ខេត្តព្រះសីហនុ ៖ រយៈពេល ២ ថ្ងៃចុងក្រោយនេះមានការចែកចាយនូវសម្លេងសារក្នុងបណ្តាញសង្គមដោយអះអាងថាជាសម្លេងរបស់លោក គួច ចំរើន អភិបាលខេត្តព្រះសីហុនបានចេញបទបញ្ជាទៅគ្រប់កម្លាំងមានសមត្ថកិច្ចនៅខេត្តតាមរកនិងស្ទាក់គ្រប់ផ្លូវចេញ-ចូលខេត្តមាត់សមុទ្រមួយនេះ ដោយក្នុងសារសម្លេងនោះបាននិយាយថា គឺមានជនជាតិចិនប្រមាណជាង…
ខេត្តព្រះសីហនុ ៖ រយៈពេល ២ ថ្ងៃចុងក្រោយនេះមានការចែកចាយនូវសម្លេងសារក្នុងបណ្តាញសង្គមដោយអះអាងថាជាសម្លេងរបស់លោក គួច ចំរើន អភិបាលខេត្តព្រះសីហុនបានចេញបទបញ្ជាទៅគ្រប់កម្លាំងមានសមត្ថកិច្ចនៅខេត្តតាមរកនិងស្ទាក់គ្រប់ផ្លូវចេញ-ចូលខេត្តមាត់សមុទ្រមួយនេះ ដោយក្នុងសារសម្លេងនោះបាននិយាយថា គឺមានជនជាតិចិនប្រមាណជាង ២០នាក់ ធ្វើតេស្តឃើញវិជ្ជមានកូវីដ១៩ ហើយបានរត់ចេញពីកន្លែងធ្វើចត្តាឡីស័ក គឺជា «រឿងក្លែងក្លាយតែប៉ុណ្ណោះ» ។
ថ្លែងប្រាប់អ្នកសារព័ត៌មានកោះសន្តិភាពនារាត្រីថ្ងៃទី ២៣ ខែកុម្ភៈ លោកគួច ចំរើន បានឲ្យដឹងយ៉ាងដូច្នេះថា «រឿងព័ត៌មានដែលផ្សព្វផ្សាយថាមានចិន២០នាក់រត់ចេញពីកន្លែងធ្វើចត្តាឡីស័កនោះ គឺគ្មានទេ ។ សូមបញ្ជាក់ជូនចឹង» ។ លោកបានបន្តថាសម្លេងនោះគឺជាការកាត់តសម្លេងចាស់កន្លងមកដែលជាបទបញ្ជាក្នុងការចាត់តាំងកម្លាំងត្រួតពិនិត្យតាមច្រកជើងគោក និងជើងទឹក ដើម្បីទប់ស្កាត់និងបង្ការនូវការឆ្លងរាលដាលកូវីដ-១៩
«តែសម្លេងដែលគេបានយកទៅកាត់ត ផ្សារភ្ជាប់គ្នាមានទាំងសម្លេងខ្ញុំ មានទាំងសម្លេងរបស់ឧត្តមសេនីយ៍មេបញ្ជាការប៉េអ៊ឹមនោះគឺជាបទបញ្ជាដែលយើងបានធ្វើការអនុវត្តដើម្បីទប់ស្កាត់ការឆ្លងចូលទេ ដែលជាការព្រួយបារម្ភរបស់យើងក្នុងរយៈពេលកន្លងទៅ ដែលយើងខ្លាចមានការជ្រៀតបន្លំចូលតាមព្រំដែន នៅពេលដែលការទប់ស្កាត់តាមព្រំដែនគោករឹងមាំហើយនោះ ខ្ញុំបានណែនាំដាក់បទបញ្ជាសម្រាប់ការគ្រប់គ្រងការពារ ក្រែងលោគេមានលួចជ្រៀតចូលតាមផ្លូវទឹក» ។ លោក គួច ចំរើន បញ្ជាក់។
លោកអភិបាលខេត្តព្រះសីហនុ បានមានប្រសាសន៍បន្តថា «ចឹងទាំងសម្លេងខ្ញុំ ទាំងសម្លេងរបស់មេបញ្ជាការអាវុធហត្ថ គឺនិយាយក្នុងផែនការនិងបទបញ្ជាកាលពីពេលនោះទេ ។ តែត្រូវបានយកមកកាត់ត យកមកក្រឡៃបំភ័ន្តសាធារណៈមតិថាមានអ្នកធ្វើចត្តាឡីស័ក២០នាក់ ហើយរត់ចេញនោះទេ ។ ចំណុចនេះគឺគ្មានទេ សូមបញ្ជាក់ច្បាស់លាស់ដូច្នេះ ។ អ្នកដែលផ្សព្វផ្សាយជាអ្នកផ្សព្វផ្សាយព័ត៌មានក្លែងក្លាយ» ។
យ៉ាងណាមិញនៅព្រឹកថ្ងៃទី ២៤ ខែកុម្ភៈនេះកម្ពុជាបានរកឃើញស្ត្រីជនជាតិចិន២រូប មានអាយុ ៣៥ ឆ្នាំ និង ២២ ឆ្នាំ វិជ្ជមានកូវីដ ១៩ នៅខេត្តព្រះសីហនុ ដែលក្នុងនោះរដ្ឋបាលខេត្តព្រះសីហនុអះអាងថាស្ត្រីទាំងពីរនាក់នេះជាអ្នកដំណើរពីរាជធានីភ្នំពេញទៅកាន់ទឹកដីខេត្តព្រះសីហនុនាថ្ងៃទី ១៦ និងថ្ងៃទី ២០ ខែកុម្ភៈ ហើយអ្នកទាំងពីរក៏កំពុងសម្រាកព្យាបាលនៅមន្ទីរពេទ្យបង្អែកខេត្តព្រះសីហនុរួចហើយ ៕
ចែករំលែកព័តមាននេះ