ខេត្តកំពង់ស្ពឺ ៖ សាលាដំបូងខេត្តកំពង់ស្ពឺ នៅថ្ងៃទី១០ ខែមេសា ឆ្នាំ២០២១ នេះ បានសម្រេចឃុំខ្លួនយុវជនម្នាក់ ដាក់ពន្ធនាគារខេត្តកំពង់ស្ពឺ ដែលញុះញង់តាមបណ្ដាញសង្គម TikTok អំពីការចាក់វ៉ាក់សាំងការពារជំងឺកូវីដ-១៩ ។
យុវជនឈ្មោះ ប៉ាន់ សុភី អាយុ២៦ឆ្នាំ រស់នៅឃុំពោធិ៍ចំរើន ស្រុកបសេដ្ឋ ខេត្ដកំពង់ស្ពឺ មុខរបរអ្នកចិញ្ចឹមជ្រូក ត្រូវកម្លាំងនគរបាលចាប់ខ្លួន នាព្រឹកថ្ងៃទី០៩ ខែមេសា ឆ្នាំ២០២១ ។
ប្រភពពីសមត្ថកិច្ចបានឲ្យដឹងថា បុគ្គលរូបនេះ តែងតែបង្ហោះព័ត៌មាន ចោទប្រកាន់ដល់ការខិតខំប្រឹងប្រែងរបស់រាជរដ្ឋាភិបាលកម្ពុជា លើកនេះ បានថតវីដេអូហើយបង្ហោះចែកចាយនៅលើបណ្ដាញសង្គម TikTok ប្រឌិតព័ត៌មានថា វ៉ាក់សាំងរបស់ចិន ដែលកំពុងចាក់ជូនប្រជាពលរដ្ឋនេះ គឺមានភាពមិនច្បាស់លាស់ ។ ការប្រឌិតព័ត៌មាននេះ គឺមានចេតនាញុះញង់ និងធ្វើឲ្យការយល់ច្រឡំពីសំណាក់ប្រជាពលរដ្ឋខ្មែរ ៕
ចែករំលែកព័តមាននេះ