រាជធានីភ្នំពេញ ៖ ក្រុមគ្រូពេទ្យខេត្តបន្ទាយមានជ័យបានបញ្ជាក់ពីការស្លាប់បាត់បង់ជីវិតរបស់ពលករខ្មែរមកពីប្រទេសថៃម្នាក់ មិនមែនស្លាប់ដោយសារជំងឺកូវីដ១៩ទេ គឺដោយសារជំងឺប្រចាំកាយ ។ យោងតាមសេចក្តីជូនដំណឹងរបស់ រដ្ឋបាលខេត្តបន្ទាយមានជ័យ នៅយប់ថ្ងៃទី២៦ ខែកុម្ភៈ…
រាជធានីភ្នំពេញ ៖ ក្រុមគ្រូពេទ្យខេត្តបន្ទាយមានជ័យបានបញ្ជាក់ពីការស្លាប់បាត់បង់ជីវិតរបស់ពលករខ្មែរមកពីប្រទេសថៃម្នាក់ មិនមែនស្លាប់ដោយសារជំងឺកូវីដ១៩ទេ គឺដោយសារជំងឺប្រចាំកាយ ។
យោងតាមសេចក្តីជូនដំណឹងរបស់ រដ្ឋបាលខេត្តបន្ទាយមានជ័យ នៅយប់ថ្ងៃទី២៦ ខែកុម្ភៈ ឆ្នាំ២០២១បានឲ្យដឹងថា នៅថ្ងៃទី២៥ ខែកុម្ភៈ ឆ្នាំ២០២១ វេលាម៉ោង១៤និង០០នាទីរសៀល មានករណីស្លាប់ពលករជាអ្នកជំងឺបានវិលត្រឡប់ពីប្រទេសថៃ ភេទប្រុស អាយុ៣៦ឆ្នាំ រស់នៅភូមិរំដេង ឃុំស្ពានត្នោត ស្រុកជីក្រែង ខេត្តសៀមរាប បានទទួលមរណៈភាព ។
រដ្ឋបាលខេត្តបន្ទាយមានជ័យ បានបញ្ជាក់ថា «ពលករជាអ្នកជំងឺខាងលើបានវិលត្រឡប់ចូលមកកម្ពុជាតាមច្រកចំបក់ ស្រុកម៉ាឡៃ កាលពីថ្ងៃទី១៨ ខែកុម្ភៈ ឆ្នាំ២០២១ វេលាម៉ោង៣និង១៥នាទីទៀបភ្លឺ ដោយពិនិត្យឃើញស្ថានភាពសុខភាពខ្សោយខ្លាំងមិនអាចដើរបាន ហើយត្រូវបានគ្រូពេទ្យប្រចាំការបានបញ្ជូនមកសង្គ្រោះ និងព្យាបាលនៅមន្ទីរពេទ្យបង្អែកម៉ាឡៃសន្តិភាព ។ តាមការពិនិត្យ និងសួរប្រវត្តិអ្នកជំងឺបានបញ្ជាក់ថា គាត់ទៅធ្វើការ និងរស់នៅប្រទេសថៃជាកម្មកររោងចក្ររយៈពេលជិត ៣ឆ្នាំ មានប្រវត្តិជក់បារី ពិសាស្រា គាត់ធ្លាប់បានទទួលការព្យាបាលជំងឺរបេងសួត នៅប្រទេសថៃ អស់រយៈពេល២សប្តាហ៍ មុនមកដល់ប្រទេសកម្ពុជា (មានថ្នាំរបេង ជាប់មកជាមួយអ្នកជំងឺ)» ។
ប្រភពបន្តថា ស្ថានភាពអ្នកជំងឺមានអាការៈឈឺក្បាល អស់កម្លាំង វិលមុខ ចុកពោះ និងក្អួតជាញឹកញាប់ក្រោយទទួលទានអាហារ ។ បន្ទាប់ពីការពិនិត្យ ក្រុមគ្រូពេទ្យបានផ្តល់ការព្យាបាល និងតាមដានសុខភាពអ្នកជំងឺជាបន្តបន្ទាប់ ដោយឃើញសភាពអ្នកជំងឺមិនបានធូរស្បើយ ទើបគ្រូពេទ្យបានបញ្ជូនអ្នកជំងឺមកបន្តការព្យាបាលនៅមន្ទីរពេទ្យ ខេត្តមិត្តភាពកម្ពុជា-ជប៉ុន មង្គលបូរី នៅថ្ងៃទី២១ ខែកុម្ភៈ ឆ្នាំ២០២១ វេលាម៉ោង ២០:២៥នាទីយប់ ។
សភាពអ្នកជំងឺពេលមកដល់មន្ទីរពេទ្យខេត្ត អ្នកជំងឺមានរោគសញ្ញាឈឺក្បាលខ្លាំង , ក្អួត, វង្វេងស្មារតី, រឹងកញ្ចឹងក ដែលជារោគសញ្ញានៃការរីករាលដាលមេរោគរបេង បង្កជាការរលាកស្រោមខួរក្បាលធ្ងន់ធ្ងរ ។ ក្រុមគ្រូពេទ្យបានយកចិត្តទុកដាក់ព្យាបាល និងសង្គ្រោះអ្នកជំងឺតាមលក្ខណៈបច្ចេកទេសរហូតមកដល់ថ្ងៃទី២៥ ខែកុម្ភៈ ឆ្នាំ២០២១ វេលាម៉ោង១៣និង១៥នាទី រសៀល សភាពរបស់អ្នកជំងឺកាន់វិវត្តន៍ធ្ងន់ធ្ងរទៅមុខជាលំដាប់ ទោះបីក្រុមគ្រូពេទ្យខិតខំជួយសង្គ្រោះយ៉ាងណាក៏ដោយ នៅតែមិនអាចជួយសង្គ្រោះអ្នកជំងឺបានឡើយ ហើយអ្នកជំងឺក៏បានទទួលមរណៈភាព នៅថ្ងៃទី២៥ ខែកុម្ភៈ ឆ្នាំ២០២១ វេលាម៉ោង ១៤:០០ នាទី រសៀល ដោយមូលហេតុជំងឺរលាកស្រោមខួរក្បាល និងជំងឺរបេងសួត (Méningite et Tuberculose pulmonaire) ។
រដ្ឋបាលខេត្ត សូមបញ្ជាក់ជូនផងដែរថា ករណីបុរសជាពលករដែលទទួលមរណភាពខាងលើ មិនមែនស្លាប់ដោយសារជំងឺកូវីដ-១៩ទេ ៕
ចែករំលែកព័តមាននេះ