ខេត្តព្រៃវែង ៖ រហូតមកដល់ពេលនេះអ្នកដែលប៉ះពាល់ផ្ទាល់ចំនួន9នាក់ និងអ្នកប៉ះពាល់ដោយប្រយោលជាច្រើននាក់ ពាក់ព័ន្ធជាមួយស្ត្រីនគរបាលជាតិម្នាក់មានវិជ្ជមានកូវីដ-19 ដែលបានមកចូលរួមក្នុងពិធីមង្គលការមួយកន្លែងនៅភូមិទួលសង្កែទទឹង ឃុំជាច ស្រុកកំចាយមារ ខេត្តព្រៃវែង កាលពីថ្ងៃទី17…
ខេត្តព្រៃវែង ៖ រហូតមកដល់ពេលនេះអ្នកដែលប៉ះពាល់ផ្ទាល់ចំនួន9នាក់ និងអ្នកប៉ះពាល់ដោយប្រយោលជាច្រើននាក់ ពាក់ព័ន្ធជាមួយស្ត្រីនគរបាលជាតិម្នាក់មានវិជ្ជមានកូវីដ-19 ដែលបានមកចូលរួមក្នុងពិធីមង្គលការមួយកន្លែងនៅភូមិទួលសង្កែទទឹង ឃុំជាច ស្រុកកំចាយមារ ខេត្តព្រៃវែង កាលពីថ្ងៃទី17 ខែកុម្ភៈ ឆ្នាំ2021 កន្លងទៅ បានយកសំណាកទៅពិនិត្យបានមួយលើកហើយ គឺអវិជ្ជមានទាំងអស់ ។ នេះបើតាមការបញ្ជាក់អោយដឹងពីលោក ឈាង សុណ្ណារ៉ា ប្រធានរដ្ធបាលខេត្តព្រៃវែង បានប្រាប់ឱ្យដឹងតាមទូរស័ព្ទកាលពីថ្ងៃទី24 ខែកុម្ភៈ ឆ្នាំ2021 ម្សិលមិញ ។
លោកបញ្ជាក់បន្ថែមថា តាមការផ្តល់ព័ត៌មានពីអាជ្ញាធររាជធានីភ្នំពេញថា មានស្ត្រីនគរបាលជាតិម្នាក់ អាយុ35ឆ្នាំ ស្នាក់នៅខុនដូ Skyline Dumex ធ្វើតេស្តវិជ្ជមានកូវីដ-19 កាលពីថ្ងៃទី21 ខែកុម្ភៈ ឆ្នាំ2021 ហើយបច្ចុប្បន្នកំពុងសម្រាកព្យាបាលនៅមជ្ឈមណ្ឌលជាតិប្រឆាំងរោគរបេងរាជធានីភ្នំពេញ ។
ក្រោយសួរនាំទើបដឹងថា ស្ត្រីរូបនេះនិងមិត្តភក្តិសរុប5នាក់ទៀត បានទៅពីភ្នំពេញដើម្បីចូលរួមពិធីមង្គលការមួយនៅភូមិទួលសង្កែទទឹង ឃុំជាច ស្រុកកំចាយមារ ខេត្តព្រៃវែង កាលពីថ្ងៃទី17 ខែកុម្ភៈ ឆ្នាំ2021 ចាប់ពីវេលាម៉ោង12ថ្ងៃត្រង់ រហូតដល់ម៉ោងប្រហែល4ល្ងាច ក៏ត្រឡប់ទៅភ្នំពេញវិញ។
បន្ទាប់ពីទទួលបានព័ត៌មានខាងលើនេះ អាជ្ញាធរខេត្តក្រោមបទបញ្ជារបស់លោក ជា សុមេធី អភិបាលខេត្ត បានចុះស្រាវជ្រាវរកឃើញអ្នកប៉ះពាល់ផ្ទាល់ជាមួយស្ត្រីនោះចំនួន9នាក់យកមកដាក់ធ្វើចត្តាឡីស័កនៅសាលាបឋមសិក្សា ស ខេង ទួលសង្កែទទឹង និងចុងប៉មមុខសាលាខេត្តព្រៃវែង រហូតមកដល់ថ្ងៃទី24 ខែកុម្ភៈ នេះបានយកសំណាកទៅពិនិត្យនៅបាស្ទ័រម្តងរួចរាល់ហើយគឺអវិជ្ជមានទាំងអស់។ ដោយឡែក អ្នកប៉ះពាល់ដោយប្រយោលជាច្រើនទៀតក៍អវិជ្ជមានដែរ។ តែទោះជាយ៉ាងណា ការយកសំណាកទៅពិនិត្យមាន3ដង។
លោកប្រធានរដ្ធបាលខេត្តបន្តថា ចាប់តាំងពីផ្ទុះជំងឺកូវីដ-19លើកដំបូងមក រហូតមកដល់ពេលនេះ ខេត្តព្រៃវែងបានធ្វើចត្តាឡីស័កជាបន្តបន្ទាប់មានមនុស្សរាប់រយនាក់ហើយ តែពុំមានអ្នកឆ្លងជំងឺកូវីដ-19នោះឡើយ។
លោកបានបន្តថា ចំពោះពាក់ព័ន្ធករណីនេះអាជ្ញាធរបានអនុវត្តតាមបទបញ្ជារបស់ប្រមុខរាជរដ្ឋាភិបាល និងក្រសួងសុខាភិបាលជាប្រចាំ ៣ ការពារ និង កុំ ÷៣ ការពារ ១- ពាក់ម៉ាស់ ២- លាងដៃ ៣- គម្លាតសុវត្ថិភាពសង្គម និងគម្លាតសុវត្ថិភាពបុគ្គល(ចាប់ពី១ម៉ែត្រកន្លះឡើងទៅអោយបានគ្រប់ៗគ្នា នៅគ្រប់ទីកន្លែង និងអនុវត្តអោយបានគ្រប់ៗគ្នា) ដែលចំណុច៣ ការពារនេះសំខាន់ខ្លាំងណាស់ ដូច្នេះទើបអាចយកឈ្នះលើជំងឺCoivd-19។ ៣-កុំ គឺ១-កុំចូលទៅកន្លែងបិទជិត គ្មានខ្យល់ចេញចូល និងប្រើម៉ាស៊ីនត្រជាក់ច្រើនពេក រកកន្លែងមានខ្យល់ចេញចូល ២-កុំទៅកន្លែងមនុស្សច្រើនកុះករ ៣-កុំប៉ះពាល់គ្នា កុំចាប់ដៃគ្នា កុំកៀកស្មាគ្នា កុំឱបគ្នាជាដើម។ដូច្នេះអាជ្ញាធរខេត្តព្រៃវែងបានមានវិធានការផ្អាកអាជីវកម្មកន្លែងហាងក្លឹមកម្សាន្ត ខារ៉ាអូខេ ។
តែចំពោះកម្មពិធីការ ឫបុណ្យផ្សេងៗនិងសាលារៀន ដំណើរការជាធម្មតា ដោយណែនាំអោយគាត់រៀបភ្ញៀវអង្គុយ១តុតែ៥នាក់ គម្លាតពីគ្នា១ម៉ែត្រកន្លះ និងមានពិនិត្យកម្តៅ ម៉ាស៊ីនបាញ់អាកុលអោយភ្ញៀវ។ រីឯសាលារៀនគឺបិទតែសាលាបឋមសិក្សាទួលសង្កែទទឹងកន្លៃងពាក់ព័ន្ធនោះមួយទេ ព្រោះម្ចាស់ដើមការគាត់ជាគ្រូបង្រៀន ហើយមានលោកគ្រូអ្នកគ្រូទៅចូលរួមមង្គលការនោះដែរ៕
ចែករំលែកព័តមាននេះ