ខេត្តតាកែវ ៖ ស្ត្រីជាមុខសញ្ញាជួញដូរគ្រឿងញៀ.នចំនួន២នាក់ត្រូវបាននគរបាលស្រុកបាទីឃាត់ខ្លួនបានរួមជាមួយវុត្ថុតាងជាក់ស្តែងថ្នាំញៀ.នចំនួន១០កញ្ចប់ បន្ទាប់ពីនគរបាលបានចុះល្បាតក៏ប្រទះឃើញរួចឃាត់ខ្លួនយកមកកាន់អធិការដ្ឋានស្រុកដើម្បីចាត់ការបន្ត។
ហេតុការណ៍ចាប់ឃាត់ខ្លួនមុខសញ្ញាជួញដូគ្រឿងញៀ.នខាងលើនេះបានធ្វើឡើងកាលពីម៉ោង៣និង៣០នាទីរសៀលថ្ងៃទី១៥ ខែកុម្ភៈ ឆ្នាំ២០២១ ក្នុងភូមិតានប់ ឃុំចំបក់ ស្រុកបាទី ខេត្តតាកែវ ។
លោកវរសេនីយ៍ឯក ឆាយ កែវមុនី្ន អធីការនគរបាលស្រុកបាទីបានអោយដឹងថា ជនសង្ស័យទាំង២នាក់ខាងលើ ក្នុងនោះម្នាក់ឈ្មោះហង្ស នីតា ភេទស្រី អាយុ៣៩ឆ្នាំ មុខរបរមិនពិតប្រាកដ ស្នាក់នៅភូមិគីឡូលេខ៦ សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ និងម្នាក់ឈ្មោះគង់ ស៊ីណា ភេទស្រី អាយុ៣៥ឆ្នាំ ស្នាក់នៅភូមិថ្មី ឃុំកុមាររាជា ស្រុកបាទី ខេត្តតាកែវ ។
លោកអធិការនគរបាលស្រុកបានបន្តទៀតថា បន្ទាប់ពីឃាត់ខ្លួនជនសង្ស័យបានហើយនោះ កម្លាំងល្បាតបានឆែកឆេររកឃើញមានម្សៅក្រាមពណ៌សសង្ស័យជាសារធាតុញៀ.នមានចំនួន១០កញ្ចប់ធំនៅក្នុងកែបម៉ូតូ រួចក៏បញ្ជូនមកសួនាំនៅអធិការដ្ឋាន ព្រមទាំងដកហូតមធ្យោបាយធ្វើដំណើរម៉ូតូ១គ្រឿង ម៉ាកស្គូពី ពណ៌ខ្មៅ ពាក់ស្លាកលេខ កណ្តាល 1H-5035 និងទូរស័ព្ទ១គ្រឿង។
នៅចំពោះមុខនគរបាលជំនាញ ស្ត្រីជាសង្ស័យទាំង២នាក់បានឆ្លើយសារភាពថា ពួកខ្លួនយកថ្នាំញៀ.នទាំងនេះមកពីភ្នំពេញ ដើម្បីយកអោយម៉ូយផង និងចែកចាយខ្លួនឯងផងតែមិនទាន់បានចែកចាយ និងយកឱ្យម៉ូយផងក៏ត្រូវនគរបាលចាប់ខ្លួនតែម្តងទៅ។
លោកវរសេនីយ៍ឯកមឿង សារុន ប្រធានការិយាល័យប្រឆាំងការជួញដូគ្រឿងខេត្តបានអោយដឹងផងដែរថា នៅពេលនេះសួរនាំ នឹងបានកសាងសំណុំរឿងដើម្បីបញ្ជូនជនសង្សយ័ ព្រមទាំងវត្ថុតាងទៅសាលាដំបូងខេត្តនៅថ្ងៃទី១៦ កុម្ភៈ ឆ្នាំ២០២១នេះ ដើម្បីចាត់ការទៅតាមច្បាប់ ៕
ចែករំលែកព័តមាននេះ