ខេត្តព្រះសីហនុ ៖ យ៉ាងហោចណាស់ទីតាំងសណ្ឋាគារ និងអគារស្នាក់នៅរួមរបស់ចិនចំនួន ៥ ទីតាំង នៅខេត្តព្រះសីហនុត្រូវបានបិទជាបណ្តោះអាសន្ន ក្រោយពីរកឃើញស្ត្រីជនជាតិចិន២រូប បានកើតកូវីដ-១៩ ។…
ខេត្តព្រះសីហនុ ៖ យ៉ាងហោចណាស់ទីតាំងសណ្ឋាគារ និងអគារស្នាក់នៅរួមរបស់ចិនចំនួន ៥ ទីតាំង នៅខេត្តព្រះសីហនុត្រូវបានបិទជាបណ្តោះអាសន្ន ក្រោយពីរកឃើញស្ត្រីជនជាតិចិន២រូប បានកើតកូវីដ-១៩ ។ នេះបើយោងតាមប្រកាសព័ត៌មានរបស់សាលាខេត្តព្រះសីហនុ ។
អាជ្ញាធរខេត្តព្រះសីហនុ បានឲ្យដឹងថា ស្ត្រីជនជាតិចិន២រូប ដែលក្រសួងសុខាភិបាល បានប្រកាសថា ឆ្លងកូវីដ១៩ នៅថ្ងៃទី២៤ កុម្ភៈនេះ គឺជាអ្នកដំណើរមកពីភ្នំពេញ កាលពីថ្ងៃទី១៦កុម្ភៈ និងថ្ងៃទី២០កុម្ភៈ ។ ក្នុងនោះទីតាំងដែលពាក់ព័ន្ធត្រូវបានអាជ្ញាធរចុះបិទជាបន្តបន្ទាប់ ហើយស្ត្រីអ្នកជំងឺជនជាតិទាំង ២ រូបនេះក៏ត្រូវបានដាក់ឲ្យសម្រាកព្យាបាល នៅមន្ទីរពេទ្យបង្អែកខេត្តព្រះសីហនុរួចរាល់ហើយដែរ ។
ប្រកាសព័ត៌មានរបស់អាជ្ញាធរខេត្តព្រះសីហនុ បានបញ្ជាក់ថា ទីតាំងចំនួន៥ រួមមាន សណ្ឋាគារ ហ័ងហ្គ័នជាយី និងសណ្ឋាគារ ជីនប៉ី ព័រអ៊ី នៅក្រុងព្រះសីហនុ ដែលស្ត្រីទាំងពីរបានស្នាក់នៅ ត្រូវបានបិទជាបណ្តោះអាសន្ន រួមទាំងសាខាសណ្ឋាគារ ជីនប៉ី ទាំង៣សាខា និងអគារស្នាក់នៅរបស់បុគ្គលិកក្រុមហ៊ុន ជីនប៉ី ក្រុងព្រះសីហនុ ក៏ត្រូវផ្អាកអាជីវកម្មជាបណ្តោះអាសន្ន ។
ជាមួយគ្នានោះផងដែរ អាជ្ញាធរខេត្តព្រះសីហនុ បានប្រកាសអំពាវនាវដល់អ្នកប៉ះពាល់ជាមួយស្ត្រីចិនទាំងពីរនាក់ និងអ្នកធ្លាប់ចេញចូល នៅសណ្ឋាគារ ជីនប៉ីទាំង ៣សាខា និងអគារស្នាក់នៅរួមរបស់បុគ្គលិក ក្រុមហ៊ុន ជីនប៉ី ចាប់ពីយប់ថ្ងៃទី១៦ ខែកុម្ភៈ និងចេញចូល ឬស្នាក់នៅសណ្ឋាគារ ហ័ងហ្គ័ន ជាយី ចាប់ពីយប់ថ្ងៃទី២០ ខែកុម្ភៈ ត្រូវមានភាពស្មោះត្រង់ មិនលាក់លៀម និងស្ម័គ្រចិត្ត មកធ្វើតេស្តរកមេរោគកូវីដ១៩ ឲ្យបានទាន់ពេលវេលា ហើយត្រូវទៅជួបក្រុមគ្រូពេទ្យ នៅមន្ទីរសុខាភិបាល ខេត្តព្រះសីហនុ ដែលប្រចាំការ នៅសាលាបឋមសិក្សា-អនុវិទ្យាល័យ តេជោសែន កម្មករ ស្ថិតនៅវិថីឯករាជ្យ ( ផ្លូវ ១០០ ) សង្កាត់លេខ៤ ក្រុងព្រះសីហនុ ខេត្តព្រះសីហនុ ចាប់ពីម៉ោង ១រសៀល ថ្ងៃទី២៤ ខែកុម្ភៈ ឆ្នាំ២០២១ នេះតទៅ ដើម្បីក្រុមការងារ ពិនិត្យ យកសំណាក ធ្វើតេស្តរកវីរុសកូវីដ១៩ និងធ្វើចត្តាឡីស័ក ចំនួន ១៤ថ្ងៃ តាមការកំណត់របស់ក្រសួងសុខាភិបាល។
សូមបញ្ជាក់ថា នៅព្រឹកថ្ងៃទី២៤ ខែកុម្ភៈនេះ កម្ពុជាបានប្រកាសរកឃើញករណីវិជ្ជមានវីរុសកូវីដ១៩ថ្មី ចំនួន ៤០នាក់។ ក្នុងនោះ ២នាក់ ជាស្ត្រីចិន នៅខេត្តព្រះសីហនុ និង៣៨នាក់ ពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ។
គិតមកដល់ព្រឹកថ្ងៃទី២៤ ខែកុម្ភៈនេះ ពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ ក្រសួងសុខាភិបាលបានរកឃើញអ្នកឆ្លងកូវីដ១៩ សរុបចំនួន ១៣៧នាក់ ដោយស្ទើរតែទាំងអស់ ជាជនជាតិចិន រស់នៅភ្នំពេញ និងមានជនជាតិវៀតណាម និងជនជាតិខ្មែរ ក្នុងចំនួនតិចតួច ៕
ចែករំលែកព័តមាននេះ