ខេត្តប៉ៃលិន ៖ រថយន្តក្រឡុកស៊ីម៉ង់តិ៍១គ្រឿងបានជ្រុលក្បាលចូលផ្ទះប្រជាពលរដ្ឋ ហើយក្រឡាប់ចាក់ស៊ីម៉ង់តិ៍នៅលើដងផ្លូវ ខណ:ម្ចាស់បើកបររថយន្តមានស៊ីម៉ង់តិ៍ពេញ បម្រុងចាក់ធ្វើផ្ទះប្រជាពលរដ្ឋនៅក្បែរផ្សារប៉ាហ៊ី ស្រាប់តែជាន់ហ្វ្រាំងមិនស៊ី បណ្តាលឱ្យរថយន្តថយក្រោយរហូតដល់ក្រឡាប់ក្បាលចូលផ្ទះប្រជាពលរដ្ឋតែម្តង ។
តែសំណាងល្អពេលប្រជាពលរដ្ឋក្រឡេកឃើញបែបនេះក៏នាំគ្នារត់គេចទាំងព្រលឹងចុងសក់ ដែលហេតុការណ៍រថយន្តក្រឡូកស៊ីម៉ង់ដាច់ហ្វ្រាំងក្រឡាប់នៅមុខផ្ទះប្រជាពលរដ្ឋនេះបានកើតឡើង កាលពីវេលាម៉ោង២និង៣០នាទីរសៀល ថ្ងៃទី២២ ខែកុម្ភ: ឆ្នាំ២០២១ ស្ថិតនៅក្បែរផ្សារផ្សារ សាមគ្គីហៅប៉ាហ៊ី ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ។
ប្រភពព័ត៌មានពីនគរបាលបានឱ្យដឹងថា ៖ អ្នកបើកបររថយន្តមិនស្គាល់អត្តសញ្ញាណ ដោយ បើកបររថយន្តក្រឡុកស៊ីម៉ង់តិ៍ ម៉ាកហ៊ីយិនដាយ ពណ៌ស លាយលឿង ពាក់ស្លាកលេខ ភ្នំពេញ 5A-0346 រងការខូចខាតយ៉ាងដំណំ និងបែកបាក់ទ្វារផ្ទះប្រជាពលរដ្ឋផងដែរ ។
ប្រភពដដែលបន្តទៀតថា មុនពេលកើតហេតុ គេឃើញរថយន្តខាងលើមានស៊ីម៉ង់តិ៍ពេញ បម្រុងនឹងយកទៅចាក់ធ្វើផ្ទះប្រជាពលរដ្ឋ លុះមួយសន្ទុះក្រោយមក ស្រាប់តែរអិលថយក្រោយសន្សឹមៗ ហើយអ្នកបើកបររថយន្ត ខំប្រឹងបួងចង្អូតឱ្យត្រង់ផ្លូវលុះដល់កន្លែងផ្ទះកើតហេតុ ស្រាប់តែបែរក្បាលចូលបុកពេញទំហឹង បណ្តាលឱ្យក្រឡាប់ចាក់ស៊ីម៉ង់តិ៍ពេញ ផ្លូវតែម្តង ។
ក្រោយពេលកើតហេតុ គេឃើញនគរបាល និងម្ចាស់រថយន្តចុះទៅពិនិត្យ ដើម្បីរៀបចំយករថយន្តខាងលើទៅជួសជុល និងធ្វើការសងថ្លៃខូចខាតផ្ទះប្រជាពលរដ្ឋខាងលើ ដើម្បីបញ្ចប់បញ្ហាផងដែរ ៕
ចែករំលែកព័តមាននេះ