចាំការចំនួនពីរគោលដៅក្នុងនោះមាន មួយផ្នែកជាប់ និងស្រុកមុខកំពូលខេត្តកណ្ដាល និងមួយផ្នែកទៀតជាប់ស្រុកពញ្ញាឮខេត្តកណ្ដាល ដោយអនុវត្តតាមការណែនាំលេខ៤៤ របស់ប្រមុខរាជរដ្ឋាភិបាលកម្ពុជា ។ ដើម្បីទប់ស្កាត់មិនឲ្យមានការធ្វើដំណើរពីសំណាក់ប្រជាពលរដ្ឋធ្វើដំណើរពីខេត្តមួយឆ្លងទៅខេត្តមួយ ជៀសវាងបង្ការកុំឲ្យឆ្លងជំងឺកូវីដ ។
បន្ទាប់ពីសម្ដេចតេជោសែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសបិទរាជធានីភ្នំពេញនិងក្រុងតាខ្មៅ រយៈពេល២ សប្តាហ៍បន្តទៀត រហូតមកដល់ពេលនេះនៅតាមដងផ្លូវ គឺមានសភាពស្ងប់ស្ងាត់ គឺមានតែរថយន្តដឹកទំនិញបើកឆ្លងកាត់តែប៉ុណ្ណោះ ។ក្នុងពេលអញ្ជើញចុះពិនិត្យឯកឧត្តមអភិបាលខេត្តបានក្រើនរំលឹកដល់អាជ្ញាធរស្រុកត្រូវតែរឹតបន្តឹងយកចិត្តទុកដាក់ឲ្យបានខ្ពស់ធ្វើយ៉ាងណាទើបប្រើអត់ការធ្វើដំណើរអោយមានប្រសិទ្ធភាពដើម្បីជៀស វាងបង្ការកុំឲ្យមានជំងឺកូវីដ ។
លោកអូត ឈាងលី អភិបាលស្រុកជើងព្រៃប្រាប់ឲ្យដឹងថា ក្នុងពេលដែលឯកឧត្តមអភិបាលខេត្តអញ្ជើញចុះពិនិត្យគោលដៅព្រំប្រទល់ស្រុកជើងព្រៃជាមួយនឹងស្រុកតាំងគោកខេត្តកំពង់ធំ អានជួយឧបត្ថម្ភក្នុងនោះរួមមាន ប្រដាប់វាស់កំដៅ មី ទឹកបរិសុទ្ធរួមនឹងថវិកាជូនដល់កងកម្លាំងប្រដាប់អាវុធ ។ នៅតាមដងផ្លូវមានសភាពស្ងប់ស្ងាត់ដោយប្រជាពលរដ្ឋនៅក្នុងស្រុកជើងព្រៃខ្លាចរអានឹងជំងឺកូវីដ នាំគ្នាសំងំតែនៅក្នុងផ្ទះ ដោយមិនចេញទៅណានោះទេ ។ ទាំងនេះគឺប្រជាពលរដ្ឋមានការយល់ដឹងដោយមានស្មារតីប្រុងប្រយ័ត្នទៀតផង ។
សូមបញ្ជាក់ថា កន្លងទៅឯកឧត្តមអ៊ុន ចាន់ដា អភិបាលខេត្ត ឯកឧត្តមខ្លូត ផន ប្រធានក្រុមប្រឹក្សាខេត្ត អមដំណើរដោយមន្ត្រីថ្នាក់ដឹកនាំខេត្តជាច្រើនបានអញ្ជើញឡើងលើភ្នំប្រុស ភ្នំស្រី ក្នុងស្រុកជើងព្រៃ បួងសួង សូមសេចក្តីសុខសម្រាប់ប្រជាពលរដ្ឋនៅក្នុងស្រុកជាងព្រៃក៏ដូចជា នៅក្នុងខេត្តកំពង់ចាមទាំងមូលឱ្យចៀសផុតពីឧបទ្រពចង្រៃ ។ ទីនេះទៅបានគេចាត់ទុកជាកន្លែងដែលមានបារមីស័កសិទ្ធហើយការបួងសួងអ្វីមួយច្រើនតែបានសម្រេចតាមបំណងប្រាថ្នា ។
លោកវរសេនីយ៍ឯកប៉ែន ទៀងចំរើន អធិការនគរបាលស្រុកចំការលើប្រាប់ឲ្យដឹងដែរថា ឯកឧត្តមអភិបាលខេត្តនិងសហការីនាព្រឹកថ្ងៃទី១៦ មេសាបានអញ្ជើញចុះពិនិត្យគោលដៅប្រចាំព្រំប្រទល់ស្រុកចំការលើ និងស្រុកបារាយណ៍ខេត្តកំពង់ធំ ។ក្នុងនោះមានឧបត្ថម្ភ គ្រឿងឧបភោគ បរិភោគ ប្រដាប់វាស់កំដៅ ជូនដល់កម្លាំងដែលនៅប្រចាំការ ដោយជម្រុញធ្វើយ៉ាងណារឹតបន្តឹងការធ្វើដំណើរចេញចូលឱ្យមានប្រសិទ្ធភាព ។
នៅតាមដងផ្លូវ គឺមានតែរថយន្តដឹកទំនិញ រថយន្តដឹកកសិផលបើកឆ្លងកាត់ប៉ុស្តិ៍យាមប្រចាំការជាមួយនោះឯកឧត្តមអភិបាលខេត្តបានអញ្ជើញចូលបុណ្យសពលោកវរសេនីយ៍ត្រីមុំ ធន់អាយុ៥៣ ឆ្នាំទទួលផែនគ្រឿងញៀននៃអធិការរដ្ឋាននគរបាលស្រុកចំការលើ ដែលបានស្លាប់ដោយសារគាំងបេះដូង ។ ដោយបានអញ្ជើញទៅដល់ផ្ទះបុណ្យនៅភូមិពែងមាសត្បូង ឃុំស្ពឺ ស្រុកចំការលើ ។
យោងតាមសេចក្តីប្រកាសព័ត៌មានរបស់រដ្ឋបាលខេត្តកំពង់ចាម ចុះថ្ងៃទី១៦ មេសា ២០២១ មានប្រជាពលរដ្ឋចំនួន២នាក់ក្នុងនោះរួមមាន: ១.ឈ្មោះហូ ហ៊ា ភេទប្រុស អាយុ៣២ឆ្នាំ មានមុខរបរកម្មករសំណង់ ទីលំនៅបច្ចុប្បន្នរស់នៅភូមិទ្រា ស្វាយពោធិ៍ ស្រុកស្រីសន្ធរ ២.ឈ្មោះកេន សំអាត ភេទស្រីអាយុ២៦ឆ្នាំ ជាកម្មការិនីរោងចក្រហ្វជូណាន នៅត្រពាំងថ្លឹង ផ្លូវវេងស្រេងរាជធានីភ្នំពេញ មានទីលំនៅបច្ចុប្បន្នភូមិថ្នល់បែកកើត ឃុំស្វាយទាប ស្រុកចំការលើ ខេត្តកំពង់ចាម ត្រូវបានរកឃើញវិជ្ជមានកូវីដ-១៩ ដោយមានអ្នកប៉ះពាល់ផ្ទាល់ចំនួន៩នាក់ និងប្រយោលចំនួន៦នាក់កំពុងតែធ្វើចត្តាឡីស័ក ៕
ចែករំលែកព័តមាននេះ