រាជធានីភ្នំពេញ ៖ ប្រជាពលរដ្ឋអ្នកផលិតអំបិលនៅក្នុងខេត្តកំពត បានឲ្យដឹងថាដោយសារជំងឺវីដ ១៩ ពលរដ្ឋមិនអាចចេញទៅលក់កម្លំាងពលកម្មឆ្ងាយផ្ទះបាន និងមួយទៀតដោយ​សារពលរដ្ឋពិសេសយុវជន​បានបាត់បង់ការ​ងារពីភ្នំពេញដោយសារកន្លែង​ធ្វើការបិទទ្វារ ឬព្យួរការងារនោះ ពួកគេ បានវិលទៅផលិតអំពិលគួរឲ្យកត់​សម្គាល់នៅដើមឆ្នាំ ២០២១នេះ ។​

លោក តុង ខ្លឹង អតីតប្រធានផ្នែកចែកចាយអំបិលនៃសហគមន៍ផលិត​អំបិលក្នុង​ខេត្តកំពត និងជាអ្នកផលិតអំបិលមួយរូបបានឱ្យដឹងថា នៅក្នុងពេលមានវិបត្តិកូវីដ ​១៩ នេះ ការផលិតអំបិលរបស់ប្រជាសហគមន៍ក្នុងខេត្តកំពត មានកំណើនឡើងវិញ ដោយសារតែកំលាំងពលកម្មងាកមករកការងារក្នុងស្រែអំបិលមានច្រើន ខុសប្លែក​ពីឆ្នាំមុនៗ កម្មករស្រែអំបិលមួយចំនួនបានធ្វើចំណាកស្រុកទៅ​រកការងារធ្វើខាងក្រៅ​ដែលជាការងារក្នុងម្លប់ និងទទួលបានកម្រៃខ្ពស់ជាង ។

បញ្ហាកូវីដ ១៩ បណ្ដារោងចក្រ និងសហគ្រាសមួយចំនួនបិទទ្វារ និងព្យួរការងារនោះ បានធ្វើឲ្យពលរដ្ឋពិសេសយុវជនវិលពីភ្នំពេញទៅកាន់ស្រែអំពិលវិញ ។ លោក តុង ខ្លឹង បានបញ្ជាក់ថា «រហូតដល់ពេលមានការងារផ្សេងៗមួយចំនួនទៀតបានបិទ​ធ្វើឱ្យកម្មករ​មួយចំនួនត្រូវត្រឡប់ទៅស្រុកវិញ ហើយពួកគេបានធ្វើការងារជាកម្មករស្រែអំបិល ទើបម្ចាស់ស្រែអំបិលមួយចំនួនបានពង្រីកការផលិតរបស់ខ្លួនឡើងវិញ» ។

លោកបន្ថែមថា កាលពីមុនអ្នកផលិតអំពិលខ្វះ  កំលាំងពលកម្ម ដោយសារតែពលរដ្ឋ​ក្នុង​មូល​ដ្ឋានចាកចេញពីស្រុកកំណើតទៅរកការងារធ្វើខាងក្រៅ ដូចជាទៅធ្វើការនៅ​រោងចក្រ និងធ្វើការនៅក្រៅប្រទេស តែដល់ពេលមានវិបត្តិដោយសារតែកូវីដ១៩ ពួកគាត់បានត្រលប់មកភូមិស្រុកវិញ ទើបធ្វើឱ្យកំលាំងពលកម្មការងារស្រែ​អំបិល​អត់ខ្វះដូចមុនទេ ។

ទិន្នផលអំបិលក្នុងឆ្នាំ ២០២១នេះមានកម្រិតណានោះគេនៅមិនទាន់ដឹងទេ​ប៉ុន្តែអ្នក​ផលិតអំពិលថា ចំនួនអំពិលផលិតបានយ៉ាងណានោះ អាស្រ័យលើអាកាសធាតុ ។ បើសិនជាអាកាសធាតុក្ដៅអូសបន្លាយយូរ នោះទិន្នផលនឹងទទួលបានច្រើន តែបើសិនជាឆាប់ធ្លាក់​ភ្លៀងអំបិលនឹងបានតិចទៅតាមនោះដែរ ព្រោះការងារផលិត​អំបិលវាអាស្រ័យ​ធាតុអាកាសក្ដីទើបបានផលច្រើន ។ ទោះយ៉ាងណាអ្នកខេត្តកំពត​បានមើលឃើញថាបច្ចុប្បន្ន ឈ្មួញវៀតណាមបាននាំអំពិល​ចូលមកផ្គត់ផ្គង់តាមខេត្ត​ជាប់​ព្រំដែនមកផ្ទាល់ៗទៅហើយដូចជាខេត្តព្រវែង និងខេត្តស្វាយរៀងជាដើម ។ បើតាមលោក តុង ខ្លឹង ថាបច្ចុប្បន្ននេះ ទីផ្សារអំបិលរបស់ផលិតករអាចលក់​បានក្នុង​មួយការ៉ុង៨០០០រៀលចំពោះអំបិលល្អ ហើយអំបិលដែលអន់បំផុតមានតម្លៃ ៦ ០០០រៀល ក្នុងមួយការ៉ុង ។

កម្ពុជាមានកសិដ្ឋានផលិតអំបិលក្នុងខេត្តកែប និងកំពត ដោយមានផ្ទៃដីប្រមាណ ៤៦០០ហិកតា ប៉ុន្មានឆ្នាំចុងក្រោយនេះការផលិតអំពិលនៅក្នុងប្រទេសមិន​អាចផ្គត់ផ្គង់តម្រូវការបានទេ ។ មានការ​លើកឡើងថាការផលិត​អំបិល​មិនបាន​គ្រប់​គ្រាន់ ​មិនមែន​បណ្ដាលមកពី​បញ្ហា​អា​កាសធាតុ​នោះ​ឡើយ គឺបណ្តាលមក​ពីខ្វះកម្លាំងពលកម្ម និងតម្លៃដីស្រែអំបិលកំពុងឡើងខ្ពស់ ជាដើម ៕