រាជធានីភ្នំពេញ ៖ រថយន្តកុងតឺន័រមួយគ្រឿងសង្ស័យបើកបរក្នុងល្បឿនលឿនក៏ជ្រុលទៅបុកម៉ូតូយ៉ាងពេញទំហឹង បណ្ដាលឲ្យកិនអ្នកជិះម៉ូតូម្នាក់បាត់បង់ជីវិតនៅនឹងកន្លែងកើតហេតុ ចំណែកម្នាក់ទៀតរងរបួសធ្ងន់ ត្រូវបានរថយន្តគ្លីនិកឯកជនដឹកយកទៅសង្គ្រោះភ្លាមៗ ដោយឡែករថយន្តបង្កព្យាយាមបើកគេចជាច្រើនគីឡូម៉ែត្រ ប៉ុន្តែត្រូវសមត្ថកិច្ចដេញតាមឃាត់ខ្លួនអ្នកបើកបរបាន រួចនាំយកទៅធ្វើការសាកសួរ ដើម្បីចាត់ការតាមច្បាប់ ។ ។
ហេតុការណ៍ខាងលើនេះបានបង្កអោយមានការភ្ញាក់ផ្អើលកាលវេលាម៉ោង១០និង៤៥នាទីយប់ថ្ងៃទី១៨ ខែកុម្ភៈ ឆ្នាំ២០២១ នៅតាមផ្លូវវ៉េងស្រេងជិតស្តុបទួលពង្រ ស្ថិតក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះដែលបាត់បង់ជីវិតឈ្មោះសៀក សុខា ភេទប្រុស អាយុ២៥ឆ្នាំ មុខរបរជាកម្មកររោងចក្រ ស្នាក់នៅបែកចាន ស្រុកអង្គស្នួល ខេត្តកណ្តាល មានស្រុកកំណើតនៅឯខេត្តកំពង់ចាម ។ ចំណែកអ្នករងរបួសធ្ងន់ម្នាក់ទៀត មិនស្គាល់អត្តសញ្ញាណនោះទេ ។ ជនរងគ្រោះទាំង២នាក់ជិះម៉ូតូមួយគ្រឿង ម៉ាកស៊ុយហ្សុ៊យគីលែត ពណ៌ខ្មៅ ពាក់ស្លាកលេខភ្នំពេញ 1HB-5569 ។
ដោយឡែក ភាគីខាងរថយន្តកុងតឺន័រមួយគ្រឿង ពណ៌សលាយខៀវ ពាក់ស្លាកលេខភ្នំពេញ 3A-4344 បើកបរដោយបុរសម្នាក់មិនស្គាល់អត្តសញ្ញាណ ។
តាមប្រភពព័ត៌មានពីប្រជាពលរដ្ឋនៅកន្លែងកើតហេតុដែលបានឃើញហេតុការណ៍ផ្ទាល់បានឱ្យដឹងថា នៅមុនពេលកើតហេតុ គេឃើញជនរងគ្រោះទាំង២នាក់ជិះម៉ូតូមួយគ្រឿងធ្វើដំណើរក្នុងទិសដៅពីកើតទៅលិច ក្នុងល្បឿនលឿនមធ្យម លុះមកដល់ចំណុចកើតហេតុ ស្រាប់តែមានរថយន្តកុងតឺន័រមួយគ្រឿងបើកបរក្នុងទិសដៅពីកើតទៅលិចស្របគ្នាក្នុងល្បឿនយ៉ាងលឿន ហើយបានកៀរម៉ូតូជនរងគ្រោះខ្ទាតទៅបុកខឿនពុះចែកទ្រូងផ្លូវ បណ្ដាលឱ្យដួលហើយរថយន្តបង្កបានកិនជនរងគ្រោះទាំងពីរនាក់នោះម្នាក់បានបែកក្បាលហូរឈាមស្លាប់ភ្លាមៗនៅនិងកន្លែងកើតហេតុ ចំណែកម្នាក់ទៀតរងរបួសធ្ងន់ត្រូវរថយន្តឯកជនសម្ភពស័ង្គម៉ារីបានដឹកយកជនរងគ្រោះទៅសង្គ្រោះភ្លាមៗ ។
ដោយឡែករថយន្តកុងតឺន័របានព្យាយាមបើកគេចចេញពីកន្លែងកើតហេតុជាច្រើនគីឡូម៉ែត្រ ប៉ុន្តែត្រូវបានកំលាំងសមត្ថកិច្ចនគរបាលខណ្ឌពោធិ៍សែនជ័យសហការជាមួយកំលាំងសមត្ថកិច្ចនគរបាលខណ្ឌកំបូលនាំគ្នាដេញស្ទាក់ឃាត់ខ្លួនអ្នកបើកបររថយន្តបង្កបាននៅក្នុងតំបន់សេដ្ឋកិច្ចព្រំប្រទល់ខណ្ឌកំបូល រួចនាំយកទៅធ្វើការសួរនាំនៅប៉ុស្តិ៍កន្ទោក និងប្រគល់ទៅផ្នែកជំនាញចរាចរណ៍រាជធានីភ្នំពេញ។
តាមប្រភពព័ត៌មានពីមិត្តភ័ក្ដិរបស់ជនរងគ្រោះបានឲ្យដឹងថា នៅមុនពេលកើតហេតុពួកគាត់បាននាំគ្នាជិះត្រឡប់មកពីស្ទឹងមានជ័យ ក្នុងគោលបំណងត្រឡប់ទៅផ្ទះជួលវិញនៅឯបែកចាន ខណៈពេលជិះផុតស្តុបទួលពង្រ គាត់បានជិះម៉ូតូវ៉ាលឿនទៅមុនជនរងគ្រោះជាច្រើនម៉ែត្រ ហើយឈប់ចាំយូរពេកមិនឃើញមក គាត់ក៏ជិះម៉ូតូត្រឡប់ទៅរកវិញស្រាប់តែប្រទះឃើញជនរងគ្រោះជួបគ្រោះថ្នាក់ចរាចរណ៍ស្លា.ប់ម្នាក់ និងម្នាក់ទៀតរបួសធ្ងន់ទៅហើយ។
ក្រោយពេលកើតហេតុ សមត្ថកិច្ចនគរបាលប៉ុស្តិ៍កន្ទោកបានប្រគល់អ្នកបើកបររថយន្តបង្ក ព្រមទាំងរថយន្តកុងតឺន័រអោយទៅផ្នែកជំនាញចរាចរណ៍ផ្លូវគោករាជធានីភ្នំពេញយកទៅរក្សាទុករងចាំការដោះស្រាយនៅពេលក្រោយ ៕
ចែករំលែកព័តមាននេះ