ខេត្តសៀមរាប ៖ នាថ្ងៃទី១១ ខែមេសា ឆ្នាំ២០២១ លោក ទៀ សីហា អភិបាលខេត្តបានអញ្ជើញចុះពិនិត្យការចាក់វ៉ាក់សាំងបង្ការជំងឺកូវីដ-១៩ (ស៊ីណូវ៉ាក់) ជូនដល់បងប្អូនជាសមាជិកសមាគមអតីតយុទ្ធជនខេត្តសៀម រាប នៅមន្ទីរពេទ្យបង្អែកខេត្ត។ ក្នុងឱកាសនោះដែរ បងប្អូនជាសមាជិក សមាគមអតីតយុទ្ធជនកម្ពុជាខេត្ត ក្នុងក្រុងសៀមរាប ចំនួន៩៣៣នាក់ បានទទួលការចាក់វ៉ាក់សាំង ស៊ីណូវ៉ាក់ បង្ការកូវីដ-១៩ ស្របពេលដែលដើមខែមេសានេះ ដំណើរការវិភាគចុងក្រោយ របស់អង្គការសុខភាពពិភពលោក (WHO) បានមើលឃើញថា វ៉ាក់សាំងប្រឆាំងកូវីដ-១៩ ផលិតដោយប្រទេសចិន ស៊ីណូវ៉ាក់ និងស៊ីណូហ្វាម មានប្រសិទ្ធភាពគ្រប់គ្រាន់តាមលក្ខខណ្ឌរបស់ WHO ហើយ។
តាមការបញ្ជាក់របស់លោកឧត្តមសេនីយ៍ទោ ស៊ិន ភាត់ ប្រធានសមាគមអតីតយុទ្ធជនកម្ពុជាខេត្ត និងជាមេបញ្ជា ការតំបន់ប្រតិបត្តិការសឹករងសៀមរាប បានបញ្ជាក់ឲ្យដឹងផងដែរថា ក្រោមការយកចិត្តទុកដាក់របស់ប្រមុខរាជរដ្ឋាភិបាល និងសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងឯកឧត្តម នាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស និងជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងជាអគ្គលេខាធិការគណៈអចិន្ត្រៃយ៍ នៃសមាគមអតីតយុទ្ធកម្ពុជា ក៏ដូចអាជ្ញាធរខេត្តសៀមរាប ក្នុងការជំរុញដល់បងប្អូនជាសមាជិកសមាគមអតីតយុទ្ធ ជនកម្ពុជាខេត្ត បានទទួលការចាក់វ៉ាក់សាំងបង្ការជំងឺកូវីដ-១៩ (ស៊ីណូវ៉ាក់) ឲ្យបានគ្រប់ៗគ្នា។
ជាក់ស្តែងថ្ងៃនេះ បងប្អូនសមាជិកសមាគមអតីតយុទ្ធជនកម្ពុជា ក្នុងក្រុងសៀមរាប បានទទួលចាក់នៅមន្ទីរពេទ្យបង្អែកខេត្ត និងបងប្អូននៅតាមបណ្តាស្រុកទាំង១១ ចាក់នៅតាមមន្ទីរ ពេទ្យបង្អែកស្រុក និងមណ្ឌលសុខភាពមួយចំនួនដែលបានកំណត់ផងដែរ។ មានប្រសាសន៍សំណេះសំណាលជាមួយបងប្អូននាឱកាសនោះ លោក ទៀ សីហា អភិបាលខេត្ត ក៏បានបញ្ជាក់ពីការយកចិត្តទុក ដាក់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកនាយឧត្តមសេនីយ៍ គន់ គីម ទេសរដ្ឋមន្ត្រី ទទួលបន្ទុកបេសកកម្មពិសេស ចំពោះបងប្អូនជាសមាជិកសមាគមអតីតយុទ្ធជនកម្ពុជា ដែលមានគុណបំណាច់ចំពោះជាតិមាតុភូមិក្នុងកិច្ចការពារកសាង និងអភិវឌ្ឍន៍ប្រទេសសំខាន់ក្នុងការចូលរួមថែរក្សា ការពារនូវសុខសន្តិភាព ដល់មាតុភូមិដ៏បវរនៃយើង។
ម្យ៉ាងទៀតបងប្អូនក៏ជាវីរៈជនដ៏ឆ្នើម និងជារៀមច្បងដែលបានចូលរួមកសាងនូវសមទ្ធិផលជាច្រើន ដើម្បីជាគំរូដល់អ្នកជំនាន់ក្រោយ សិក្សារៀនសូត្រតាម។ លោកបានបន្តទៀតថា ការចាក់វ៉ាក់សាំងប្រឆាំងជំងឺកូវីដ-១៩ (ស៊ីណូវ៉ាក់) ជូនដល់បងប្អូនជាសមាជិកសមាគមអតីតយុទ្ធ ជនកម្ពុជាខេត្តនាពេលនេះ តាមគោលការណ៍ស្ម័គ្រចិត្ត មិនគិតកម្រៃ និងមិនប្រកាន់និន្នាការអ្វីនោះឡើយ។ ក្នុងនោះដែរ លោកក៏បាន ធ្វើការណែនាំ និងផ្តាំផ្ញើដល់បងប្អូន ដោយបានបញ្ជាក់ថា ទោះបីបងប្អូនបានទទួលការចាក់វ៉ាកសាំងរួច ក៏បងប្អូនត្រូវប្រតិបត្តិឲ្យបានត្រឹមត្រូវទៅតាមវិធានការណ៍របស់ប្រមុខរាជរដ្ឋាភិបាល៣កុំ ៣ការពារ ព្រមទាំងការណែនាំរបស់ក្រសួងសុខាភិបាល ដើម្បីធ្វើឲ្យវ៉ាក់សាំងដែលបងប្អូនបានទទួលពេលនេះ មានប្រសិទ្ធភាព ក្នុងការប្រយុទ្ធប្រឆាំងវីរុសកូវិដ-១៩។
នាឱកាសនោះដែរ លោកបានធ្វើការអំពាវនាវផងដែរ ដល់បងប្អូន ចូលរួមធ្វើការផ្សព្វផ្សាយ អំពីវិធានការរបស់រដ្ឋបាលខេត្តសៀមរាប អំពីបម្រាមគោចរនៅពេលយប់នៅក្រុងសៀមរាប ក៏ដូចតាមបណ្តាស្រុកចាប់ពីម៉ោង២០ រហូតដល់ម៉ោង៥ទៀបភ្លឺ ក្នុងគោលដៅ ដើម្បីប្រយុទ្ធប្រឆាំងបង្កាទប់ស្កាត់ការឆ្លងរីករាលដាលនៃជំងឺកូវីដ-១៩ នៅក្នុងសហគមន៍៕ ដោយ ៖ ច័ន្ទ រស្មី
ចែករំលែកព័តមាននេះ