ខេត្តបាត់ដំបង ៖ ស្ត្រីដៃឆើតចំនួន០២នាក់ ដែលសមត្ថកិច្ចកំណត់ថា ជាមុខសញ្ញា«លួច និង ដាក់ថ្នាំសណ្ដំ» បន្លំលួចយ៉ាងសកម្ម នាពេលកន្លងមកនេះ ពេលនេះត្រូវអ្នកភូមិព័ទ្ធចាប់បានប្រគល់ឲ្យសមត្ថកិច្ច ខណៈដែលជនសង្ស័យ០២នាក់បងប្អូននេះ កំពុងប្រើល្បិចបន្លំចូលរើកកាយលួចយកទ្រព្យ ឃុំឈើទាល ស្រុកបាណន់។ សម្បត្តិនៅក្នុងផ្ទះស្ត្រីវ័យចំណាស់ម្នាក់ កាលពីវេលាម៉ោង៣និង៤៥នាទីរសៀលថ្ងៃ ទី២៣ កុម្ភៈ នៅចំណុចភូមិអន្លក់កោង ។
របាយការណ៍អធិការនគរបាលស្រុកបាណន់បានឲ្យដឹងថា ជនសង្ស័យដៃឆើតទាំង០២នាក់នោះ ម្នាក់ឈ្មោះ យ៉ែម មុំ ហៅនៅ ហៅវ៉ាន់ ស្រីអាយុ៥០ឆ្នាំ និងម្នាក់ទៀតឈ្មោះស គឹមលី ហៅ អាលីអាយុ៣៣ឆ្នាំ។ ជនទាំង០២នាក់នេះ ត្រូវជាបងប្អូនរស់នៅក្រុងសេរីសោភ័ណ្ឌ ខេត្តបន្ទាយមានជ័យ។ ប៉ុន្តែស្ត្រីទាំង០២នាក់នេះ បានព្យាយាមឆ្លើយកុហកសមត្ថកិច្ចអំពីអាសយដ្ឋាន និងឈ្មោះរបស់ខ្លួន ។ ពួកគេត្រូវអ្នកភូមិព័ទ្ធចាប់បានប្រគល់ឲ្យសមត្ថកិច្ច ខណៈដែលកំពុងប្រើល្បិចបញ្ឆោតជនរងគ្រោះឈ្មោះហែម ប្រម ស្រីអាយុ៨៥ឆ្នាំ នៅចំណុចកើតហេតុខាងលើ រួចចូលរើកកាយនៅក្នុងផ្ទះ ដើម្បីលួចយកទ្រព្យសម្បត្តិជនរងគ្រោះ។
បើតាមជនរងគ្រោះបាននិយាយថា ស្ត្រីសង្ស័យទាំង២នាក់នោះ បានជិះម៉ូតូចូលផ្ទះគាត់ ពេលឃើញគាត់នៅម្នាក់ឯង។ ពេលចូលទៅដល់ស្ត្រីម្នាក់ចំណាស់បន្តិច បានសួរនាំរកទិញដើមម្រះព្រៅ ហើយនាំគាត់ដើរទៅខាងក្រោយផ្ទះ តែស្ត្រីវ័យក្មេងម្នាក់ទៀតបានចូលទៅរើកកាយនៅក្នុងផ្ទះគាត់។ ប៉ុន្តែនៅពេលកំពុងធ្វើសកម្មភាព ក៏ត្រូវបានអ្នកជិតខាងឃើញសភាពមិនល្អក៏សួរនាំ ទើបដឹងថា ស្ត្រី០២នាក់នេះជាចោរប្រើល្បិចបំរុងលួចទ្រព្យសម្បត្តិគាត់ ហើយក៏មានការផ្អើលឆោឡោនាំគ្នាតាមចាប់បានទាំង០២នាក់តែម្ដង។
អ្នកភូមិបាននិយាយថា ដំបូងគេឃើញ ស្ត្រីម្នាក់កំពុងនាំម្ចាស់ផ្ទះដើរទៅរកបេះម្រះព្រៅនៅខាងក្រោយផ្ទះ តែពេលនោះ គេក៏ឃើញស្ត្រីម្នាក់ទៀតកំពុងរើកកាយនៅក្នុងផ្ទះជនរងគ្រោះ ហើយមានការសង្ស័យគេក៏សួរនាំ ទើបដឹងថា ស្ត្រីទាំង០២នក់នេះកំពុងប្រើល្បិចចូលផ្ទះជនរងគ្រោះបំរុងលួចអីវ៉ាន់ ។ សាក្សីនិយាយថា ពេលស្ត្រីម្នាក់កំពុងធ្វើសកម្មភាព អ្នកឃើញហេតុការណ៍ក៏ស្ទុះចូលទៅសួរនាំ ធ្វើឲ្យជនទាំង០២នាក់ភ័យស្លន់ស្លោរបំរុងជិះម៉ូតូចេញ តែត្រូវអ្នកភូមិស្រែកឆោឡោស្ទាក់ចាប់បានប្រគល់ឲ្យសមត្ថកិច្ចភ្លាមៗដែរ។
សូមបញ្ជាក់ថា កាលពីថ្ងៃទី២៣ កុម្ភៈ ដំណាលៗគ្នានឹងអំពើចោរកម្មដែលប្រព្រឹត្តដោយស្ត្រី០២នាក់បងប្អូនខាងលើនេះ ក៏មានចោរកាច់សោរ.កលួចយកម៉ូតូចំនួន០៣ករណីផ្សេងទៀត បានដោយសុត្ថិភាពផងដែរនៅក្នុងថ្ងៃតែមួយ។ អំពើចោរកម្មកាច់សោរកលួចម៉ូតូទាំង០៣ករណីខាងលើនេះ គឺ លើកទី១ កើតឡើងនៅម្ដុំផ្សារ ស្រុកមោងឬស្សី បាត់ម៉ូតូម៉ាកហុងដា CBR ស៊េរីឆ្នាំ២០១៥ ពាក់ស្លាកលេខ បាត់ដំបង 1S-2856 ដែលមានម្ចាស់ឈ្មោះ ហ៊ាន សុផល ប្រុសអាយុ៥២ឆ្នាំ។ លើកទី២ នៅកើតឡើងនៅម្ដុំផ្សាររូង ឃុំចែងមានជ័យ ស្រុកបាណន់ បាត់ម៉ូតូម៉ាកហុងដាឌ្រីម ស៊េរីឆ្នាំ២០១៩ ពាក់ស្លាកលេខ បាត់ដំបង1AE-6048 ម្ចាស់ឈ្មោះ ជា សុខន ស្រីអាយុ៥២ឆ្នាំ និង លើកទី៣ បានកើតឡើងនៅម្ដុំផ្លូវលេខ១ ក្នុងសង្កាត់ស្វាយប៉ោ ក្រុងបាត់ដំបង បាត់ម៉ូតូម៉ាកឃ្លីក ពាក់ស្លាកលេខ បាត់ដំបង 1Y-7668។
ពាក់ព័ន្ធអំពើចោរកម្ម កាច់សោ.កលួចម៉ូតូចំនួន០៣ករណីផ្ទូនៗក្នុងថ្ងៃតែមួយខាងលើនេះ សមត្ថកិច្ចហាក់មិនទាន់មានតម្រុយពីមុខសញ្ញាជនសង្ស័យនៅឡើយទេ។ ដោយឡែកចំពោះករណីចោរស្រី០២នាក់បងប្អូន ដែលប្រើល្បិចធ្វើជារកទិញម្រះព្រៅយកទៅស្លរ តែគោលដៅចូលលួចទ្រព្យសម្បត្តិជនរងគ្រោះខាងលើនេះ បើតាមមន្ត្រីការិយាល័យជំនាញ បានប្រាប់ថា ស្ត្រីដៃឆើតខាងលើនេះ នៅមានបក្សពួកមួយចំនួនទៀត ដែលតែងដើរធ្វើសកម្មភាពលួច។ ក្រុមស្ត្រីដៃឆើតនេះ ក៏ជាមុខសញ្ញាដាក់ថ្នាំសណ្ដំម្ចាស់ផ្ទះ ដើម្បីលួចទ្រព្យសម្បត្តិដែរ តែពេលនេះជាប់អន្ទាក់០២នាក់ហើយ។ ពេលនេះមន្ត្រីជំនាញកំពុងសួរនាំ ដើម្បីចាត់ការតាមនីតិវិធីហើយ៕
ចែករំលែកព័តមាននេះ