ខេត្តបន្ទាយមានជ័យ ៖ បុរសជនជាតិចិនបានប្រពន្ធខ្មែរម្នាក់ បានដេកបាត់បង់ជីវិតនៅក្នុងបន្ទប់ជួល ក្រោយពីប្រពន្ធបុរសរូបនេះត្រឡប់មកពីលេងស្រុកវិញជាមួយឪពុកម្តាយ និងកូន រួចក៏ចាក់សោទ្វារចូលមើល ស្រាប់តែឃើញបុរសរងគ្រោះដេកបាត់បង់ជីវិតនៅលើគ្រែទៅហើយ បង្កឱ្យមានការភ្ញាក់ផ្អើលកាលពីថ្ងៃទី២៣ ខែកុម្ភៈ ឆ្នាំ២០២១ ស្ថិតក្នុងភូមិប៉ាលិលេយ្យ សង្កាត់-ក្រុងប៉ោយប៉ែត។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានប្រាប់ថា ជនរងគ្រោះខាងលើឈ្មោះ LI GEN JING ភេទប្រុស អាយុ៤០ឆ្នាំ (ជាជនជាតិចិន) មានមុខរបរជាជាងសំណង់ រស់នៅខេត្តយូណាន ស្នាក់នៅបន្ទប់ជួលលេខ០៨ ស្ថិតក្នុងភូមិប៉ាលិលេយ្យ សង្កាត់-ក្រុងប៉ោយប៉ែត ដែលកាន់លិខិតឆ្លងដែនលេខ E46824058 ចុះថ្ងៃទី២៤ ខែមីនា ឆ្នាំ២០១៥ ហើយវីសាចុងក្រោយគឺថ្ងៃទី០១ ខែកញ្ញា ឆ្នាំ២០២០ ផុតកំណត់ថ្ងៃទី១៧ ខែមីនា ឆ្នាំ២០២១។
លោកបានបញ្ជាក់ថា ក្រោយពីទទួលព័ត៌មានហើយ មន្ត្រីនគរបាលជំនាញ និងពេទ្យ ក៏បានចុះទៅពិនិត្យមើល គឺថាជនរងគ្រោះជាជនជាតិចិនរូបនេះបានបាត់បង់ជីវិតនៅលើគ្រែក្នុងបន្ទប់ផ្ទះជួលលេខ៨នោះ អាចបាត់បង់ជីវិតដោយសារតែជំងឺគាំងបេះដូង ខណៈពេលដែលប្រពន្ធទៅលេងស្រុកជាមួយឪពុកម្តាយ លុះត្រឡប់មកវិញឃើញទ្វារបន្ទប់ជាប់សោ ហើយក៏បានចាក់សោចូលទៅ ស្រាប់តែឃើញប្តីបាត់បង់ជីវិតទៅ។
បើតាមស្ត្រីឈ្មោះ ចន សុខា អាយុ៣២ឆ្នាំ (ជនជាតិខ្មែរអះអាងជាប្រពន្ធជនរងគ្រោះ) បានប្រាប់ថា កាលពីបុណ្យចូលឆ្នាំចិន នាងបានសុំប្តីទៅលេងស្រុកនៅខេត្តបាត់ដំបងជាមួយកូន និងឪពុកម្តាយ ហើយពេលត្រឡប់មកវិញគឺថ្ងៃទី២៣ ខែកុម្ភៈ ។
ស្ត្រីជាប្រពន្ធខាងលើប្រាប់បន្តថា ក្រោយពេលត្រឡប់មកពីលេងស្រុកវិញ មកដល់មុខបន្ទប់ជួលក៏ឃើញទ្វារបន្ទប់ជាប់សោខាងក្នុង ហើយនាងគោះទ្វារយ៉ាងណាក៏មិនឃើញប្តីនាងចេញមកបើកចាក់សោដែរ ទើបនាងចាក់សោចូលទៅមើល ក៏ស្រាប់តែឃើញប្តីរបស់នាងដេកបាត់បង់ជីវិតនៅលើគ្រែទៅហើយ ក្រោយមកក៏រាយការណ៍ជូនសមត្ថកិច្ចតែម្តង។
ស្ត្រីជាប្រពន្ធបញ្ជាក់ថា ប្តីរបស់នាងមានជំងឺបេះដូងប្រចាំកាយ និងបានទៅពិនិត្យព្យាបាលនៅមន្ទីរពេទ្យ ព្រមទាំងលេបថ្នាំព្យាបាលជំងឺបេះដូងជាប្រចាំផងដែរ៕
ចែករំលែកព័តមាននេះ