ខេត្តបាត់ដំបង៖ នៅថ្ងៃទី១២ ខែមេសានេះ អភិបាលខេត្តបាត់ដំបង ឯកឧត្តម ងួន រតនៈ បានចេញលិខិត សម្រេច​បិទ​ផ្នែកខាងក្នុងផ្សារ ( តួផ្សារ ) ចំនួន ៨ផ្សារ ក្នុងក្រុងបាត់ដំបង ជាបណ្តោះអាសន្ន រួមមាន៖ ផ្សារ​ធំបាត់ដំបង ( ផ្សារណាត់ ) ផ្សារបឹងឈូក ផ្សារ១៣មករា ផ្សារអប្សរាផ្សារលើ ផ្សាររោងល្ខោន ផ្សារវត្តលៀប ផ្សារពោធិ៍វង្ស និងផ្សារទំនើប​ភូពុយ​។

ការបិទផ្នែកខាងក្នុងផ្សារទាំង ៨នេះ មានរយៈពេល ៧ថ្ងៃ ចាប់អនុវត្តពីថ្ងៃទី១៤ ខែមេសា ឆ្នាំ២០២១ រហូតដល់​ថ្ងៃទី២០ ខែមេសា ឆ្នាំ២០២១ ក្នុងគោលបំណង​ដើម្បីបង្ការ​ការពារទប់ស្កាត់​ការឆ្លងរាលដាល​នៃជំងឺកូវីដ១៩ នៅក្នុងសហគមន៍អំឡុងពេលចូលឆ្នាំថ្មី ប្រពៃណីជាតិ។

ក្នុងសេចក្តីសម្រេចនេះ ក៏បានប្រកាសអនុញ្ញាត​ឲ្យលក់​នៅផ្នែកខ្លះ នៃបរិវេណខាងក្រៅផ្សារ ដូចជា បន្លែ ត្រី សាច់ គ្រឿង​ឧបភោគបរិភោគ ដែលជាតម្រូវការ​ចាំបាច់​រស់នៅប្រចាំថ្ងៃ ដោយត្រូវអនុវត្ត​នូវវិធានការ​សុខាភិបាល ក្នុងការរក្សាគម្លាត​សង្គម គម្លាតបុគ្គល ចាប់ពី ១,៥ម៉ែត្រឡើងទៅ ពាក់ម៉ាស់ និងលាងដៃ​៕