រាជធានីភ្នំពេញ ៖ ដោយមើលឃើញមានការផ្សព្វផ្សាយបោកប្រាស់ជុំវិញរឿងលក់វ៉ាក់សាំងកូវីដ ១៩ ដែលជាជំនួយរបស់ចិននោះ ស្ថានទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា ក្រើនរំលឹកដល់ពលរដ្ឋចិនដែលកំពុងរស់នៅប្រទេសកម្ពុជាមានការប្រុងប្រយ័ត្នខ្ពស់ពីការផ្សាយបោកប្រាស់អំពីការលក់វ៉ាក់សាំងកូវីដ។
ស្ថានទូតចិនប្រចាំនៅកម្ពុជាបានលើកឡើងថា «នាពេលថ្មីៗនេះ ស្ថានទូតយើងខ្ញុំបានទទួលសេចក្តីរាយការណ៍ពីពលរដ្ឋចិនដែលកំពុងរស់នៅប្រទេសកម្ពុជាថា មានគេបានផ្ញើសារជាភាសាចិនតាមរយៈទូរស័ព្ទ ព្រមទាំងអះអាងថាដោយចំណាយត្រឹមតែ 120 ដុល្លារអាមេរិកប៉ុណ្ណោះ នឹងអាចទទួលបានការចាក់វ៉ាក់សាំងបង្ការជំងឺកូវីដ ១៩ នៅក្នុងប្រទេសកម្ពុជា ហើយមានមនុស្សមួយចំនួនទៀតបានផ្សព្វផ្សាយជាសារធារណៈតាមបណ្តាញសង្គម លក់វ៉ាក់សាំងកូវីដរបស់ប្រទេសចិនក្នុងតម្លៃ ៤៥០ដុល្លារ ដែលធ្វើឱ្យពលរដ្ឋចិនក្នុងប្រទេសកម្ពុជាមានការមន្ទើលសង្ស័យជាខ្លាំង»។
ស្ថានទូតចិនបានបន្តថា ឆ្លៀតក្នុងឱកាសនេះ ស្ថានទូតយើងខ្ញុំសូមធ្វើការក្រើនរំលឹកថាៈ ១ – បើយោងតាមដំណឹងដែលស្ថានទូតយើងខ្ញុំទទួលបានគឺ វ៉ាក់សាំងកូវីដដែលជាជំនួយរបស់ប្រទេសចិនត្រូវបានរាជរដ្ធាភិបាលនិងក្រសួងការពារជាតិកម្ពុជាគ្រប់គ្រងយ៉ាងល្អ រួមទាំងការទទួលចាក់វ៉ាក់សាំងសុទ្ធតែត្រូវបានធ្វើតាមនិតិវិធីយ៉ាងតឹងរឹងផងដែរ ដូច្នេះមិនមានវ៉ាក់សាំងហូរចូលក្នុងទីផ្សារឡើយ។
ហេតុដូចនេះ ហើយរាល់ការផ្សាយពាណិជ្ជកម្មលក់វ៉ាក់សាំងសុទ្ធតែជាការបោកប្រាស់ សូមអ្នកទាំងអស់គ្នារក្សារការប្រុងប្រយ័ត្ន។ ចំណុចទី ២ ស្ថានទូតចិនបានបន្តថា « វ៉ាក់សាំងកូវីដ-១៩ មិនមែនជាទំនិញធម្មតានោះទេ ការទុកដាក់ ឫដឹកជញ្ជូនវ៉ាក់សាំង មានតម្រូវការយ៉ាងតឹងរឹងបំផុត។ ចំពោះការចាក់វ៉ាក់សាំងវិញក៏ត្រូវតែអនុវត្តន៍ដោយអ្នកជំនាញផងដែរ។ រាល់ការទទួលបានវ៉ាក់សាំងណាមួយ តាមរយៈបណ្តាញក្រៅផ្លូវការ និងការចាក់វ៉ាក់សាំងដោយអ្នកមិនមានជំនាញអាចបណ្តាលឱ្យមានគ្រោះថ្នាក់ដល់សុខភាពនិងសុវត្ថិភាព និងត្រូវទទួលខុសត្រូវចំពោះមុខច្បាប់» ។
ស្ថានទូតចិនប្រចាំនៅកម្ពុជាក៏បានអំពាវនាវឲ្យពលរដ្ឋចិនកំពុងរស់នៅកម្ពុជាត្រូវទាក់ទងលេខទូរស័ព្ទបន្ទាន់របស់ក្រសួសុខាភិបាលកម្ពុជា (115) ឬក៏ទាក់ទងលេខទូរស័ព្ទបន្ទាន់ទំនាក់ទំនងប្រសិនមានចម្ងល់ ឬបញ្ហាពីជំងឺCovid-19នៅរាជធានីភ្នពេញតាមរយៈលេខ 1299 ក៏ដូចជាលេខទូរស័ព្ទប្តឹងប៉ូលីសកម្ពុជា(117) ។
ក្នុងនោះស្ថានទូតចិនប្រចាំនៅកម្ពុជាបានណែនាំលេខទូរស័ព្ទសម្រាប់ជំនួយដល់ជនបរទេសនៅកម្ពុជា៖ 0312012345, 0316012345 ។ ឬលេខទូរស័ព្ទមជ្ឈមណ្ឌលសេវាកម្មទំនាក់ទំនង និងការពារការិយាល័យកុងស៊ុលពិភពលោកនៃក្រសួងការបរទេស ： +86-10-12308或+86-10-59913991 ។
លេខទូរស័ព្ទការិយាល័យកុងស៊ុលនៃស្ថានទូតសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា：023210206 ；លេខទូរស័ព្ទសម្រាប់ផ្តល់ពត៌មានទាក់ទងនឹងការធ្វើតេស្ត 099830158；ការប្រឹក្សាតាមរយៈប្រអប់សារ：lingbao_khm@sina.com ។ លេខទូរស័ព្ទសម្រាប់ពត៌មានឯកសារពាក់ព័ន្ធរបស់ពលរដ្ឋចិន011572624、012901937(ម៉ោងធ្វើការ 8:00-11:30，14:30-17:00, ការប្រឹក្សាតាមរយៈប្រអប់សារ：zhengjian_jpz@sina.com ។ និងលេខទូរស័ព្ទការិយាល័យកុងស៊ុលនៃស្ថានទូតសាធារណរដ្ឋប្រជាមានិតចិនប្រចាំខេត្តសៀមរាបប្រទេសកម្ពុជា ：078946178 ។
សូមបញ្ជាក់ថាការអំពាវនាវក្រើនរម្លឹករបស់ស្ថានទូតចិនធ្វើឡើងក្រោយពីមានសារព័ត៌មាន Angkor Today បានផ្សាយព័ត៌មានមិនពិតកន្លងមកថាកម្ពុជាលក់វ៉ាក់សាំងកូវីដ ១៩ ក្នុងតម្លៃ 120 ដុល្លារអាមេរិកប៉ុណ្ណោះ ដែលការផ្សព្វផ្សាយនេះត្រូវបានក្រសួងសុខាភិបាលធ្វើការច្រានចោលភ្លាមៗកាលពីថ្ងៃទី ២៤ ខែកុម្ភៈម្សិលមិញនេះ ។
ក្រោយការផ្សព្វផ្សាយរបស់សារព័ត៌មានខាងលើនេះរួចមក សមត្ថកិច្ចបានឈានដល់ការចាប់ខ្លួនលោក Shen Kaidong ជនជាតិចិន ដែលជានាយកសារព័ត៌មាន Angkor Today កាលពីរសៀលថ្ងៃទី ២៤ ហើយបុរសជនជាតិចិនរូបនេះក៏ត្រូវបានសម្រេចបណ្តេចចេញពីប្រទេសកម្ពុជា ក្រោយផ្សព្វផ្សាយបំភ្លៃការពិតថា កម្ពុជាលក់វ៉ាក់សាំងដែលជាជំនួយរបស់ចិន៕
ចែករំលែកព័តមាននេះ