រាជធានីភ្នំពេញ ៖ បន្ទាប់ពីមានសំណើសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានយល់ព្រមឲ្យមានការរៀបចំចាក់វ៉ាក់សាំងប្រឆាំងជំងឺកូវីដ-១៩ នៅក្រសួងមហាផ្ទៃជូនថ្នាក់ដឹកនាំ និងមន្ដ្រីនគរបាលជាតិ ចំណុះទីស្ដីការក្រសួង។ ការយល់ព្រមរបស់សម្តេចនាយករដ្ឋមន្ត្រី បន្ទាប់ពីកាលពីពេលថ្មីៗនេះ សម្តេចក្រឡាហោម ស ខេង បានស្នើសុំគោលការណ៍ សម្តេចតេជោ ហ៊ុន សែន ដើម្បីរៀបចំការចាក់វ៉ាក់សាំងកូវីដ-១៩ នៅទីស្ដីក្រសួងមហាផ្ទៃជូនថ្នាក់ដឹកនាំ និងមន្ដ្រីនគរបាលជាតិ។
យោងតាមលិខិតរបស់ក្រសួងមហាផ្ទៃថ្មីៗនេះថា «ដោយសារមន្ដ្រីនគរបាលជាតិចំណុះទីស្ដីក្រសួងមហាផ្ទៃ ដែលនឹងត្រូវទទួលការចាក់វ៉ាក់សាំងមានចំនួនច្រើន និងដើម្បីបញ្ចៀសបានការប្រមូលផ្ដុំមនុស្សច្រើន ក៏ដូចជា រួមចំណែកកាត់ បន្ថយបន្ទុករបស់ក្រុមគ្រូពេទ្យនៅមន្ទីពេទ្យមិត្តភាពខ្មែរ-សូវៀត ខ្ញុំសូមគោរពស្នើសុំគោលការណ៍ដ៏ខ្ពង់ខ្ពស់របស់ សម្ដេចតេជោ នាយករដ្ឋមន្ដ្រី អនុញ្ញាតឲ្យមន្ដ្រីជំនាញនៃក្រសួងសុខាភិបាល ធ្វើការបណ្ដុះបណ្ដាលដល់មន្ដ្រីសុខាភិបាលនៃក្រសួងមហាផ្ទៃ អំពីបច្ចេកទេសនៃការចាក់វ៉ាក់សាំង និងផ្ដល់វ៉ាកសាំងក្នុងចំនួនមួយសមស្រប (អាចំនួន២០០ដូស ក្នុង១ថ្ងៃ រហូតដល់បញ្ចប់) ដើម្បីអនុវត្តដំណើរការចាក់វ៉ាក់សាំងនៅក្រសួងមហាផ្ទៃ ជូនថ្នាក់ដឹកនាំ និងមន្ដ្រីនគរបាលជាតិចំណុះទីស្ដីការក្រសួងមហាផ្ទៃ»។
ដោយឡែក សម្រាប់កងកម្លាំងនគរបាលជាតិនៅតាមវរការពារព្រំដែនគោក និងព្រំដែនទឹក ព្រមទាំងមន្ដ្រីនគរបាលជាតិនៅតាមបណ្ដាលខេត្ត បន្ដអនុវត្តការចាក់វ៉ាក់សាំងតាមការរៀបចំ និងការជូនដំណឹងរបស់ ក្រសួងមហាផ្ទៃ។
សូមជម្រាបថា កម្ពុជាបានចាក់វ៉ាក់សាំងការពារជំងឺកូវីដ១៩គិតត្រឹមថ្ងៃទី២៥ កុម្ភៈ
អ្នកបានចាក់វ៉ាក់សាំងរួច ១៣១០១នាក់ (ស្រី៤០៧៦នាក់) ក្នុងចំណោមអ្នកទៅចាក់វ៉ាក់សាំងកូវីដ-១៩ ៖ ១៦០៤៥នាក់ (ស្រី ៥៥៩៩នាក់) ។ អ្នកដែលគ្រូពេទ្យមិនអនុញ្ញាតឲ្យចាក់ ២៩៤៤នាក់ (ស្រី ១៥២៣នាក់)៕
ចែករំលែកព័តមាននេះ