កម្ពុជា និងដៃគូសហការបានប្តាជ្ញារួមគ្នាអភិវឌ្ឍន៍គ្រោងក្នុងវិស័យកសិកម្ម ដើម្បីលើកកម្ពស់សេដ្ឋកិច្ចគ្រួសារ
- ភ្នំពេញ
រាជធានីភ្នំពេញ ៖ យោងតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ០៧ ខែមេសា ឆ្នាំ ២០២១នេះ…
រាជធានីភ្នំពេញ ៖ យោងតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ០៧ ខែមេសា ឆ្នាំ ២០២១នេះ…
រាជធានីភ្នំពេញ ៖ យោងតាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ០៧ ខែមេសា ឆ្នាំ ២០២១នេះ បានជួបជាមួយនឹងលោកស្រី Ophelie Bourhis នាយិកាទីភ្នាក់ងារបារាំងសម្រាប់ការអភិវឌ្ឍន៍ (AFD) ប្រចាំនៅព្រះរាជាណាចក្រកម្ពុជា ក្នុងគោលបំណងដើម្បីពិភាក្សាការងារ និងរាយការណ៍ជូន អំពីលទ្ធផលនៃការអនុវត្តគម្រោង ។ លោករដ្ឋមន្ត្រី វេង សាខុន បានថ្លែងថា តាមរយ:ទីភ្នាក់ងារ AFD បានបន្តជួយអភិវឌ្ឍន៍កម្ពុជាឱ្យមានការរីកចម្រើនជាបន្តបន្ទាប់ ក្នុងនោះមានទាំងវិស័យកសិកម្មផងដែរ ។ ជាក់ស្តែងក្នុងរយៈបីឆ្នាំចុងក្រោយនេះ AFD បាននិងកំពុងចូលរួមផ្តល់សហហិរញ្ញប្បទានជាមួយដៃគូអភិវឌ្ឍន៍ដ៏ទៃទៀត ក្នុងគម្រោងចំនួន ៥ ដែលមានទឹកប្រាក់សរុបចំនួន ១៤១,៥ លានអឺរ៉ូ ។
លោករដ្ឋមន្ត្រី វេង សាខុន បានបន្តថា៖ «ក្នុងចំណោមគម្រោងទាំងប្រាំ មានគម្រោងចំនួន ៣ ដែលក្រសួងបាននិងកំពុងអនុវត្តគឺ ៖ ទី ១- ការជំរុញកំណើនវិស័យកសិកម្មនៅកម្ពុជាដោយចិរភាព (CaPFish Aquaculture) ២៥ លានអឺរ៉ូ ចូលរួមផ្តល់សហហិរញ្ញប្បទានជាមួយសហភាពអ៊ឺរ៉ុប ដោយផ្តោតទៅលើការធ្វើឲ្យប្រសើរឡើងវិស័យវារីវប្បកម្ម ប្រកបដោយនិរន្តភាព ធន់នឹងការប្រែប្រួលអាកាសធាតុ ទី ២- គម្រោងថ្នាក់តំបន់ស្តីពីការអភិវឌ្ឍកសិ-ទេសចរណ៍ និងប្រព័ន្ធសុវត្ថិភាពចំណីអាហារ ដែលមានទឹកប្រាក់សរុបចំនួន ១១,៥ លានអឺរ៉ូ នីងគម្រោងទី ៣ គឺគម្រោង “ខ្សែច្រវាក់តម្លៃផលិតកម្មកសិកម្ម និងការលើកកម្ពស់សុវត្ថិភាពកសិផល ដែលបានធ្វើសហការហិរញ្ញប្បទានជាមួយធនាគារអភិវឌ្ឍន៍អាស៊ី ក្នុងតម្លៃទឹកប្រាក់ ២៥លានអឺរ៉ូ» ។
ការអនុវត្តគម្រោងទាំង ៣ នេះផងដែរ បាននឹងកំពុងចូលរួមចំណែក យ៉ាងសកម្មក្នុងការអភិវឌ្ឍវិស័យ ជលផលចំទិសដៅ សមស្របតាមសភាពការណ៍ មានប្រសិទ្ធភាព និងទទួលបានប្រសិទ្ធផលខ្ពស់ស្របតាមផែនការយុទ្ធសាស្ត្រដែលបានគ្រោង ទុកគឺការអភិវឌ្ឍវិស័យជលផលប្រកបដោយចីរភាព និរន្តរភាព បរិយាប័ន្ន និងការប្រែប្រួលអាកាសធាតុ ។ លោករដ្ឋមន្ត្រីបានបន្ថែមថា ដោយឡែក មានគម្រោងពីរទៀត កំពុងធ្វើការវាយតម្លៃដើម្បីផ្តល់ហិរញ្ញប្បទាននៅក្នុងឆ្នាំ ២០២១ នេះ ដែលទីមួយ គឺគម្រោងកម្មវិធីស្តីពី “ការអភិវឌ្ឍន៍បច្ចេកវិទ្យាកសិកម្មដោយពឹងលើទឹកភ្លៀង រួមមានកៅស៊ូ ដំណាំចំណីសត្វ និងបន្លែ” ដែលភាគី AFD និងចូលរួមផ្តល់ហិរញ្ញប្បទានចំនួន ៥០ លានអឺរ៉ូ និងគម្រោងកម្មវិធីទីពីរ ដែលមានឈ្មោះថា “ការគ្រប់គ្រងជលផលនៅតំបន់ឆ្នេ និងសមុទ្រ ប្រកបដោយនិរន្តភាព” ដែលត្រូវចូលរួមសហហិរញ្ញប្បទានជាមួយធនាគារអភិវឌ្ឍន៍អាស៊ី ចំនួន ៣០ លានអឺរ៉ូ ។ ក្នុងកិច្ចពិភាក្សានេះ ឯកឧត្តមរដ្ឋមន្ត្រីបានគាំទ្រ និងជំរុញឱ្យ AFD ធ្វើការអនុម័តឱ្យបានឆាប់ ដែលអាចធ្វើទៅបាន ដើម្បីអនុវត្តឱ្យស្របតាមស្ថានភាពបច្ចុប្បន្ននៃផលិតកម្មសត្វ និងបន្លែកំពុងតែចូលរួមយ៉ាងសកម្ម ក្នុងការជួយទ្រទ្រង់សេដ្ឋកិច្ចគ្រួសារ ឱកាសការងារ និងសន្តិសុខស្បៀង ។
នាឱកាសនេះដែរ លោកស្រី Ophelie Bourhis បានរាយការណ៍ជួនជ្រាបដោយ សង្ខេបអំពីលទ្ធផលបឋមនៃការ អនុវត្តគម្រោងទាំងពីរខាងលើថា ៖ គម្រោងបាននិងកំពុងដំណើរការទៅដោយរលូន និងទទួលបានលទ្ធផលគួរឱ្យកត់សម្គាល់ ។ ដោយឡែកគម្រោងពីរទៀត មួយគ្រោងនឹងអនុវត្តក្នុងឆ្នាំនេះ និងមួយទៀតកំពុងពិនិត្យ និងវាយតម្លៃ ហើយអាចធ្វើការអនុម័តក្នុងឆ្នាំ ២០២១ នេះដែរ លោកស្រីសង្ឃឹម និងជឿជាក់ថា គម្រោងនឹងចូលរួមចំណែងធ្វើឱ្យខ្សែច្រវាក់តម្លៃផលិតកម្មកសិកម្មមានលក្ខណល្អប្រសើរ រួមទាំងងផលិតកម្មសត្វ និងបន្លែផងដែរ ដែលនឹងចូលរួមលើកកម្ពស់តម្លៃ បន្ថែម ទីផ្សារ និងការប្រកួតប្រជែងទាំងបរិមាណ គុណភាព និងសុវត្ថិភាពតាមរយ:ការអនុវត្តបច្ចេកវិទ្យាកសិកម្មទំនើប សមស្រប ធន់នឹងការប្រែប្រួលអាកាសធាតុ បរិយាប័ន្ន និងនវានុវត្តន៍ ។
ភាគីទាំងពីរបានប្តាជ្ញារួមគ្នាថា ទោះបីយើងកំពុងប្រឈមនូវវិបត្តិជំងឺឆ្លងកូវីដ ១៩ យ៉ាងណាក៏ដោយ ក៏ការអនុវត្តគម្រោងនៅតែបន្ត មិនតែប៉ុណ្ណោះគួរតែជំរុញ និងលើកកម្ពស់ការទទួលខុសត្រូវ និងអនុត្តឱ្យកាន់តែសកម្ម ទូលំទូលាយ និងប្រសិទ្ធភាពថែមទៀតផង ប្រយោជន៍ដើម្បីប្រជាជននិងសេដ្ឋកិច្ច ដោយគួរសិក្សារកយុទ្ធសាស្ត្រ ឬកម្មវត្ថុណាថ្មីៗឱ្យស្របតាមតម្រូវការដាក់ ស្តែងរបស់អ្នកទទួលផល ជាពិសេសប្រជាកសិករ ធ្វើយ៉ាងណាឲ្យកសិផលរបស់ពួកគាត់មានគុណភាព សុវត្ថិភាព និងមានទីផ្សារ ៕
ចែករំលែកព័តមាននេះ