រាជធានីភ្នំពេញ ៖ កម្ពុជាបានប្រកាសពីករណីផ្ទុះកូវីដ-១៩ ក្នុងទ្រង់ទ្រាយធំដែល​មានមនុស្ស​ចំនួន​ដល់ ៣២នាក់ត្រូវបានរកឃើញវិជ្ជមាន ជាជនចិនទាំងអស់ នៅក្នុងរាជធានី​ភ្នំពេញ ។ សម្តេចនាយករដ្ឋមន្រ្តីបានដាក់ឈ្មោះករណីនេះថា “ជាព្រឹត្តិការណ៍​សហគមន៍​២០កុម្ភៈ” ។ បើទោះបីព្រឹត្តិការណ៍សហគមន៍ ២០កុម្ភៈមិនឈាន​ដល់​ការផ្អាក​ការសិក្សារបស់សិស្សនៅតាមសាលារៀន ឬពិធីមង្គលការក្តីប៉ុន្តែគេបាន​មើលឃើញថា​ព្រឹត្តិការណ៍នេះ នឹងជះឥទ្ធិពលដល់ការរកចំណូល​របស់ពលរដ្ឋ​បន្ថែមទៀត ពិសេសវានឹងធ្វើឲ្យមានការយឺតយាវដល់ដំណើរការ​ស្តារសេដ្ឋកិច្ចជាតិនិង​ពលរដ្ឋឡើងវិញនោះ​ ។

ព្រឹត្តិការណ៍សហគមន៍២០កុម្ភៈ បានធ្វើឲ្យនាយករដ្ឋមន្រ្តីសម្រេចផ្អាក​អាជីវកម្មមួយចំនួន មានការបិទអគារក្លឹបកម្សាន្តN8 និងតំបន់មួយចំនួនដែលផ្ទុះ​ករណីកូវីដ ១៩ ក្នុងមានខុនដូស្នាក់នៅផងដែរ ។ កម្ពុជាក៍បានរឹតបណ្តឹងការធ្វើដំណើរ​ចេញ​របស់ពលរដ្ខទៅប្រទេសវៀតណាម ថៃនិងឡាវ  ។ កម្ពុជាត្រូវចំណាយទំាងថវិកា​និងធនធាន​មនុស្សនៅក្នុងការរុករកមនុស្សពាក់ព័ន្ធមកធ្វើតេស្តនិងចត្តាឡីស័ក ទិដ្ឋភាពទំាងអស់នេះតិចឬច្រើននឹងជះឥទ្ធពលបន្ថែមលើសេដ្ឋកិច្ច​ពលរដ្ឋដែលកំពុង​យ៉ាប់យឺនស្រាប់នោះ ។

“ខ្ញុំស្នើសុំការយោគយល់ពីអ្នកធុរកិច្ច និងការស្នាក់ការនៅរបស់ពលរដ្ឋ ដែលតម្រូវឱ្យមានការបិទអគារ ក្លឹបកម្សាន្ តN8 និងតំបន់មួយចំនួនដែលផ្ទុះ​ករណីកូវីដ ១៩ ជាចាំបាច់ ដោយមិនអនុញ្ញាតអោយចេញ-ចូល លើកលែងតែអ្នក​ដែលជាម្ចាស់ផ្ទះក្នុងតំបន់នោះ គឺអោយចូល តែមិនអនុញ្ញាតអោយ​ចេញ”នេះជា​ប្រសាសន៍របស់សម្តេចតេជោ នាយករដ្ឋមន្រ្តីនៅព្រឹកថ្ងៃពី ២០កុម្ភៈនេះ ទៅកាន់ជន​រួមជាតិតាមបណ្តាញ​អន្តរសង្គមនិងកញ្ចក់ទូរទស្សន៍ ។

ព្រឹត្តិការណ៍ ២០កុម្ភៈបានធ្វើឲ្យចំនួនអ្នកជំងឺកូវីដ ១៩ នៅកម្ពុជា កើនជាង ៥០០នាក់ ។ ជាទូទៅការស្តារសេដ្ឋកិច្ចឡើងវិញក្នុងពេលនិងក្រោយពេលកូវីដ ១៩ នេះ ត្រូវគេ​អះអាងថា​អាស្រ័យលើ​ការគ្រប់គ្រងស្ថានភាពជំងឺនេះថា មានឬគ្មាន​អ្នកឆ្លងថ្មីនោះ ។ ឧទាហរណ៍ដូចជាការស្តារវិញទេសចរណ៍​ដែលត្រូវការការធ្វើដំណើរ ប្រកបដោយសុវត្ថិភាព របស់ពលរដ្ឋនោះ មិនអាចនឹងកើតមានទេ បើនៅតែមាន​ករណីកូវីដ ១៩ ម្តងផ្ទុះនៅទីនេះ ម្តងផ្ទុះនៅទីនោះ គឺពលរដ្ឋមិនហ៊ានដើរកម្សាន្តឡើយ ។ ដូចគ្នានេះដែរបើម្តងផ្ទុះចូលសហគមន៍នេះ ម្តងចូលសហគមន៍ខេត្តនោះ ការ​រកទទួន​ទាន​របស់ពលរដ្ឋមិនដំណើររលួនឡើយ ម្តងបិទម្តងបើក ម្តងមនុស្សមានការងារ​ធ្វើ​ម្តង​មនុស្សគ្មានការងារធ្វើ ។

សម្តេចតេជោ ហ៊ុន សែន អំពាវនាវដល់ពលរដ្ឋនៅភ្នំពេញ និងតំបន់ដទៃទៀត ត្រូវបង្កើនការប្រុងប្រយ័ត្ន ហើយរឹតបន្តឹងក្នុងការអនុវត្តវិធានការ ៣ការពារ និង ៣កុំ ឲ្យបានជាប់លាប់ល្អតាមការណែនាំរបស់ក្រសួងសុខាភិបាល ៕