រាជធានីភ្នំពេញ ៖ បុរសម្នាក់បើកម៉ូតូកង់បីមួយគ្រឿងធ្វើដំណើរឆ្លងផ្លូវ ក៏ត្រូវម៉ូតូកង់បីមួយគ្រឿងទៀតធ្វើដំណើរបំពានភ្លើងស្តុបចរាចរណ៍មកបុកចំពាក់កណ្តាលម៉ូតូកង់បី រួចកៀបជាប់គ្នា បន្ទាប់មករុញច្រានទៅបុកកន្លែងលក់បបរ.សទៀត បណ្តាលដួលឆ្នាំងបបរ.ស ចាក់កំពប់រាយប៉ាយពេញកន្លែងលក់តែម្តង បង្កឱ្យមានការភ្ញាក់ផ្អើលកាលពីវេលាម៉ោង11និង10នាទីយប់ ថ្ងៃទី27 ខែកុម្ភៈ ឆ្នាំ2021 នៅតាមបណ្ដោយលេខ182 កែងនឹងផ្លូវ265 ទល់មុខក្លោងទ្វារផ្សារសំណង់12 ក្នុងសង្កាត់ទឹកល្អក់3 ខណ្ឌទួលគោក ។
យោងតាមប្រភពពីម្ចាស់ម៉ូតូកង់បីរងគ្រោះម៉ាកTVS ពណ៌លឿង ពាក់ស្លាកលេខភ្នំពេញ1HJ-5748 បានប្រាប់អោយដឹងថា មុនកើតហេតុ គឺរូបគាត់បើកម៉ូតូកង់បីធ្វើដំណើរតាមបណ្តោយផ្លូវលេខ265 ទិសដៅពីកើតទៅលិច លុះមកដល់ចំណុចកើតហេតុ ភ្លើងស្តុបអតិភាពខាងគាត់ ក៏បើកឆ្លងផ្លូវ។
ម្ចាស់ម៉ូតូកង់បីរងគ្រោះបន្តថា ខណៈពេលនោះក៏មានម៉ូតូកង់បីមួយគ្រឿងទៀត ម៉ាក baja RE ពណ៌លឿងដូចគ្នា ពាក់ស្លាកលេខភ្នំពេញ 1HF-4632 ធ្វើដំណើរឆ្លងផ្លូវតាមបណ្តោយផ្លូវ182 ទិសដៅពីត្បូងទៅជើង ក្នុងល្បឿនលឿនដោយបំពានភ្លើងស្តុបចរាចរណ៍ មកបុកបុកចំពាក់កណ្តាលម៉ូតូកង់បីរបស់គាត់ពេញទំហឹង ធ្វើឱ្យម៉ូតូកង់បីកៀបជាប់គ្នា រួចក៏រុញច្រានទៅបុកចូលកន្លែងលក់បបរ.ស បណ្តាលបុកត្រូវឆ្នាំងបបរដួលកំពប់ចាក់បបរ.សចោល និងធ្លាក់ចានឆ្នាំងរាយប៉ាយពេញកន្លែងលក់តែម្តង។
ប្រភពដដែលបន្តថា ចំណែកម៉ូតូកង់បីរងគ្រោះខូចខាតមួយចំហៀងខាងឆ្វេង រួញស្រុញចូលគ្នា និងបែកកញ្ចក់មុខ ចំណែកអ្នកបើកបររងរបួសជើងចេញឈាមតិចតួច រីឯម៉ូតូកង់បីបង្កវិញ ខូចខាតមួយកំណាត់មុខ ប៉ុន្តែក្នុងហេតុការណ៍នេះដែរ មិនបានបង្កឱ្យនរណាម្នាក់រងរបួសធ្ងន់ឡើយ។
ក្រោយពេលកើតហេតុ ភាគីខាងម៉ូតូកង់បីបង្ក ម៉ាក baja ព្រមទទួលខុសត្រូវ និងសងការខូចខាតទៅកាន់អ្នកលក់បបរសចំនួន15ម៉ឺនរៀល និងយកម៉ូតូកង់បីរងគ្រោះទៅជួសជុលសងដូចដើមវិញ ដើម្បីបញ្ចប់រឿងនៅនឹងកន្លែងកើតហេតុ ៕
ចែករំលែកព័តមាននេះ