ផ្អែកតាមការស្រាវជ្រាវរបស់ក្រុមអ្នកវិទ្យាសាស្ត្រនៅសាកលវិទ្យាល័យ University of the Pacificសហរដ្ឋអាមេរិកបានបង្ហាញថា ទទួលទានបណ្តាភេសជ្ជៈបង្កើនថាមពលអាចនឹងធ្វើឱ្យសម្ពាធឈាមឡើងខ្ពស់ព្រមទាំងបណ្តាលឱ្យមានបញ្ហាបេះដូងដែលឈានដល់បាត់បង់អាជីវិតបាន ។
បន្ទាប់ពីបានរកឃើញថា ភេសជ្ជៈខាងដើមអាចបង្កើនសម្ពាធឈាម និងរំខានដល់ចង្វាក់ធម្មជាតិរបស់បេះដូង បណ្តាវេជ្ជបណ្ឌិតដែលជាក្រុមស្រាវជ្រាវបានព្រមានដល់បណ្តាជនដែលមានជំងឺលើសឈាមឱ្យប្រុងប្រយ័ត្ន និងគិតគូរឱ្យបានល្អិតល្អន់ មុននឹងទទួលទានភេសជ្ជៈប្រភេទនេះ ។
នៅក្នុងការពិសោធលើមនុស្សអាយុពី១៨ដល់៤៥ឆ្នាំ ក្រុមអ្នកសិក្សាបានបែងចែកកិច្ចការរបស់ខ្លួនជា២ផ្នែកគឺ៖
ផ្នែកទី១-ពួកគេបានពិនិត្យមើលលើ QT Interval (ជាចំណែកមួយនៃចង្វាក់បេះដូងចន្លោះពេលបុកខ្លាំងនិងបុកតិច) របស់មនុស្ស៩៣នាក់ដែលទើបផឹកភេសជ្ជៈបង្កើនថាមពលអស់ពី១ទៅ៣កំប៉ុង ។ ជាលទ្ធផលបង្ហាញថា QT Interval មនុស្សទាំងនេះមានល្បឿនអូសបន្លាយដល់១០មីល្លីវិនាទីវែងជាងអ្នកមិនផឹក ។ សូមបញ្ជាក់ថា នៅពេលដំណើរQT Interval របស់បេះដូងកាន់តែបន្លាយពេលវែង វានឹងធ្វើឱ្យដំណើរលោតរបស់បេះដូងមិនទៀងទាត់ ហើយគ្រោះថ្នាក់អាចនឹងកើតភ្លាមៗផងដែរ ។
ផ្នែកទី២-ក្រុមអ្នកសិក្សាបានវាស់ឈាមអ្នកស្ម័គ្រចិត្ត១៣២នាក់ ហើយជាលទ្ធផលបានបង្ហាញថា អ្នកដែលបានផឹកភេសជ្ជៈបង្កើនថាមពលអស់២-៣កំប៉ុង សម្ពាធឈាមលើប្រដាប់វាស់ (យកលេខផ្នែកខាងលើ-Systolic blood pressure) កើនជាមធ្យម ៣.៥ពិន្ទុ ។
អ្នកដឹកនាំការស្រាវជ្រាវ វេជ្ជបណ្ឌិត Sachin Shah បានថ្លែងថា ការជាប់ទាក់ទងគ្នារវាងភេសជ្ជៈបង្កើនថាមពល និងកំណើនសម្ពាធឈាម Systolic គឺជាការពិតនិងជាបញ្ហាគួរឱ្យបារម្ភ ។ ការសិក្សាស្រាវជ្រាវបន្ថែមទៀតលើកក្រោយចាំបាច់ត្រូវវាយតម្លៃពីផលប៉ះពាល់លើចង្វាក់បេះដូង ។ អ្នកមានជំងឺលើសឈាមឬមាន QT Interval វែងគួរប្រុងប្រយ័ត្ន និងពិចារណាមុននឹងទទួលទានភេសជ្ជៈបង្កើនថាមពលនេះ ៕
ចែករំលែកព័តមាននេះ