ខេត្តបន្ទាយមានជ័យ ៖ ក្នុងឱកាសលោកអភិបាលរងខេត្តបន្ទាយមានជ័យ នាំយកអំណោយទៅជូនកងកម្លាំងដែលយាមកាមតាមផ្លូវច្រកចេញ-ចូល កាលពីរសៀលថ្ងៃទី០៨ មេសា ឆ្នាំ២០២១ ស្ថិតនៅប៉ុស្តិ៍ត្រួតពិនិត្យព្រំប្រទល់ស្រុកមង្គលបូរី និងស្រុកថ្មគោល ក៏បានណែនាំដល់បងប្អូនប្រជាពលរដ្ឋដែលកំពុងធ្វើដំណើរត្រូវសហការជាមួយកងកម្លាំង ដើម្បីការការពារពីជំងឺកូវីដ១៩ ដែលកំពុងឆ្លងរាតត្បាតគ្រប់ទីកន្លែង។
អំណោយដែលប្រគល់ជូន គឺផ្តល់ជូនកងកម្លាំងប៉ុស្តិ៍ត្រួតពិនិត្យលើផ្លូវជាតិលេខ៥ ព្រំប្រទល់ស្រុកមង្គលបូរី ខេត្តបន្ទាយមានជ័យ និងស្រុកថ្មគោល ខេត្តបាត់ដំបង ។
លោកលី សារី អភិបាលរងខេត្តបន្ទាយមានជ័យ បានធ្វើការណែនាំដល់បងប្អូនប្រជាពលរដ្ឋនៅពេលកំពុងត្រួតពិនិត្យថា សុំបងប្អូនត្រូវចូលសហការជាមួយកងកម្លាំងដែលកំពុងឈជើងតាមប៉ុស្តិ៍ត្រួតពិនិត្យ ដែលកំពុងអនុវត្តតាមសេចក្តីសម្រេចរបស់រាជរដ្ឋាភិបាលកម្ពុជា ស្តីពីការហាមឃាត់ការធ្វើដំណើរឆ្លងកាត់ចេញ-ចូលពីខេត្តមួយទៅខេត្តមួយជាបណ្តោះអាសន្ន សម្រាប់រយៈពេល១៤ថ្ងៃ គឹតចាប់ពីថ្ងៃទី០៧ ដល់២០ ខែមេសា ឆ្នាំ២០២១។
លោកបានបញ្ជាក់ថា ក្នុងគោលបំណងប្រយុទ្ធនិងទប់ស្កាត់ការឆ្លងរាលដាលនៃកូវីដ១៩ពីភូមិសាស្គ្រនៃខេត្តមួយទៅភូមិសាស្គ្រខេត្តមួយទៀត ក្នុងអំឡុងថ្ងៃបុណ្យចូលឆ្នាំថ្មីប្រពៃណីយ៍ខ្មែរ ត្រូវអនុវត្តអោយបានតាមការណែនាំរបស់រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន នាយករដ្ឋមន្ត្រី នៃព្រៈរាជាណាចក្រកម្ពុជា។
លោក លី សារី បានបញ្ជាក់ថា ជាការយកចិត្តទុកដាក់ចំពោះកងកម្លាំង ដែលកំពុងអនុវត្តការងារតាមប៉ុស្តិ៍ត្រួតពិនិត្យទូទាំងខេត្តបន្ទាយ មានជ័យក្នុងចំណោម៩ស្រុក/ក្រុងមានចំនួន៨ប៉ុស្តិ៍កំពុងអនុវត្តខេត្តជាប់ព្រំប្រទល់ ហើយបាននាំយកអំណោយមានមីចំនួន៥កេស ភេជ្ជៈ៨កេស ទឹកបរិសុទ្ធ៥កេស៕ ដោយ៖ ប៊ុនធឿន
ចែករំលែកព័តមាននេះ