រាជធានីភ្នំពេញ ៖ លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល បានអំពាវនាវដល់បងប្អូនប្រជាពលរដ្ឋទាំងអស់ សុំរក្សាភាពស្ងប់ស្ងៀម ជាជាងសម្រុកទៅផ្សារ ដែលបង្កើតបានជាភាពកកកុញមនុស្សច្រើន ជម្រុញនូវហានិភ័យកាន់តែខ្ពស់ឡើងថែមទៀតដល់បងប្អូន ក្នុងការឆ្លងវីរុសកូវីដ-១៩ ។
បងប្អូនអាចនឹងឆ្លងជំងឺកូវីដ-១៩ បានគ្រប់ពេលនៅពេល ដែលនៅកន្លែងប្រជ្រៀតគ្នាខ្លាំងពេកនោះ ឫកន្លែងដែលមិនមានគម្លាតគ្នា ពីមួយម៉ែត្រកន្លះឡើង ហើយមិនមានពាក់ម៉ាស់ និងលាងដៃញឹកញាប់ទេនោះ ។ សូមត្រូវចងចាំថា វីរុសកូវីដ-១៩ សប្បាយចិត្តខ្លាំង ចូលចិត្តខ្លាំង និងពេញចិត្តជាទីបំផុត ក្នុងការដើរចម្លងពីបុគ្គលម្នាក់ទៅម្នាក់ទៀត បានយ៉ាងងាយស្រួល ដោយមិនមានរបាំងហាមឃាត់ ឫសម្លាប់វីរុសដ៏សាហាវនេះនោះ ។
សុំជឿជាក់លើវិធានការរបស់រាជរដ្ឋភិបាល ដែលមានការគិតគូរត្រឹមត្រូវ នឹងមិនបិទជិតឈឹង មិនឲ្យមានវិធីក្នុងការរកម្ហូបអាហារទទួលទាននោះឡើយ ។ សូមចូលរួមអនុវត្តវិធានការ ៣ការពារ ៣កុំ ចាក់វ៉ាក់សាំងការពារកូវីដ-១៩ និងចូលឆ្នាំនៅផ្ទះ ដើម្បីឈ្នះការវ៉ៃលុកកូវីដ-១៩ ដោយបុគ្គលមានការទទួលខុសត្រូវខ្ពស់ សម្រាប់សុខភាពផ្ទាល់ខ្លួន សុខភាពគ្រួសារខ្លួន និងដើម្បីសហគមន៍យើង ។
ការប្រកាសរបស់លោកជំទាវ ឱ វណ្ណឌីន ធ្វើឡើង ក្រោយពីមានពលរដ្ឋសម្រុកចូលផ្សារទិញទំនិញក្រោយបែកធ្លាយសារមិនផ្លូវការទាក់ទងនឹងការបិទរាជធានីភ្នំពេញ ។ សូមបញ្ជាក់ថា នាព្រលប់ថ្ងៃទី ១៤ មេសា ចំថ្ងៃទី១ នៃការចូលឆ្នាំខ្មែរ មានបែកធ្លាយព័ត៌មានមិនទាន់ផ្លូវការមួយ ទាក់ទងនឹងការគ្រោងបិទរាជធានីភ្នំពេញ និងក្រុងតាខ្មៅខេត្ដកណ្ដាល រយៈពេល២សប្ដាហ៍ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ។ ក្រោយការចែកចាយនូវសារសម្លេងដែលបើកធ្លាយនោះ គឺមានប្រជាពលរដ្ឋជាច្រើនបានសម្រុកនាំគ្នាទៅទិញនិងរបស់របរទុកប្រើប្រាស់នៅតាមហាងទំនើបនិងផ្សារជាច្រើនកន្លែងក្នុងរាជធានីភ្នំពេញ ។ តាមរូបភាពដែលចែកចាយនៅតាមបណ្ដាញសង្គម ឃើញមានមនុស្សណែនតាន់តាប់នៅតាមទីផ្សារ មិនថាផ្សារលក់ទំនិញធម្មតាឬផ្សារទំនើប៕
ចែករំលែកព័តមាននេះ