ខេត្តកំពង់ចាម៖ ដើម្បីទប់ស្កាត់ការឆ្លងរាលដាលជំងឺកូវីដ១៩ រដ្ឋបាលខេត្តកំពង់ចាម បានអនុវត្តតាមសេចក្តីណែនាំរបស់រាជរដ្ឋាភិបាល ក្នុងការបិទចរាចរណ៍ធ្វើដំណើរឆ្លងកាត់ខេត្តកំពង់ចាម នឹងខេត្តជាប់ព្រំប្រទល់ រួមមាន៖ ខេត្តកំពង់ធំ ខេត្តក្រចេះ ខេត្តត្បូងឃ្មុំ ខេត្តព្រៃវែង និងខេត្តកណ្ដាល។ ចរាចរណ៍នៅគល់ស្ពានគីហ្ស៊ូណា ដែលជាព្រំប្រទល់រវាងខេត្តកំពង់ចាម និងខេត្តត្បូងឃ្មុំ បានកកស្ទះយ៉ាងខ្លាំង នៅពេលអនុវត្តវិធានការ ហាមឃាត់ការធ្វើដំណើរឆ្លងកាត់ខេត្ត នាពេលនេះ។
ជាក់ស្ដែង នៅព្រឹកថ្ងៃទី៨មេសា ឆ្នាំ២០២១ ឯកឧត្តមអ៊ុន ចាន់ដា អភិបាលខេត្ត និងសហការី បានអញ្ជើញចុះពិនិត្យកម្លាំងគោលដៅយាមនៅព្រំប្រទល់ក្បាលស្ពានគីស្ស៊ុណា នឹងបន្តបេសកកម្ម ទៅស្រុកបាធាយ ក្នុងគោលបំណងធ្វើយ៉ាងណា ឲ្យប្រជាពលរដ្ឋគ្រប់រូប នាំគ្នាគោរព និងអនុវត្តតាម ដើម្បីឱ្យមានសុវត្ថិភាព។ ពោលគឺមិនឱ្យជំងឺកូវីដ ឆ្លងចូលក្នុងសហគមន៍។
ក្នុងពេលចុះពិនិត្យគោលដៅ កាលពីព្រឹកថ្ងៃទី៨ មេសា ឯកឧត្តម អ៊ុន ចាន់ដា អភិបាលខេត្ត បានរម្លឹកដល់កងកម្លាំងប្រចាំការ មិនត្រូវអនុញ្ញាតឱ្យប្រជាពលរដ្ឋ ធ្វើដំណើរឆ្លងកាត់ពីខេត្តមួយ ចូលទៅខេត្តមួយនោះទេ។
លោក ចាន់ ផល្លី អភិបាលក្រុងកំពង់ចាម មានប្រសាសន៍បន្តថា ដោយមានការលើកទឹកចិត្តដល់កម្លាំងសមត្ថកិច្ច អភិបាលខេត្ត បានជួយឧបត្ថម្ភម៉ាស ១០០០ អង្ករ ១០០គីឡូ ទឹកបរិសុទ្ធ ព្រមទាំងថវិកា ១លានរៀល រួមទាំងប៉ុស្តិ៍ប្រចាំគោលដៅជាច្រើនផ្សេងទៀត គឺមានការឧបត្ថម្ភដូចៗគ្នា។
ជាមួយនោះ លោកអភិបាលខេត្ត ក៏បានណែនាំដល់កម្លាំងសមត្ថកិច្ច ត្រូវតែអនុវត្តឲ្យបានម៉ឺងម៉ាត់នូវអនុសាសន៍របស់សម្ដេចតេជោ សែន គឺហាមមិនឲ្យប្រជាពលរដ្ឋធ្វើដំណើរឆ្លងកាត់ពីខេត្តមួយចូលទៅខេត្តមួយ។ តែមានមន្ត្រីជាច្រើននាក់ ដែលមានផ្ទះសម្បែង នៅក្រុងកំពង់ចាម សព្វថ្ងៃ ពួកគាត់បម្រើការងារជាមន្ត្រីរាជការ នៅខេត្តត្បូងឃ្មុំ ដែលជាខេត្តបំបែកចេញពីខេត្តកំពង់ចាម នៅត្រើយខាងកើតទន្លេមេគង្គ ដូច្នេះពេលព្រឹក ពួកគាត់ ត្រូវចេញដំណើរទៅធ្វើការ និងពេលល្ងាច ត្រូវវិលត្រឡប់មកផ្ទះវិញ។ ជាមួយនោះ គឺត្រូវតែមានលិខិតបេសកកម្ម ទើបអាចឆ្លងកាត់ស្ពានគីហ្សុណា ចូលមកក្រុងកំពង់ចាមបាន។
ដោយឡែក សម្រាប់រថយន្តដឹកទំនិញតូចធំ ដែលបើកចរាចរណ៍តាមដងផ្លូវជាតិ ពេលឆ្លងកាត់គោលដៅប្រចាំការរបស់សមត្ថកិច្ច គឺតម្រូវឲ្យអ្នកបើកបររថយន្ត ត្រូវចុះពីលើរថយន្ត វាស់កំដៅជាមុនសិន បើសិនជាកម្ដៅឡើងចាប់ពី ៣៨ ឡើងទៅ នឹងត្រូវយកសំណាក ទៅពិនិត្យ ហើយតម្រូវឲ្យធ្វើចត្តាឡីស័ក ១៤ថ្ងៃ បង្ការ កុំឱ្យមានការរីករាលដាលនៃជំងឺកូវីដ ពីកន្លែងមួយទៅកន្លែងមួយ។ សំខាន់បំផុត គឺត្រូវអនុវត្តវិធានការ ៣ការពារ និង៣កុំ ឲ្យបានជាប់ជាប្រចាំ ទើបខ្លួនយើងមានសុវត្ថិភាព។ ទាំងនេះ គឺបានរួមចំណែកជួយដល់សង្គមជាតិមួយផ្នែកធំ៕
ចែករំលែកព័តមាននេះ