ខេត្តកំពង់ឆ្នាំង ៖ ដើម្បីបង្ការនិងទប់ស្កាត់គ្រោះអគ្គិភ័យដែលបានកើតឡើងជាយថាហេតុ ក្នុងរដូវប្រាំងនាពេលនេះ ឆ្លងការដ្ឋាននគរបាលខេត្តបានបញ្ចេញរថយន្តពន្លត់អគ្គិភ័យជាច្រើនគ្រឿង ព្រមទាំងដាក់ឧគ្ឃោសនស័ព្ទបំពងសំឡេងពញ្ញាក់ស្មារតីដល់បងប្អូនប្រជាពលរដ្ឋ ឲ្យមានការប្រុងប្រយ័ត្នគ្រោះអគ្គិភ័យ ។
ក្បួនរថយន្តពន្លត់អគ្គិភ័យបានពញ្ញាក់ស្មារតីបងប្អូនប្រជាពលរដ្ឋនេះ បានធ្វើឡើងនៅព្រឹកថ្ងៃទី១០ មេសា នៅក្នុងភូមិសង្កាត់មួយចំនួន ក្រុងកំពង់ឆ្នាំង ។ លោកឧត្តមសេនីយ៍ត្រី លុយ ឌីណា ស្នងការងទទួលបន្ទុក បន្លត់បង្ការនិងទប់ស្កាត់គ្រោះអគ្គិភ័យបានបញ្ជាក់ថា អនុវត្តតាមវិធានការស្តីពីការទប់ស្កាត់គ្រោះអគ្គិភ័យតាមការណែនាំរបស់លោកឧត្តមសេនីយ៍ទោ ខូវ លី ស្នងការនគរបាលខេត្ត នៅព្រឹកនេះមរថយន្តពន្លត់អគ្គីភ័យចំនួន៧គ្រឿងរបស់ស្នងការដ្ឋាននគរបាលខេត្តបានចេញធ្វើការផ្សព្វផ្សាយស្តីពីវិធានការទប់ស្កាត់គ្រោះអគ្គីភ័យក្នុងរដូវប្រាំង ក៏ដូចជាក្នុងរដូវបុណ្យចូលឆ្នាំ ថម៉ីប្រពៃណីជាតិ ។ព្រមជាមួយនេះក៏បានផ្សព្វផ្សាយពីការចូលរួមទប់ស្កាត់ជំងឺ រីករាលដាល កូវីត19 ទូទាំងខេត្តកំពង់ឆ្នាំងផងដែរ ។
ក្នុងសម្លេងឧគ្ឃោសនៈស័ព្ទ ក៍បានណែនាំដល់បងប្អូនឲ្យមានការប្រុងប្រយ័ត្នចំពោះការដុតភ្លើងធូបទៀន ការចំអិនអាហារការចាកចេញទៅផ្ទះ ត្រូវពន្លត់ឲ្យបានរលត់ឲ្យបានត្រឹមត្រូវ នូវធូបទៀននិងត្រូវបិទចរន្តអគ្គិសនីមុនពេលចាកចេញពីផ្ទះជាមួយគ្នានេះផងដែរ ត្រូវដូរខ្សែភ្លើងចាស់ៗដែលងាយនឹងធ្វើឱ្យបង្កជាអគ្គីភ័យកើតឡើង ។ ទន្ទឹមនោះដែរក៏បានណែនាំដល់ប្រជាពលរដ្ឋអនុវត្តតាមវិធានការរបស់រាជរដ្ឋាភិបាលស្ដីពី 3 ការពារ 3 គុំដើម្បីទប់ស្កាត់ការរីករាលដាលនៃជំងឺកូវីដ19៕ ដោយ៖ ពៅ សុខហ៊ាន
ចែករំលែកព័តមាននេះ