ព្រះមហាវិមលធម្ម ពិន សែម សិរិសុវណ្ណោ ព្រះចៅអធិការវត្តរាជបូណ៌ ហៅវត្តបូណ៌ គឺជាបព្វជិតដ៏ឆ្នើមមួយរូប ដែលប្រជាពុទ្ធបរិស័ទទាំងក្នុង និងក្រៅប្រទេសមានសទ្ធាជ្រះថ្លា ឧបត្ថម្ភគ្រាំទ្រយ៉ាងខ្លាំងក្លា…
ព្រះមហាវិមលធម្ម ពិន សែម សិរិសុវណ្ណោ ព្រះចៅអធិការវត្តរាជបូណ៌ ហៅវត្តបូណ៌ គឺជាបព្វជិតដ៏ឆ្នើមមួយរូប ដែលប្រជាពុទ្ធបរិស័ទទាំងក្នុង និងក្រៅប្រទេសមានសទ្ធាជ្រះថ្លា ឧបត្ថម្ភគ្រាំទ្រយ៉ាងខ្លាំងក្លា រឹងរិតតែធ្វើឱ្យព្រះពុទ្ធសាសនារីកសាយផ្សាយចេញទៅគួរឱ្យមានមោទនភាពក្រៃលែង ។
ព្រះមហាសមណៈបានបង្កើតឱ្យមានកម្មវិធីសិក្សាសម្រាប់ព្រះសង្ឃ និងពុទ្ធបរិស័ទ យុវជន យុវតី ព្រមទាំងបានកសាងសាលាពុទ្ធិកសិក្សា និងបានជំរុញឱ្យសមណសិស្សសិក្សាបានដល់ពុទ្ធិកវិទ្យាល័យ ហើយព្រះអង្គកំពុងមាន គម្រោងដឹកនាំប្រជាពុទ្ធបរិស័ទ បង្កើតឱ្យមានពុទ្ធិកសាកលវិទ្យាល័យ លើទឹកដីសៀមរាបអង្គរដើម្បីប្រមូលធនធានមនុស្សសម្រាប់ជួយអភិវឌ្ឍសង្គមជាតិ និងផ្សព្វផ្សាយព្រះពុទ្ធសាសនាតទៅអនាគតឱ្យកាន់តែទូលំទូលាយ ។
ព្រះថេរានុត្ថេរៈគ្រប់ព្រះអង្គជាទីសក្ការៈ! ពុទ្ធបរិស័ទ ជាទីគោរពរាប់អាន ទង្វើដ៏ឧដុង្គឧត្តមរបស់ព្រះមហាសមណៈទាំងអស់នេះហើយ ទើបនៅថ្ងៃទី២៦ ខែ មិថុនា ឆ្នាំ១៩៩៣ ព្រះគ្រូ ត្រូវបានអតីតព្រះមហាវិរក្សត្រ ព្រះបាទសម្តេច ព្រះនរោត្តម សីហនុ ស្តេចទ្រង់ ព្រះរាជទាន សមណស័ក្តិ ជាព្រះមហាវិមលធម្ម រាជាគណថ្នាក់ទី២ ។
ព្រះមហាវិមលធម្ម ព្រះអង្គបានដើរតាមព្រះពុទ្ធដីកា ដែលទ្រង់សម្ដែងថា ព្រះសង្ឃត្រូវមានធុរៈចម្បងៗពីរយ៉ាងគឺ គន្ថធុរៈ និងវិបស្សនាធុរៈ មេរៀននេះហើយ ដែលបណ្តាលឱ្យព្រះអង្គសព្វព្រះទ័យនឹងការសាងព្រះផ្នូសអស់មួយជីវិតក្នុងសំណាក់ព្រះពុទ្ធសាសនា ។
ព្រះមហាវិមលធម្ម គឺជាសមណដ៏ឆ្នើមមួយរូប ដែលកុលបុត្រទាំងឡាយ គួរយកជាគំរូ ព្រោះរាល់គោលបំណង និងការតាំងចិត្តរបស់ព្រះអង្គ គឺព្រះអង្គបានធ្វើឱ្យសម្រេចតាមសេចក្តីប្រាថ្នា ដោយសេចក្តីក្លាហាន ដោយការលៈបង់ ការព្យាយាម ការអត់ធ្មត់ និងប្រកបដោយភាពច្បាស់លាស់ ប្រាកដប្រជា មិនបោះបង់ នូវការសច្ចារបស់ព្រះអង្គ ទោះក្នុងកាលៈទេសៈណាក៏ដោយ ៕ សាន សារិន
ចែករំលែកព័តមាននេះ