រាជធានីភ្នំពេញ ៖ យុវជន៣នាក់កំពុងផឹកស្រាបៀរអស់ម្នាក់១កំប៉ុង ស្រាប់តែមានជនបង្ក១ក្រុមមានគ្នា៣នាក់ជិះម៉ូតូមួយគ្រឿងប្រដាប់ដោយដាវ និងកាំបិតនាំគ្នាចូលមកធ្វើសកម្មភាពកាប់ម៉ូតូរបស់យុវជនទាំងនោះបណ្តាលឱ្យខ្ទេចអស់៣គ្រឿង បង្កអោយមានការភ្ញាក់ផ្អើលកាលពីវេលាម៉ោង៨និង៣០នាទីយប់ថ្ងៃទី២៥ ខែកុម្ភៈ ឆ្នាំ២០២១ នៅចំណុចទល់មុខរោងចក្រយូមីងដា ស្ថិតក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ជនបង្កមានគ្នា៣នាក់ មិនទាន់ស្គាល់អត្តសញ្ញាណនៅឡើយទេ ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៥ ពណ៌ខ្មៅ ពាក់ស្លាកលេខ កំពង់ឆ្នាំង 1B-0380 ។
ចំណែកជនរងគ្រោះមានគ្នា៣នាក់ជិះម៉ូតូ៣គ្រឿង ក្នុងនោះ ១-ឈ្មោះ យុន រិត ភេទប្រុស អាយុ២៤ឆ្នាំ ជាកម្មកររោងចក្រ ស្នាក់នៅភូមិឃុំកើតហេតុខាងលើ មានស្រុកកំណើតនៅភូមិព្រៃស្វា ឃុំស្ពឺខ ស្រុកបាភ្នំ ខេត្តព្រៃវែង ជិះម៉ូតូមួយគ្រឿងម៉ាកស៊ុយហ្សុយគីនិច ពណ៌ក្រហមលាយស ពាក់ស្លាកលេខ ព្រៃវែង 1K-1518 ។ ២-ឈ្មោះ ភួង ពិសិដ្ឋ ភេទប្រុស អាយុ១៨ឆ្នាំ ជាកម្មកររោងចក្រ ស្នាក់នៅភូមិឃុំកើតហេតុខាងលើ មានស្រុកកំណើតនៅភូមិ ស្នាមពុក ឃុំវសលពង់ ស្រុកឧដុង្គ ខេត្តកំពង់ស្ពឺ ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ ពណ៌ខ្មៅ ពាក់ស្លាកលេខ កំពង់ស្ពឺ 1O-3078 ។ ននិង៣-ឈ្មោះ សៅ វ៉ាង ភេទប្រុស អាយុ១៨ឆ្នាំ ជាកម្មកររោងចក្រ ស្នាក់នៅទល់មុខរោងចក្រក្នុងភូមិឃុំកើតហេតុខាងលើ មានស្រុកកំណើតនៅភូមិម្រិញ ឃុំត្រពាំងស្រែ ស្រុកមេសាង ខេត្តព្រៃវែង ជិះម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ឡើងស៊េរី២០២១ ពាក់ស្លាកលេខ កណ្តាល 1AB-7549។
តាមប្រភពពត៌មានពីជនរងគ្រោះទាំង៣នាក់បានអោយដឹងថា នៅមុនពេលកើតហេតុ ពួកគាត់មានគ្នា៣នាក់ជិះម៉ូតូម្នាក់១គ្រឿងមកផឹកស៊ីនៅចំណុចកើតហេតុខាងលើ លុះនាំគ្នាផឹកស្រាបៀរអស់ម្នាក់មួយកំប៉ុង ក៏ស្រាប់តែឃើញជនបង្កដែលមិនធ្លាប់ស្គាល់គ្នានោះទេ មានគ្នាចំនួន៣នាក់ជិះម៉ូតូមួយគ្រឿង មានដាវនិងដំបង មកកា.ប់និងវាយម៉ូតូរបស់ពួកគាត់ បណ្តាលឲ្យរងការខូចខាតទាំង៣គ្រឿង ដោយពួកគាត់មិនហ៊ានតបត នឹងជនបង្កនោះឡើយ ។ ភ្លាមៗនោះ ជនបង្កបាននាំគ្នាជិះម៉ូតូគេចខ្លួន ស្របពេលនោះកំលាំងសមត្ថកិច្ចនគរបាលក៏បានដេញតាមផងដែរ ។
តាមប្រភពពត៌មានពីកំលាំងនគរបាលប៉ុស្តិ៍បានអោយដឹងថា នៅមុនពេលកើតហេតុ ដោយសារមានប្រជាពលរដ្ឋបានទូរស័ព្ទប្តឹងពីករណីឈ្លោះគ្នានៅជិតកន្លែងកើតហេតុ តែមិនទាន់ទៅដល់កន្លែងប្រជាពលរដ្ឋប្តឹងផង ក៏ស្រាប់តែឃើញភាគីបង្កដែលវាយកំទេចម៉ូតូជនរងគ្រោះ ភ្លាមនោះកំលាំងនគរបាលប៉ុស្តិ៍បានដេញប៉ផាប់ចាប់ពភីង តែជនបង្កបានរត់ចូលផ្ទះទាំង៣នាក់បាត់ ដោយទុកម៉ូតូនៅខាងមុខផ្ទះ ។
តាមប្រភពដដែលបានបន្តថា ពេលនោះកំលាំងនគរបាលប៉ុស្តិ៍ បំរុងចូលទៅចាប់បក្ខពួកជនបង្កទាំង៣នាក់ភ្លាមៗដែរ តែត្រូវបានបងស្រីជនបង្កជាម្ចាស់ផ្ទះបានបិទទ្វារ មិនអោយសមត្ថកិច្ចចូលចាប់ឡើយ ។ បន្ទាប់ពីសមត្ថកិច្ចនគរបាលប៉ុស្តិ៍ត្រូវបានម្ចាស់ផ្ទះហាមឃាត់មិនឲ្យចូលចាប់បក្ខពួកជនបង្កនោះ ដោយមានលោកអធិការរងខណ្ឌពោធិ៍សែនជ័យបានចុះមកភ្លាមៗហៅមេភូមិ និងអោយម្ចាស់ផ្ទះជួយសហការ តែម្ចាស់ផ្ទះមិនព្រមសហការជាមួយសមត្ថកិច្ចទេ គឺមិនព្រមបើកទ្វារឲ្យសមត្ថកិច្ចចូលទៅចាប់ជនបង្កទេ ។
ក្រោយពេលកើតហេតុ ជនរងគ្រោះទាំង៣នាក់ ត្រូវបានសមត្ថកិច្ចនាំទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលចោមចៅទី១ភ្លាមៗ ដោយឡែកនៅផ្ទះរបស់ជនបង្កត្រូវបានសមត្ថកិច្ចនាំគ្នាយាមព័ទ្ធរហូតដល់ពេលព្រឹកម៉ោងរដ្ឋបាល ទើបចាត់ការតាមនិតិវិធីបន្តទៀត ៕
ចែករំលែកព័តមាននេះ