ខេត្តប៉ៃលិន ៖ ចាប់តាំងពីមានករណីផ្ទុះឡើងនៃជំងឺកូវីដ១៩ ម្តងហើយម្តងទៀត នៅក្នុងប្រ ទេសកម្ពុជា ជាពិសេសបានឆ្លងជំងឺនេះនៅតាមបណ្តាខេត្តនានា និងរាជធានីភ្នំពេញជាដើម រហូតមកដល់ថ្ងៃទី២១ ខែមីនា ឆ្នាំ២០២១នេះ គេសង្កេតឃើញអាហារដ្ឋានក្នុងរមណីយដ្ឋានអូរដំបង ស្ថិតក្នុងភូមិក្រចាប់ សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន មានសភាពស្ងប់ស្ងាត់ភ្ញៀវខ្លាំងជាងមុន ធ្វើឱ្យម្ចាស់អាហារដ្ឋានមួយនេះ បានត្អូញត្អែរ និងរៀបរាប់ពីទុក្ខលំបាករបស់ខ្លួន ដោយបច្ចុប្បន្ន ក្នុង១ថ្ងៃស្ទើរតែអត់មានភ្ញៀវដើរលេងច្រើន និងហូបអាហារកន្លែងរបស់ខ្លួនទៅហើយ ។
បើតាមការរៀបរាប់ពីបុរសម្នាក់ឈ្មោះ ទៀង សែន អាយុ៦៣ឆ្នាំ ជាម្ចាស់អាហារដ្ឋានភ្នំអូរដំបង បានឱ្យដឹងថា ៖ រហូតមកដល់ពេលនេះ ទោះបីជានៅថ្ងៃធម្មតា ក៏ដូចជាថ្ងៃចុងសប្តាហ៍ គឺថ្ងៃសៅរ៍ ឬថ្ងៃអាទិត្យដែរ អត់សូវមានភ្ញៀវដើរលេងកម្សាន្តច្រើនដូចសព្វដងនោះទេ ព្រោះតែជំងឺកូវីដ១៩ កំពុងតែរាតត្បាតនៅក្នុងប្រទេសកម្ពុជា ។
គាត់បន្តទៀតថា ការលក់ដូរម្ហូបអាហាររបស់គាត់ មានការធ្លាក់ចុះខ្លាំងគួរឱ្យកត់សម្គាល់ ជួនកាលក្នុង១ថ្ងៃ ស្ទើរតែអត់មានភ្ញៀវចូលទៅលេងកម្សាន្តនៅកន្លែងរបស់ខ្លួន ដោយការលក់ម្ហូបអាហារ ដាច់បានត្រឹមតែ២ទៅ៣ខ្យុសក្នុង១ថ្ងៃប៉ុណ្ណោះ ។
គាត់បន្តថា កាលពីមិនទាន់មានបញ្ហាជំងឺឆ្លងរាតត្បាតដ៏កាចសាហាវមួយនេះ ការលក់ដូររបស់គាត់ដាច់គួរសមដែរ ដោយក្នុង១ថ្ងៃ ភ្ញៀវចូលទៅលេងកម្សាន្ត និងហូបអាហារយ៉ាងតិចក៏១០ទៅ១៣ខ្យុសដែរ ។ ទោះបីជាយ៉ាងណាក៏ដោយ គាត់និងប្រពន្ធ ព្រមទាំងកូន ក៏នៅតែបន្តទិញម្ហូបអាហារពីផ្សារ ដែលមានចំនួនតិចជាងមុនបន្តិច ដើម្បីរក្សាទុកធ្វើម្ហូបទទួលភ្ញៀវដែលចូលទៅលេងកម្សាន្ត នៅខ្យុសរបស់ខ្លួន ជាលក្ខណ:គ្រួសារ ។
លោកបន្តទៀតថា លុះក្រោយពីពួកគេទទួលទានអាហាររួច ក៏ចុះងូតទឹកស្ទឹង ភ្នំអូរដំបងលេងមួយស្របក់ ទើបនាំគ្នាត្រឡប់ទៅផ្ទះវិញ ។ តែខាងគាត់ ក៏មានរៀបចំទឹកអាល់កុល និងជែល ទុកសម្រាប់ឱ្យភ្ញៀវលាងដៃ ដើម្បីចូលរួមទប់ស្កាត់ការរីករាលដាលនៃជំងឺកូវីដ-១៩ ចូលក្នុងសហគមន៍ តាមការណែនាំរបស់រាជរដ្ឋាភិបាលកម្ពុជា និងក្រសួងសុខាភិបាលផងដែរ ។
គាត់បញ្ជាក់ថា បើបញ្ហាជំងឺកូវីដ១៩ នៅតែបន្តកើតមានបែបនេះ បញ្ហាជីវភាពគ្រួសាររបស់គាត់ និងអ្នកដទៃទៀត កាន់តែធ្លាក់ចុះ លំបាកក្នុងរកថវិកាបង់ថ្លៃមីក្រូហិរញ្ញវត្ថុ ខណៈខ្ចីលុយគេយកមករកស៊ី ហើយជារៀងរាល់ខែក៏ត្រូវបង់ថ្លៃដើម និងថ្លៃការប្រាក់ឱ្យគេវិញយ៉ាងទៀងទាត់ ដោយពួកគាត់ពិតជាមានការព្រួយបារម្ភយ៉ាងខ្លាំង ពេលឃើញកន្លែងលក់ដូររបស់ខ្លួនស្ងប់ស្ងាត់បែបនេះ ៕
ចែករំលែកព័តមាននេះ