ខេត្តបន្ទាយមានជ័យ ៖ រថយន្តដឹកទំនិញបង្កប់សាច់មាន់លួចនាំចូលពីថៃជិត២០០គីឡូក្រាម និងសរសៃគុយទាវ ព្រមទាំងមីសួជិត៥០គីឡូក្រាមមានសាធាតុបូរ៉ាក់ទៀត ត្រូវបានមន្ត្រី ក.ប.ប ខេត្ត ចាប់បានក្បែរព្រំដែន កាលពីថ្ងៃទី២៦…
ខេត្តបន្ទាយមានជ័យ ៖ រថយន្តដឹកទំនិញបង្កប់សាច់មាន់លួចនាំចូលពីថៃជិត២០០គីឡូក្រាម និងសរសៃគុយទាវ ព្រមទាំងមីសួជិត៥០គីឡូក្រាមមានសាធាតុបូរ៉ាក់ទៀត ត្រូវបានមន្ត្រី ក.ប.ប ខេត្ត ចាប់បានក្បែរព្រំដែន កាលពីថ្ងៃទី២៦ ខែកុម្ភៈ ឆ្នាំ២០២១ នៅក្បែររង្វង់មូលចូលច្រកបឹងត្រកួន ស្ថិតភូមិបឹងសុក្រម ឃុំគោករមៀត ស្រុកថ្មពួក។
លោក សាន វិជ្ជាសារ៉ាវុធ ប្រធានសាខាការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ហៅកាត់.ក.ប.ប) ខេត្តបន្ទាយមានជ័យ បានប្រាប់ថា ក្រោយពេលទទួលព័ត៌មានថា មានរថយន្តធុនកាមរី ស៊េរីចាស់១គ្រឿង ដែលដឹកទំនិញនាំចូលពីថៃត្រូវបានសង្ស័យ និងឃាត់ធ្វើការត្រួតពិនិត្យ ក៏ស្រាប់តែរកឃើញមានសាច់មាន់ខូចគុណភាពទម្ងន់១៨៥គីឡូក្រាមដែលខូចគុណភាព និងសរសៃគុយទាវ មីសួជិត៥០គីឡូក្រាមមានសារធាតុបូរ៉ាក់ទៀតផង។
លោកបានបញ្ជាក់ថា ក្រោយពេលឃាត់រថយន្ត១គ្រឿងលួចបង្កប់សាច់មាន់ខូចគុណភាព និងសរសៃមីសួ សរសៃគុយទាវដែលមានសារធាតុបូរ៉ាក់ ធ្វើប៉ះពាល់សុខភាពអ្នកបរិភោគហើយ មន្ត្រី ក.ប.ប ក៏បានធ្វើការដកហូត និងឱ្យធ្វើកិច្ចសន្យាណែនាំដល់ម្ចាស់រថយន្ត ដែលជាម្ចាស់ទំនិញឱ្យបញ្ឈប់រាល់សកម្មភាពលួចនាំចូលទំនិញខូចគុណភាពដែលឈ្មួញលួចនាំចូលតាមច្រកព្រំដែន ស្ថិតក្នុងភូមិសាស្ត្រស្រុកថ្មពួក។
លោក សាន វិជ្ជាសារ៉ាវុធ បានបញ្ជាក់ថា ក្រោយពីមន្ត្រីជំនាញបានដកហូតទំនិញខូចគុណភាពមានសាច់មាន់ជិត២០០គីឡូក្រាម និងសរសៃគុយទាវ សរសៃមីសួ ដែលមានសារធាតុបូរ៉ាក់នោះ ក៏ត្រូវបានទៅដុតកំទិចចោលផងដែរ៕(ប៊ុន ធឿន)
ចែករំលែកព័តមាននេះ